కృష్ణా జిల్లాలో విషాదం.. రోడ్డు ప్రమాదానికి నలుగురు బలి !

ఏపీలోని కృష్ణా జిల్లా ఉయ్యూరు మండలం గండిగుంట సమీపంలో విషాదం చోటు చేసుకుంది. తెల్లవారుజామున జరిగిన రోడ్డు ప్రమాదం రాష్ట్ర వ్యాప్తంగా చర్చనీయాంశంగా మారింది. జాతీయ రహదారిపై వేగంగా దూసుకెళ్లిన కారు అదుపు తప్పి పల్టీలు కొట్టడంతో నలుగురు యువకులు ప్రాణాలు కోల్పోయారు. మరో ఇద్దరు గాయపడగా.. వారిని ఆసుపత్రికి తరలించారు. దీంతో ఈ వ్యవహారం రాష్ట్ర వ్యాప్తంగా హాట్ టాపిక్ గా మారింది.

ప్రమాదానికి కారణం..?

పోలీసుల ప్రాథమిక విచారణలో అతివేగమే ఈ ప్రమాదానికి ప్రధాన కారణమని తేలింది. కృష్ణా జిల్లా ఉయ్యూరు-మచిలీపట్నం జాతీయ రహదారిపై కారు సర్వీస్ రోడ్డులోకి దూసుకెళ్లి.. అక్కడ పల్టీలు కొట్టింది. ఈ ప్రమాదంలో వాహనం పూర్తిగా ధ్వంసమైందని పోలీసులు తెలిపారు. ప్రమాదం తీవ్రతను బట్టి కారు వేగం 120 కి.మీ.లకు పైగా ఉన్నట్లు అంచనా వేస్తున్నారు.

కాగా ఈ ప్రమాదంలో కుందేరు గ్రామానికి చెందిన ముగ్గురు యువకులు.. చింతయ్య (17), రాకేష్ బాబు (24), ప్రిన్స్ (24) సంఘటనా స్థలంలోనే దుర్మరణం చెందారు. మరో యువకుడుకి తీవ్ర గాయాలు కావడంతో ఆసుపత్రికి తరలించగా.. చికిత్స పొందుతూ ప్రాణాలు కోల్పోయాడు. మరొకరి పరిస్థితి నిలకడగా ఉన్నట్టు చెబుతున్నారు. ఈ ఘటనతో బాధితుల కుటుంబాలు తీవ్ర విషాదంలో మునిగిపోయాయి.

పోలీసులు, స్థానికుల సహాయక చర్యలు..

అయితే ప్రమాదం జరిగిన వెంటనే స్థానికులు వెంటనే అక్కడికి చేరుకొని పరుగుతీశారు. వాహనం శకలాల్లో చిక్కుకున్న బాధితులను బయటకు తీయడానికి సహాయక చర్యలు చేపట్టారు. అనంతరం పోలీసులకు సమాచారం ఇవ్వడంతో.. ఉయ్యూరు పోలీసులు తక్షణమే సంఘటన స్థలానికి చేరుకుని రక్షణ చర్యలు చేపట్టారు. మృతదేహాలను ఉయ్యూరు ప్రభుత్వ ఆసుపత్రికి తరలించి పోస్టుమార్టం నిర్వహిస్తున్నారు. ప్రమాదం కారణాలపై పూర్తి స్థాయి విచారణ ప్రారంభమైందని సీఐ తెలిపారు.

కాగా ప్రమాదం జరిగిన సమయానికి జాతీయ రహదారిపై వాహన రాకపోకలు ఎక్కువగా ఉండటంతో కొంతసేపు ట్రాఫిక్ జామ్ ఏర్పడింది. పోలీసులు వెంటనే రాకపోకలను క్రమబద్ధీకరించి, రహదారిని సాఫీ చేశారు. ధ్వంసమైన వాహనాన్ని క్రేన్ సాయంతో పక్కకు తరలించారు. కుందేరు గ్రామానికి చెందిన ఈ యువకులు విజయవాడకు వెళ్తుండగా ప్రమాదం జరిగిందని కుటుంబ సభ్యులు చెబుతున్నారు. రాష్ట్రంలో రోడ్డు ప్రమాదాలు పెరుగుతున్న నేపథ్యంలో ఈ ఘటన మరోసారి రోడ్డు భద్రతపై చర్చకు దారి తీసింది.

ఘటనపై ఉయ్యూరు పోలీసులు కేసు నమోదు చేసి, సీసీటీవీ ఫుటేజ్ సేకరిస్తున్నారు. కారు వేగం, దిశ, వాహనం సాంకేతిక లోపం వంటి అంశాలపై పరిశీలన చేస్తున్నారు. డ్రైవర్ మద్యం సేవించి వాహనం నడిపాడా లేదా అనే కోణంలో కూడా విచారణ కొనసాగుతోంది.

English summary

A tragedy occurred near Gandigunta in Uyyuru mandal of Krishna district of AP. The road accident that occurred in the early hours of the morning has become a topic of discussion across the state.