నా గదికి రా-సంచలన ఆడియో-నెల్లూరు జీజీహెచ్ సూపరింటెండెంట్ కీచక పర్వం-వైద్య విద్యార్థినికి వేధింపులు

Published: Friday, June 4, 2021, 2:25 [IST]

కోవిడ్ విధుల్లో ఉన్న ఓ వైద్య విద్యార్థినిని లైంగిక వేధింపులకు గురిచేస్తున్న ఓ ఉన్నత వైద్యాధికారి కీచకపర్వం బయటపడింది. అతని వేధింపులను నిలదీస్తూ ఆ వైద్య విద్యార్థిని ఎదురు తిరగడంతో అతని నోట మాట లేకుండా పోయింది. దీనికి సంబంధించిన సంచలన ఆడియో ప్రస్తుతం సామాజిక మాధ్యమాల్లో వైరల్‌గా మారింది. కూతురు వయసు ఉన్న ఆమె పట్ల ఆ వైద్యాధికారి వేధింపులపై సర్వత్రా విమర్శలు వెల్లువెత్తుతున్నాయి.

'మీకేమీ అసభ్యంగా అనిపించట్లేదా'

నెల్లూరు జిల్లా కేంద్రంలోని జీజీహెచ్ ఆస్పత్రి సూపరింటెండెంట్‌పై లైంగిక వేధింపుల ఆరోపణలు తీవ్ర కలకలం రేపుతున్నాయి. ఆస్పత్రిలో పనిచేస్తున్న ఓ వైద్య విద్యార్థిని ఆయనపై ఎదురు తిరిగింది. ఇద్దరి మధ్య జరిగిన ఫోన్ సంభాషణ ప్రస్తుతం సామాజిక మాధ్యమాల్లో వైరల్‌గా మారింది. సదరు సూపరింటెండెంట్ తనను ఎలా వేధించింది ఆ సంభాషణలో బాధితురాలు వెల్లడించింది.

'సార్.. మీకేమీ అసభ్యంగా అనిపించట్లేదా... ఒక స్టూడెంట్‌తో అలా ఎలా మాట్లాడుతారు. నన్ను కారెక్కించుకుని పక్కకు తీసుకెళ్లాల్సిన అవసరమేంటి... నా వయసు 23... నాకు తెలిసి మీ పిల్లలు కూడా అంతే వయసు ఉండి ఉంటారు... రోజూ డ్యూటీ అయిపోయాక మీకు కాల్ చేయాలా... బయట కలవమని, రెస్టారెంట్లు,బీచ్‌లకు రావాలని ఎలా అడుగుతారు. నా స్థానంలో ఇంకొకరు ఉంటే దీన్ని పెద్ద ఇష్యూ చేసేవాళ్లు.
మా పేరెంట్స్ దూరంగా ఉన్నారు కాబట్టి వాళ్లు టెన్షన్ పడుతారని చెప్పట్లేదు.' అని ఆ వైద్య విద్యార్థిని ఆగ్రహం వ్యక్తం చేశారు.

'ఏసీ లేదని గదికి రమ్మంటారా...?'

'నీ రూమ్‌లో ఏసీ లేదు కదా నా గదికి రా అన్నారు. ఫోన్ నంబర్ బ్లాక్ చేస్తే ఇంకో నంబర్ నుంచి ఫోన్ చేసి వేధిస్తున్నారు. మీ వయసుకు నాతో చెప్పించుకుంటారా... రెండు నెలల నుంచి మీ కారణంగా మానసికంగా కుమిలిపోతున్నాను. ఎప్పుడు అంటారు కదా ఫోన్ చేసి మాట్లాడు మాట్లాడు అని.. అందుకే ఇప్పుడు మాట్లాడుతున్నా. మీరు చేసి చిన్న తప్పు అనుకుంటున్నారా... చాలా డిస్టర్బ్ చేశారు... ఇంకొకరైతే ఇష్టమొచ్చినట్లు మాట్లాడేవారు. అప్పటికీ నేను మర్యాదగానే డీల్ చేశా.' అని బాధితురాలు తన ఆవేదన వ్యక్తం చేశారు.

'సార్ ఇక ఆపేయండి...'

'ఏమన్నారు... నా చేతులు కట్ చేసి... ప్లాస్టర్ వేసి కారులో వేసుకుని వెళ్లిపోతారా... నన్నే కాదు... ఇంకో ఇద్దరు,ముగ్గురిని కూడా మీరిలాగే వేధిస్తున్నారని తెలిసింది. నేనేమైనా రోడ్ సైడ్ రోమియోనా... నన్నెందుకు దూరం పెడుతున్నావని అడిగారు... వాళ్లయినా బెటర్... ఒక కామెంట్ చేసి వెళ్లిపోతారు. సిగ్గుందా అని నిలదీయగలం. కానీ మీ వయసేంటి... కేవలం మంచి దుస్తులు వేసుకున్నంత మాత్రాన డిగ్నిటీ రాదు.

మీ కూతురితో 55-60ఏళ్లు ఉన్న వ్యక్తి ఇలాగే అసభ్యంగా ప్రవర్తిస్తే మీకేమీ అనిపించదా...తీసుకెళ్లి పెళ్లి చేస్తారా... పక్కనవాళ్ల కూతురైతే ఇలా చేస్తారా... పైగా ఇవన్నీ కామన్‌ అని అంటున్నారు... సార్ ఆపేయండి ఇక... నాతోనే కాదు ఎవరితోనూ ఇలా చేయకండి...' అని ఆ వైద్య విద్యార్థిని వాపోయింది. ఆమె మాట్లాడుతున్నంత సేపు... సదరు సూపరింటెండెంట్... అయిపోయింది కదా... నేనేమీ అనట్లేదు కదా.. అంటూ నిర్లక్ష్యంగా బదులివ్వడం గమనార్హం. ఈ ఆడియో టేపు బయటకు రావడంతో సూపరింటెండెంట్‌పై చర్యలు తీసుకోవాలన్న డిమాండ్ బలంగా వినిపిస్తోంది.

Published On June 4, 2021