ఓడిపోతారు: కెసిఆర్‌ను ఏకిపారేసిన శ్రవణ్ కుమార్

హైదరాబాద్: తెలంగాణ రాష్ట్ర సమితి అధ్యక్షులు కల్వకుంట్ల చంద్రశేఖర రావు పైన తెలంగాణ ప్రాంత కాంగ్రెసు పార్టీ నేత దాసోజు శ్రవణ్ కుమార్ సోమవారం నిప్పులు చెరిగారు. కెసిఆర్ గజ్వెల్ నుండి పోటీ చేసి గెలవరన్నారు. ఆయనకు ముఖ్యమంత్రి పదవి తప్ప మరేమీ కనిపించడం లేదన్నారు.

నిరాశ, నిస్పృహలతోనే కెసిఆర్ థర్డ్ ఫ్రంట్ అంటున్నారని ధ్వజమెత్తారు. విశ్వసనీయతకు, విశ్వాస ఘాతుకానికి మధ్య ఈ ఎన్నికలు అన్నారు. కెసిఆర్ ప్రతి దానికి తల నరుక్కుంటానని చెబుతారని ఎద్దేవా చేశారు. కెసిఆర్ నిరాశ, నిస్పృహల్లో ఉన్నారని తీవ్రస్థాయిలో ధ్వజమెత్తారు.

తెరాస అధికారంలోకి వచ్చే అవకాశమే లేదన్నారు. కెసిఆర్‌ను ఏ రాజకీయ పార్టీ కూడా నమ్మదన్నారు. దళితుడిని ముఖ్యమంత్రిని చేస్తానని చెప్పి ఇప్పుడు ఆ ఊసెత్తడం లేదన్నారు. విశ్వసనీయత లేని వ్యక్తి కెసిఆర్ అన్నారు. రెండు శాతం సీట్లు కూడా ముస్లింలకు ఇవ్వని కెసిఆర్ 12 శాతం రిజర్వేషన్ ఇస్తారంటే ఎవరు నమ్ముతారన్నారు.

బిజెపితో సయోధ్య కోసం ఎంతో ప్రయత్నాలు చేసిన కెసిఆర్.. తాను సెక్యులర్ అని చెప్పుకోవడం దారుణమన్నారు. కెసిఆర్‌కు సిఎం పదవి కావాలన్న యావ తప్ప మరొకటి లేదని, తన పదవి, తన పాలన, తన కుటుంబమన్నదే కెసిఆర్ సూత్రమని మండిపడ్డారు.

English summary

Congress leader Shravan Kumar lashed out at TRS chief K Chandrasekhar Rao.