ప్రభుత్వ ఉద్యోగులకు, పెన్షనర్లకు శుభవార్త.. 2 శాతం కరువు భత్వం పెంపు!

కేంద్ర ప్రభుత్వ ఉద్యోగులకు, పెన్షనర్లకు తీపికబురు చెప్పింది. ప్రధాన మంత్రి నరేంద్ర మోదీ నేతృత్వంలోని జరిగి కేంద్ర మంత్రివర్గం కీలక నిర్ణయం తీసుకుంది. ఈ సమావేశంలో కరువు భత్యం (DA) కరువు ఉపశమనం (DR)లను 2 శాతం పెంపును ఆమోదం తెలిపింది. ఈ పెంపు జనవరి 1, 2025 నుండి అమలులోకి వస్తుందని తెలిపింది. ఈ నిర్ణయం వల్ల దేశవ్యాప్తంగా కోటి మందికి పైగా ఉద్యోగులు, పెన్షనర్లు లబ్ధి పొందనున్నారు. పెరుగుతున్న ద్రవ్యోల్బణంతో సతమతమవుతున్న ఈ సమయంలో ఈ పెంపుదల వారికి ఊరటనిస్తుంది.

జీతం, పెన్షన్ ఎంత పెరుగుతుంది?
2 శాతం పెంపుతో కరువు భత్యం 53 శాతం నుండి 55 శాతానికి చేరుకుంటుంది. అదేవిధంగా పెన్షనర్లకు కరువు ఉపశమనం కూడా పెరుగుతుంది. ఒక ఉద్యోగి యొక్క ప్రాథమిక జీతం రూ. 18,000 అయితే, వారికి నెలకు రూ. 360 అదనంగా లభిస్తాయి. అంటే సంవత్సరానికి రూ. 4,320 లబ్ధి చేకూరుతుంది. అలాగే, ఒక పెన్షనర్ యొక్క ప్రాథమిక పెన్షన్ రూ. 9,000 అయితే, వారికి నెలకు రూ. 180 అదనంగా వస్తాయి. ఇది సంవత్సరానికి రూ. 2,160 పెరుగుదలకు సమానం.

ఏప్రిల్ జీతంలో బకాయిలు
ఈ కరువు భత్యం పెంపు జనవరి 1, 2025 నుండి అమలులోకి వస్తుంది కాబట్టి, ఏప్రిల్ నెల జీతంలో ఉద్యోగులకు మూడు నెలల బకాయిలు (జనవరి నుండి మార్చి వరకు) కూడా లభిస్తాయి.
సాధారణంగా ప్రభుత్వం హోలీ , దీపావళి పండుగల ముందు సంవత్సరానికి రెండుసార్లు కరువు భత్యాన్ని ప్రకటిస్తుంది. అయితే ఈసారి పండుగకు ముందు ప్రకటించలేదు. అంతేకాకుండా, ఈసారి పెంపు గత 7 సంవత్సరాలలో అతి తక్కువగా 2 శాతం మాత్రమే ఉంది. జూలై 2018 నుండి ప్రభుత్వం ప్రతిసారీ కనీసం 3% లేదా 4% పెంచుతూ వచ్చింది, కానీ ఈసారి మాత్రం 2% మాత్రమే పెంచింది.

8వ వేతన సంఘం - భవిష్యత్తు DA పెంపుదల
ఇది 8వ వేతన సంఘం ప్రకటన తర్వాత వచ్చిన మొదటి DA పెంపుదల. ప్రభుత్వం 8వ వేతన సంఘాన్ని జనవరి 16, 2025న ఏర్పాటు చేస్తున్నట్లు ప్రకటించింది. ఇది జనవరి 1, 2026 నుండి అమలులోకి వస్తుంది. కొత్త సిఫార్సులు రావడానికి కనీసం ఒక సంవత్సరం పట్టవచ్చు. అంటే, ఈ సంవత్సరం చివరలో దీపావళి సమయంలో రావాల్సిన తదుపరి DA పెంపుదల (జూలై-డిసెంబర్ 2025 కోసం) 7వ వేతన సంఘం కింద చివరిది అవుతుంది.

ప్రభుత్వం ఇప్పుడు అక్టోబర్-నవంబర్ 2025లో జూలై-డిసెంబర్ కాలానికి రెండవ DA పెంపును చేస్తుంది. కానీ 8వ వేతన సంఘం సిఫార్సులు అమలులోకి వచ్చిన తర్వాత, DA ప్రాథమిక జీతంలో విలీనం చేయబడుతుంది, దానితో DA శాతం సున్నా నుండి రీసెట్ అవుతుంది.

ఉద్యోగులకు ఊరట
ప్రస్తుతానికి ఉద్యోగులు పెరిగిన DA , మూడు నెలల బకాయిలను ఏప్రిల్ నెల జీతంలో పొందనున్నారు, ఇది ద్రవ్యోల్బణం నుండి కొంత ఉపశమనాన్ని అందిస్తుంది. ఇప్పుడు అందరి దృష్టి 8వ వేతన సంఘం చుట్టూ ఉన్న పరిణామాలపైనే ఉంది. ప్రభుత్వం కొత్త వేతన సంఘం ప్యానెల్ సభ్యుల పేర్లను ప్రకటించాల్సి ఉంది. ఈ ప్యానెల్ ఒక సంవత్సరంలో కేంద్ర ప్రభుత్వ ఉద్యోగుల జీతాలు , పెన్షన్లను సవరించడానికి సిఫార్సులను కేంద్రానికి సమర్పిస్తుంది.

English summary

Providing some relief to central government employees and pensioners, the government has increased DA by 2 percent. It has said that this increase will be effective from January 1, 2025. This decision will benefit more than one crore employees and pensioners across the country.