అమెరికా టారిఫ్‌లు.. భారత్‌ వృద్ధికి ముప్పుగా మారుతాయా? – ఆర్‌బీఐ హెచ్చరిక

అమెరికా అధ్యక్షుడు డొనాల్డ్‌ ట్రంప్‌ ప్రకటించిన సుంకాల (టారిఫ్‌ల) విధానం ప్రస్తుతం గ్లోబల్‌ వాణిజ్య వ్యవస్థపై తీవ్రమైన ప్రభావాన్ని చూపుతోంది. చైనా లాంటి దేశాలు అమెరికాకు ప్రతిగా సుంకాలు విధిస్తూ గట్టి సమాధానం ఇస్తుంటే, కొన్ని దేశాలు చర్చల బాట పడుతున్నాయి. ఈ పరిణామాలు అంతర్జాతీయంగా మాత్రమే కాక దేశీయంగా కూడా ఆర్థిక ఆందోళనలకు కారణమవుతున్నాయి.

ఇప్పటివరకు ద్రవ్యోల్బణాన్ని ప్రధానంగా లక్ష్యంగా పెట్టుకుని కఠిన మానిటరీ పాలసీకి కట్టుబడి ఉన్న రిజర్వ్ బ్యాంక్ ఆఫ్ ఇండియా (RBI), తాజాగా తీరుగా మారింది. ఇప్పుడు ద్రవ్యోల్బణం కంటే అమెరికా విధించిన సుంకాల వల్ల దేశ వృద్ధిపై పడే ప్రభావం గురించి ఆందోళన వ్యక్తం చేస్తోంది. ఈ నేపథ్యంలోనే, 2025-26 ఆర్థిక సంవత్సరానికి దేశ వృద్ధి అంచనాలను 20 బేసిస్ పాయింట్లు తగ్గించి 6.5 శాతంగా పరిమితం చేసింది.

వృద్ధిపై ముప్పులు
రెపో రేటును 6.25 శాతం నుంచి 6 శాతానికి తగ్గిస్తూ కేంద్ర బ్యాంక్‌ Monetary Policy Committee తీసుకున్న నిర్ణయాలపై మాట్లాడిన RBI గవర్నర్‌ సంజయ్ మల్హోత్రా, "ఇప్పుడు మాకు ద్రవ్యోల్బణం కంటే వృద్ధి పట్ల ఆందోళన ఎక్కువగా ఉంది" అన్నారు. అమెరికా టారిఫ్‌లు, వాణిజ్య యుద్ధం భయాలు, భౌగోళిక అస్థిరతలు వంటి అంశాలు దేశ ఎగుమతులపై, వాణిజ్య కార్యకలాపాలపై ప్రభావం చూపుతాయని పేర్కొన్నారు.

ద్రవ్యోల్బణం స్థిరమే... కానీ జాగ్రత్త అవసరం
ప్రస్తుతం ద్రవ్యోల్బణం లక్షిత స్థాయిలో ఉన్నప్పటికీ, బాహ్య ముప్పుల దృష్ట్యా వృద్ధిపై తీవ్ర ప్రభావం పడే అవకాశం ఉందని మల్హోత్రా అభిప్రాయపడ్డారు. "ప్రపంచ వ్యాప్తంగా వాణిజ్యంలో ఇంకా అడ్డంకులు పెరుగుతుంటే, భారత్‌ వృద్ధి మార్గంలో ఆటంకాలు తలెత్తుతాయి" అని ఆందోళన వ్యక్తం చేశారు.

రూపాయి విలువపై భరోసా
డాలరుతో రూపాయి మారకం విలువపై కూడా మల్హోత్రా స్పందించారు. "ఇతర దేశాల కరెన్సీలతో పోలిస్తే మన రూపాయి స్థిరంగా కొనసాగుతోంది. ఇకపై మరింత ఒత్తిడికి తావుంటే, RBI వద్ద తగిన విదేశీ మారకం నిల్వలున్నాయి. అవసరమైతే వాటిని వినియోగించేందుకు సిద్ధంగా ఉన్నాం" అన్నారు.

వాణిజ్య యుద్ధ భయాలు, అమెరికా సుంకాల పెంపు వంటివి భారత ఆర్థిక వ్యవస్థ ముందు సవాళ్లుగా మారుతున్నాయి. వృద్ధికి ముప్పుగా మారే ఈ పరిణామాలపై RBI అప్రమత్తంగా ఉండటంతో పాటు, ప్రభుత్వంతో కలసి ముందుకెళ్లే వ్యూహాన్ని రూపొందిస్తోంది. వృద్ధి-స్థిరత్వం మధ్య సమతౌల్యం కాపాడే ప్రయత్నమే ప్రస్తుతం కేంద్ర బ్యాంక్ ధ్యేయంగా పెట్టుకున్నది.

English summary

Speaking on the central bank's Monetary Policy Committee's decision to cut the repo rate from 6.25 percent to 6 percent, RBI Governor Sanjay Malhotra said, "We are more concerned about growth than inflation now." He said that factors like US tariffs, trade war fears and geopolitical instability will affect the country's exports and trade activities.