2004 సునామీకి 21 ఏళ్లు: ఆ బ్లాక్ సండే..మరువలేని జల ప్రళయం!
అది ఒక ఆదివారం ఉదయం. క్రిస్మస్ సంబరాల మరుసటి రోజు కావడంతో అందరూ సెలవు మూడ్లో ఉన్నారు. తీర ప్రాంతాల్లో మత్స్యకారులు వేటకు వెళ్తుంటే, పర్యాటకులు సముద్ర అందాలను చూస్తూ మురిసిపోతున్నారు. కానీ, సరిగ్గా ఉదయం 8:00 గంటల సమయంలో ఇండోనేషియాలోని సుమత్రా ద్వీపంలో సంభవించిన 9.1 తీవ్రత కలిగిన భూకంపం.. భూగోళాన్ని గడగడలాడించింది. నిమిషాల వ్యవధిలోనే శాంతంగా ఉండే సముద్రం 'రాకాసి'గా మారింది.
14 దేశాలు.. లక్షలాది ప్రాణాలు
ఈ సునామీ ధాటికి కేవలం భారతదేశమే కాదు, శ్రీలంక, థాయ్లాండ్, ఇండోనేషియా సహా మొత్తం 14 దేశాలు అల్లాడిపోయాయి. ప్రపంచవ్యాప్తంగా సుమారు 2,30,000 మంది కడలి గర్భంలో కలిసిపోయారు. బుల్లెట్ రైలు కంటే వేగంగా దూసుకొచ్చిన రాకాసి అలలు నిమిషాల వ్యవధిలోనే జనవాసాలను స్మశానాలుగా మార్చేశాయి.
భారత్లో మృత్యుఘోష
- మన దేశంలో ముఖ్యంగా తమిళనాడు, ఆంధ్రప్రదేశ్, కేరళ మరియు అండమాన్ నికోబార్ దీవులు అతలాకుతలమయ్యాయి.
- ఒక్క భారత్లోనే దాదాపు 16,000 మంది ప్రాణాలు కోల్పోయారు.
- ఆంధ్రప్రదేశ్లోని కృష్ణా, ప్రకాశం, నెల్లూరు జిల్లాల్లోని 301 గ్రామాలు జలమయమయ్యాయి.
- సుమారు 105 మంది మన రాష్ట్రంలో కన్నుమూశారు. తీరానికి సరదాగా వెళ్లిన పర్యాటకులు, ఉపాధి కోసం వేటకు వెళ్లిన గంగపుత్రులు విగతజీవులయ్యారు.
నేటికీ ఆరని గాయాలు
సునామీకి 21 ఏళ్లు గడిచినా, కన్నబిడ్డలను కోల్పోయిన తల్లిదండ్రులు, తల్లిదండ్రులను కోల్పోయిన అనాథలు, సర్వం కోల్పోయిన కుటుంబాల కళ్లలో నీరు ఆరలేదు. "సముద్రం ముందుకు వస్తుంటే ఏదో వింత అనుకున్నాం.. కానీ అది మా జీవితాలనే తీసుకెళ్తుందని ఊహించలేదు" అని ఇప్పటికీ బాధితులు కన్నీరు పెట్టుకుంటారు.
నేర్చుకున్న పాఠం
ఆనాడు సునామీ హెచ్చరిక వ్యవస్థలు లేకపోవడం వల్ల భారీ నష్టం జరిగింది. ఈ చేదు అనుభవం తర్వాతే భారత్ 'సునామీ వార్నింగ్ సెంటర్'ను ఏర్పాటు చేసి సాంకేతికంగా బలపడింది. ప్రకృతి కన్నెర్ర చేస్తే మానవుడు ఎంత అల్పుడో 2004 సునామీ ఎప్పటికీ గుర్తుచేస్తూనే ఉంటుంది. ఆ ప్రళయంలో ప్రాణాలు కోల్పోయిన ఆత్మలకు నివాళులర్పిద్దాం.
Click it and Unblock the Notifications
Sign in with Google