గాలిలో ఉండగానే బాంబు భయం.. 238 మంది ప్రయాణికుల ప్రాణాలు అరచేతిలో!

Bomb Threat: ఢిల్లీ నుంచి బాగ్డోగ్రా వెళ్తున్న ఇండిగో (6E 6650) విమానంలో బాంబు ఉన్నట్లు వచ్చిన బెదిరింపుతో ఆదివారం ఉదయం పెను కలకలం రేగింది. ప్రయాణీకులు ఒక్కసారిగా భయాందోళనకు గురయ్యారు. విమానం గాలిలో ఉండగానే టాయిలెట్‌లో లభించిన ఒక టిష్యూ పేపర్ నోట్ కారణంగా ఈ కలకలం రేగింది. దీంతో విమానాన్ని అత్యవసరంగా లక్నో విమానాశ్రయానికి మళ్లించి ల్యాండింగ్ చేశారు.

అసలేం జరిగిందంటే?
ఆదివారం ఉదయం ఢిల్లీ నుంచి బయలుదేరిన ఈ విమానం బాగ్డోగ్రా వెళ్లాల్సి ఉంది. అయితే ఉదయం 8:46 గంటల ప్రాంతంలో విమానంలోని టాయిలెట్‌లో సిబ్బందికి ఒక టిష్యూ పేపర్ కనిపించింది. దానిపై "విమానంలో బాంబు ఉంది" అని చేతితో రాసి ఉంది. వెంటనే పైలట్లు ఎయిర్ ట్రాఫిక్ కంట్రోల్ (ATC)కి సమాచారం అందించారు. సమాచారం అందిన వెంటనే అప్రమత్తమైన అధికారులు, ఉదయం 9:17 గంటలకు లక్నో విమానాశ్రయంలో విమానాన్ని సేఫ్‌గా ల్యాండింగ్ చేయించారు. విమానాన్ని వెంటనే విమానాశ్రయంలోని 'ఐసోలేషన్ బే'కి తరలించారు. భద్రతా బలగాలు, బాంబు నిర్వీర్య దళం (BDDS), సీఐఎస్ఎఫ్ అధికారులు రంగంలోకి దిగి తనిఖీలు చేపట్టారు.
ప్రయాణికులందరినీ విమానం నుంచి ఖాళీ చేయించి, వారిని మరియు వారి లగేజీని స్కానింగ్ చేశారు. విమానాశ్రయం అంతటా కూడా విస్తృతమైన తనిఖీలు నిర్వహించారు.

ప్రయాణికుల వివరాలు
ఆ సమయంలో విమానంలో మొత్తం 238 మంది ఉన్నారని తెలిసింది. ఇందులో 230 మంది ప్రయాణీకులు (222 మంది పెద్దలు, 8 మంది పిల్లలు), ఇద్దరు పైలట్లు, ఆరుగురు క్యాబిన్ క్రూ సభ్యులు ఉన్నారు. ప్రయాణికులందరినీ సురక్షితంగా కిందకు దించారు.

పోలీసుల వివరణ
అసిస్టెంట్ పోలీస్ కమిషనర్ రజనీష్ వర్మ తెలిపిన వివరాల ప్రకారం.. టిష్యూ పేపర్‌పై ఉన్న రాత ఆధారంగా ఈ బెదిరింపు వచ్చింది. దీని వెనుక ఉన్న వ్యక్తిని గుర్తించేందుకు అధికారులు విచారణ జరుపుతున్నారు. ప్రోటోకాల్ ప్రకారం అన్ని భద్రతా తనిఖీలు పూర్తి చేసిన తర్వాతే విమానాన్ని తిరిగి అనుమతిస్తామని ఇండిగో ఎయిర్‌లైన్స్ ఒక ప్రకటనలో తెలిపింది.

ఇండిగో స్పందన
"మా ప్రయాణికులు, సిబ్బంది భద్రతే మా మొదటి ప్రాధాన్యత. భద్రతా తనిఖీల విషయంలో అధికారులకు పూర్తి సహకారం అందిస్తున్నాము. ప్రయాణికులకు కలిగిన అసౌకర్యాన్ని తగ్గించడానికి అల్పాహారం, ఎప్పటికప్పుడు అప్‌డేట్స్ అందిస్తున్నాము," అని ఇండిగో అధికార ప్రతినిధి ఓ ప్రకటనలో తెలిపారు.

English summary

Panic erupted after a bomb threat was found on an IndiGo Delhi–Bagdogra flight mid-air. The aircraft carrying 238 people made an emergency landing in Lucknow; all passengers are safe.