నేటి నుంచి శీతలపానీయాలు పెప్సీ, కోక్ బంద్

తమిళనాడు వ్యాపారులు బుధవారం నుంచి రాష్ట్ర వ్యాప్తంగా ఉన్న వేలాది షాపుల్లో పెప్సీ, కోక్ లను బహిష్కరించారు.

చెన్నై: టాప్ సాఫ్ట్ డ్రింక్ కంపెనీలు పెప్సీ, కోక్ లకు తమిళనాడు వ్యాపారులు షాక్ ఇచ్చారు. బుధవారం నుంచి రాష్ట్ర వ్యాప్తంగా ఉన్న వేలాది షాపుల్లో పెప్సీ, కోక్ లను బహిష్కరించారు. స్థానిక తయారీదారులను ప్రోత్సహించాలన్న ఉద్దేశంతో వాళ్లు ఈ నిర్ణయం తీసుకున్నారు.

దీంతో పెప్సీ, కోక్ లకు రూ.1400 కోట్ల మేర నష్టం వాటిల్లనుంది. రాష్ట్రంలోని అతిపెద్ద వాణిజ్య సంఘం తమిళనాడు వానిగర్ సంగమ్ ఈ పెప్సీ, కోక్ లను బహిష్కరిస్తున్నట్లు ప్రకటించింది.

ఈ సంఘంలో ఆరు వేలకుపైగా చిన్న, మధ్య తరహా దుకాణాలు, 15 లక్షలకుపైగా సభ్యులు ఉన్నారు. చిన్న చిన్న దుకాణాలలోనూ ఇక నుంచి ఈ శీతలపానీయాలు అమ్మబోరని ఆ సంఘం స్పష్టం చేసింది.

పెద్ద పెద్ద సూపర్ మార్కెట్లు, రెస్టారెంట్లు కొంత సమయం కావాలని అడిగినా.. తాము అంగీకరించలేదని, బుధవారం సాయంత్రం దీనిపై సమావేశం కాబోతున్నామని ఆ సంఘం వెల్లడించింది.

గత జనవరి నెలలో జల్లికట్టు కోసం జరిగిన ఉద్యమం సందర్భంగా వాణిజ్య సంఘాలు ఈ నిర్ణయం తీసుకున్నాయి. బహుళజాతి కంపెనీలు తయారు చేసే శీతలపానీయాల వల్ల స్థానిక తయారీదారులు తీవ్రంగా నష్టపోతున్నారని తమిళనాడు వానిగర్ సంగమ్ కార్యదర్శి కె.మోహన్ పేర్కొన్నారు.

ఈ విదేశీ సంస్థలు విలువైన నీటి సంపదను కూడా దోచుకుంటున్నాయని, రాష్ట్రం కరువు పరిస్థితులు ఎదుర్కొంటున్న తరుణంలో బహుళ జాతి కంపెనీలు శీతలపానీయాల తయారీ పేరుతో నీటిని దోచుకోవడాన్ని అడ్డుకోవాల్సిన అవసరం ఉందని ఆయన చెప్పారు.

English summary

Prominent traders' association in Tamil Nadu have declared a ban on multinational drink brands like coca-cola and Pepsi starting Wednesday. The associations want to go 'desi' by boycotting Coke and Pepsi and choosing to sell desi products instead. The ban is, however, unlikely to be complete since supermarkets are have not extended support to the boycott.It may be noted that boycotting the two cola brands was proposed during the Jallikattu protests at Marina beach.