శివాంగి గర్జన: నాలుగు గంభీర చీతాల ల్యాండింగ్!
కర్ణాటక వన్యప్రాణుల సంరక్షణ చరిత్రలో ఒక నూతన అధ్యాయం మొదలైంది. ఒకప్పుడు భారతీయ అడవుల్లో గంభీరంగా సంచరించి, కాలక్రమేణా కనుమరుగైన చీతాలు మళ్లీ కన్నడ నాట అడుగుపెట్టాయి. దక్షిణాఫ్రికా నుంచి దిగుమతి చేసుకున్న నాలుగు చీతాలు శనివారం (ఏప్రిల్ 18, 2026) సాయంత్రం 4:47 గంటలకు కెంపేగౌడ అంతర్జాతీయ విమానాశ్రయానికి చేరుకున్నాయి. వీటి రాకతో బన్నెరఘట్ట బయోలాజికల్ పార్కుకు సరికొత్త కళ రానుంది.
ఈ అరుదైన అతిథులకు స్వాగతం పలికేందుకు కర్ణాటక అటవీ, పర్యావరణ శాఖ మంత్రి ఈశ్వర్ బి. ఖండ్రే స్వయంగా విమానాశ్రయానికి చేరుకున్నారు. కల్బుర్గి నుంచి హైదరాబాద్ మీదుగా ప్రయాణించి వచ్చిన ఆయన, చీతాల ప్రవేశ ప్రక్రియను దగ్గరుండి పర్యవేక్షించారు. విమానాశ్రయంలోని కార్గో విభాగంలో అన్ని తనిఖీలు పూర్తి చేసిన అనంతరం, భారీ భద్రత మధ్య వీటిని బన్నెరఘట్ట పార్కుకు తరలించారు. స్థానికంగా 'శివాంగి'లుగా పిలవబడే ఈ చీతాల రాక రాష్ట్ర పర్యాటక రంగానికి పెద్ద ఊతం ఇస్తుందని మంత్రి ఆశాభావం వ్యక్తం చేశారు.
30 రోజుల పాటు 'కఠిన క్వారంటైన్'..
వేరే ఖండం నుంచి, భిన్నమైన వాతావరణం నుంచి వచ్చినందున ఈ చీతాల ఆరోగ్యంపై అధికారులు ప్రత్యేక దృష్టి సారించారు. నిబంధనల ప్రకారం, వీటిని కనీసం 30 రోజుల పాటు కఠినమైన క్వారంటైన్లో ఉంచుతారు. ఈ కాలంలో పశువైద్య నిపుణుల బృందం వీటి ప్రవర్తన, ఆహారపు అలవాట్లు మరియు స్థానిక వాతావరణానికి అవి ఎలా స్పందిస్తున్నాయనే అంశాలను నిశితంగా పరిశీలిస్తుంది. అంటువ్యాధులు సోకకుండా, ఎలాంటి ఒత్తిడికి లోనవ్వకుండా నియంత్రిత ఆహారాన్ని అందించాలని అటవీ శాఖ అధికారులకు ఆదేశాలు జారీ అయ్యాయి.
పర్యాటకానికే కాదు.. జీవవైవిధ్యానికి వరం..
"ఒకప్పుడు మన అడవుల్లో స్వేచ్ఛగా తిరిగిన ఈ అద్భుతమైన జంతువులు ప్రస్తుతం అడవిలో ఎక్కడా లేవు" అని మంత్రి ఈశ్వర్ ఖండ్రే గుర్తు చేశారు. జంతు ప్రదర్శనశాలల ద్వారా వీటిని మళ్లీ ప్రజలకు పరిచయం చేయడం వల్ల, అంతరించిపోతున్న జాతుల పట్ల అవగాహన పెరుగుతుందని ఆయన పేర్కొన్నారు. బన్నెరఘట్ట పార్కులో చీతాల రాకతో పర్యాటకుల సంఖ్య భారీగా పెరుగుతుందని, తద్వారా పర్యాటక ఆదాయం పెరగడమే కాకుండా వన్యప్రాణి విద్యలో ఇదొక కీలక మైలురాయిగా నిలుస్తుందని అధికారులు భావిస్తున్నారు.
భవిష్యత్తుపై ఆశలు..
బెంగళూరు వాతావరణానికి ఈ చీతాలు ఎంత త్వరగా అలవాటు పడతాయో అనే దానిపైనే ఈ ప్రాజెక్టు విజయం ఆధారపడి ఉంటుంది. దక్షిణాఫ్రికా చీతాల రాక విజయవంతమైతే, ఇది దేశవ్యాప్తంగా వన్యప్రాణుల సంరక్షణకు మరియు అంతరించిపోతున్న జాతుల పునరుద్ధరణకు ఒక గొప్ప నమూనాగా నిలుస్తుంది. ప్రస్తుతానికి ఈ విదేశీ అతిథుల కోసం బన్నెరఘట్టలో అన్ని ఏర్పాట్లు సిద్ధమయ్యాయి, ఇక పర్యాటకులు వీటిని సందర్శించడమే తరువాయి!
Click it and Unblock the Notifications
Sign in with Google