చార్ ధామ్ యాత్ర‌కు పొటెత్తిన భక్తులు.. గ‌త ఏడాదికంటే ఎక్కువే!

ఉత్త‌రాఖండ్‌లోని ప్ర‌సిద్ధిచెందిన చార్ ధామ్ యాత్ర ఈ నెల‌10న ప్రారంభమైంది. చార్‌ధామ్ యాత్ర‌లో భాగంగా ఉత్త‌రాఖండ్‌లోని ప్ర‌సిద్ధ పుణ్య‌క్షేత్రాలైన యమునోత్రి, గంగోత్రి, కేదార్ నాథ్, బద్రీనాథ్ లను ద‌ర్శ‌నం ఉంటుంది. అయితే, ఈఏడాది ప్రారంభ‌మైన ఇర‌వై రోజుల్లోనే చార్ ధామ్ యాత్ర‌కు భ‌క్తులు పొటెత్తారు. గత సంవత్సరంతో పోలిస్తే ఈ ఏడాది చార్ ధామ్ యాత్రకు వస్తున్న భక్తుల సంఖ్య భారీగా పెరిగిన‌ట్లు అక్క‌డి అధికారులు తెలిపారు.

ఇక‌, ఈ ఏడాది చార్ ధామ్ యాత్ర అక్షయ తృతియ రోజున ప్రారంభ‌మైన సంగ‌తి తెలిసిందే. ఈ యాత్ర ప్రారంభమైన మొదటి 15 రోజుల్లోనే యమునోత్రి, గంగోత్రి ధామ్ లకు రికార్డు స్థాయిలో భక్తులు తరలివచ్చిన‌ట్లు ఉత్త‌రాఖండ్ అధికారులు పేర్కొన్నారు. ఇక‌, ఈ శుక్రవారం నాడు ఒక్క‌రోజే యమునోత్రి ధామ్ ను 9,812 మంది యాత్రికులు సంద‌ర్శించ‌గా, గంగోత్రి ధామ్ ను 13,602 మంది దర్శించుకున్న‌ట్లు తెలిపారు. ఇక‌, ఈ ఏడాది ఈ రెండు పుణ్యక్షేత్రాలను సందర్శించిన వారి సంఖ్య గ‌త ఏడాదితో పోలిస్తే 3,63,537కి చేరిన‌ట్లు అధికారులు వివ‌రించారు.

భ‌క్తుల ర‌ద్దీని దృష్టిలో ఉంచుకుని అధికారులు ఇక్క‌డ త‌గు ఏర్పాట్లు చేస్తున్న‌ట్లు తెలుస్తోంది. గ‌త ఏడాది ఇదే స‌మ‌యంలో 1,97,413 మంది భక్తులు ఈ యాత్రలో పాల్గొన్నారు. 2022లో 2,22,852 మంది యాత్రికులు చార్ ధామ్ యాత్ర‌కు వచ్చారు. ఈ ఏడాది ఆ సంఖ్య మ‌రింత పెరిగింది. ఈ యాత్రకు వెళ్లాల‌నుకునేవారు ముందుగానే రిజిస్ట్రేషన్ చేసుకోవాల్సి ఉంటుంది.

రిజిస్ట్రేషన్ చేసుకోని వారికి ఈ యాత్రలో పాల్గొనే అవకాశం ఉండ‌దు. రిజిస్ట్రేష‌న్‌ ఆన్ లైన్, ఆఫ్ లైన్ విధానాల్లో అందుబాటులో ఉంటుంది. రిజిస్ట్రేషన్ చేసుకోవడం వల్ల యాత్రికులను పరిమిత సంఖ్యలో యాత్ర‌కు అనుమతించడానికి వీలవుతుందని, వారికి సరైన సౌకర్యాలు కల్పించ‌గ‌లిగే అవకాశం ఉంటుంద‌నే ఉద్దేశ్యంతో ఈ నిర్ణ‌యం తీసుకున్న‌ట్లు అధికారులు తెలిపారు.

English summary

The famous Char Dham Yatra in Uttarakhand started on 10th of this month. As part of the Chardham Yatra, you will visit the famous shrines of Uttarakhand such as Yamunotri, Gangotri, Kedarnath and Badrinath. However, within twenty days of the beginning of this year, devotees flocked to the Char Dham Yatra