విధుల్లో ఉన్న పోలీసులే టార్గెట్: ఏఎస్సై, హోంగార్డ్ దారుణ హత్య!

పంజాబ్ రాష్ట్రంలోని సరిహద్దు జిల్లా గుర్దాస్‌పూర్‌లో అర్ధరాత్రి జరిగిన ఘోర ఉదంతం దేశవ్యాప్తంగా సంచలనం సృష్టిస్తోంది. విధుల్లో ఉన్న ఇద్దరు పోలీసులను గుర్తు తెలియని దుండగులు కాల్చి చంపడం తీవ్ర కలకలం రేపుతోంది. సరిహద్దులకు అతి సమీపంలో ఈ ఘటన జరగడంతో దీని వెనుక గ్యాంగ్‌స్టర్లు లేదా ఉగ్రవాదుల కుట్ర ఉండవచ్చనే అనుమానాలు వ్యక్తమవుతున్నాయి. పంజాబ్ పోలీసులు ఈ కేసును అత్యంత ప్రతిష్టాత్మకంగా తీసుకుని లోతుగా దర్యాప్తును చేపట్టారు.

అర్ధరాత్రి ఏం జరిగిందంటే?
సరిహద్దు పట్టణమైన దొరంగ్లా పోలీస్ స్టేషన్ పరిధిలోని 'అదియా' గ్రామంలో ఉన్న ఓ పోలీస్ అవుట్‌పోస్ట్ వద్ద ఈ ఘటన జరిగింది. ఫిబ్రవరి 22, ఆదివారం తెల్లవారుజామున సుమారు ఒంటి గంట సమయంలో ఏఎస్సై (ASI) గుర్నామ్ సింగ్, హోంగార్డ్ అశోక్ కుమార్‌లపై కాల్పులు జరిగాయి. వారిద్దరూ పోలీస్ చెక్‌పోస్టు వద్ద ఉన్న గదిలో రక్తపు మడుగులో మరణించి ఉన్నట్లు అధికారులు గుర్తించారు. అయితే ఆ సమయంలో అక్కడ ఏం జరిగింది? కాల్పులు జరిపింది ఒక్కరా లేక బృందంగా వచ్చారా? అనే విషయాలపై ప్రస్తుతానికి స్పష్టత లేదు.

పరిశీలనలో కీలక అంశాలు
ఘటన తెలిసిన వెంటనే గుర్దాస్‌పూర్ ఎస్ఎస్పీ ఆదిత్య శర్మ, ఫోరెన్సిక్ బృందాలతో కలిసి ఘటనా స్థలానికి చేరుకుని ప్రాథమిక ఆధారాలను సేకరించారు. సరిహద్దు ప్రాంతం కావడంతో బీఎస్ఎఫ్ (BSF) డీఐజీ జె.కె. విర్దీ కూడా అక్కడికి వచ్చి భద్రతా పరిస్థితులను సమీక్షించారు. అధికారులు గదిని పరిశీలించగా.. మరణించిన పోలీసుల సర్వీస్ రివాల్వర్లు అక్కడే లభ్యమయ్యాయి. దీనిని బట్టి చూస్తే, దుండగులు ఆయుధాల కోసం కాకుండా, కేవలం ప్రాణాలు తీయడమే లక్ష్యంగా దాడికి పాల్పడినట్లు అర్థమవుతోంది. ఇంటెలిజెన్స్ అధికారులు మృతుల మొబైల్ ఫోన్లను స్వాధీనం చేసుకుని.. వారు చివరిగా ఎవరితో మాట్లాడారు? అనే వివరాల కోసం కాల్ డేటాను విశ్లేషిస్తున్నారు.

ప్రభుత్వంపై విపక్షాల విమర్శలు
ఈ జంట హత్యల ఉదంతం పంజాబ్‌లో రాజకీయ దుమారం రేపుతోంది. రాష్ట్రంలో శాంతిభద్రతలు పూర్తిగా క్షీణించాయని, సామాన్యులకే కాకుండా రక్షణ కల్పించే పోలీసులకే భద్రత లేదని కాంగ్రెస్ పార్టీ ఆరోపిస్తోంది. పంజాబ్ కాంగ్రెస్ అధ్యక్షుడు అమరీందర్ సింగ్ రాజా వారింగ్ స్పందిస్తూ.. "రక్షణ కల్పించే పోలీసులపైనే దాడులు జరగడం అత్యంత ఆందోళనకరం. ఇది రాష్ట్ర భద్రతకు గొడ్డలిపెట్టు. రాష్ట్ర, కేంద్ర ప్రభుత్వాలు వెంటనే స్పందించి, ఈ ఘటనపై ఉమ్మడి విచారణ జరిపి దోషులను కఠినంగా శిక్షించాలి" అని డిమాండ్ చేశారు.

గ్యాంగ్‌స్టర్ లేదా ఉగ్రవాద కుట్ర?
సరిహద్దులకు దగ్గరగా ఉండటం, గతంలో గుర్దాస్‌పూర్ కేంద్రంగా గ్రెనేడ్ దాడులు జరిగిన నేపథ్యం ఉండటంతో, పోలీసులు ఉగ్రవాద కోణాన్ని తోసిపుచ్చడం లేదు. సరిహద్దు దాటి వచ్చిన ఉగ్రవాదులే ఈ ఘాతుకానికి పాల్పడ్డారా? లేక స్థానిక గ్యాంగ్‌స్టర్లతో చేతులు కలిపి ఈ కుట్ర పన్నారా? అనే కోణంలో దర్యాప్తు సాగుతోంది. గ్యాంగ్‌స్టర్ల ప్రమేయంపై కూడా దృష్టి సారించిన పోలీసులు, ఈ ప్రాంతంలోని పాత నేరస్తుల రికార్డులను కూడా పరిశీలిస్తున్నారు. ప్రస్తుతానికి మృతదేహాలను పోస్ట్‌మార్టం నిమిత్తం గుర్దాస్‌పూర్ సివిల్ ఆస్పత్రికి తరలించారు.

English summary

Gurdaspur Police Killing, Two police officers, an ASI and a Home Guard, were found shot dead at a checkpost in Gurdaspur, Punjab. Police are investigating potential terrorist or gangster involvement in the attack.