తల్లి అందుకు ఒప్పుకోలేదని బిడ్డ కిడ్నాప్!

తన పెళ్లి ప్రతిపాదనను తిరస్కరించిన ఓ మహిళపై కోపంతో రగిలిపోయిన ఓ యువకుడు.. ఆమె నాలుగేళ్ల కుమారుడిని కిడ్నాప్ చేశాడు. ఉత్తరప్రదేశ్‌లో సంచలనం సృష్టించిన ఈ ఘటనపై పోలీసులు వేగంగా స్పందించి.. కిడ్నాప్ జరిగిన 8 గంటల్లోనే నిందితుడిని లక్నో రైల్వేస్టేషన్లో అరెస్ట్ చేశారు.

కిడ్నాప్‌కు పాల్పడిన పూల వ్యాపారి
యూపీలోని అయోధ్యకు చెందిన సుధాకర్ సింగ్(24) అనే పూల వ్యాపారి ఈ కిడ్నాప్‌కు పాల్పడ్డాడు. ఈ సంఘటన అక్టోబర్ 12న(ఆదివారం) జరిగింది. బాలుడు తన ఇంటి ముందు ఆడుకుంటుండగా నిందితుడు సుధాకర్ సింగ్ అతడిని కిడ్నాప్ చేసి తీసుకెళ్లాడు. కిడ్నాప్ అనంతరం నిందితుడు ఆ బాలుడితో కలిసి సుహైల్‌దేవ్ ఎక్స్‌ప్రెస్ రైలులో ప్రయాణిస్తుండగా.. లక్నో రైల్వే స్టేషన్‌లో పోలీసులు అతడిని అడ్డుకుని అరెస్ట్ చేశారు.

ఓ ఏడాది పరిచయం.. పెళ్లి తిరస్కరణ
ఈ కేసు దర్యాప్తులో అనేక ఆసక్తికర విషయాలు వెల్లడయ్యాయి. బాలుడి తల్లి సుమారు ఒక సంవత్సరం పాటు సుధాకర్ సింగ్‌తో సోషల్ మీడియా ద్వారా పరిచయంలో ఉన్నట్లు దర్యాప్తులో తేలింది. సౌత్ ఈస్ట్ డీసీపీ హేమంత్ తివారీ అందించిన వివరాల ప్రకారం.. సుధాకర్ సింగ్ ఆ మహిళను పెళ్లి చేసుకోవాలని పదేపదే కోరాడు. ఆమె అతని ప్రతిపాదనను తిరస్కరించడంతో ఆమె తనతో ఉండటానికి నిరాకరిస్తే కొడుకును అపహరిస్తానని నిందితుడు ముందే బెదిరించాడు.

పోలీసుల వేట: 8 గంటల్లో అరెస్ట్
కిడ్నాప్ జరిగిన రోజు (ఆదివారం) ఒంటి గంటకు బాలుడి తండ్రి నిందితుడు సుధాకర్ సింగ్‌ను తమ ఇంటి సమీపంలో చూశారు. కానీ అతడు వెంటనే అక్కడి నుంచి పారిపోయాడు. మధ్యాహ్నం 4:30 గంటలకు తమ కుమారుడు కనిపించడం లేదని, సుధాకర్ సింగ్ కిడ్నాప్ చేసి ఉంటాడని తాను అనుమానిస్తున్నట్లు మహిళ తన భర్తకు తెలియజేసింది. ఈ సమాచారం ఆధారంగా అమర్ కాలనీ పోలీస్ స్టేషన్‌లో పీసీఆర్ కాల్ అందింది. భారతీయ న్యాయ సంహితలోని సంబంధిత సెక్షన్ల కింద కేసు నమోదు చేయబడింది.

పోలీసులు సాంకేతిక నిఘా, మాన్యువల్ ఇంటెలిజెన్స్ పద్ధతులను ఉపయోగించి నిందితుడి కదలికలను ట్రాక్ చేశారు. సంఘటన జరిగిన 8 గంటల్లోనే లక్నో రైల్వే స్టేషన్‌లో సుధాకర్ సింగ్‌ను పట్టుకుని, బాలుడిని సురక్షితంగా రక్షించారు.పోలీసుల విచారణలో బాలుడి తల్లిని వివాహం చేసుకోవడానికి ఒత్తిడి తెచ్చేందుకే తాను ఈ దారుణానికి ఒడిగట్టానని సుధాకర్ సింగ్ నేరాన్ని అంగీకరించాడు.

English summary

In a shocking incident in Uttar Pradesh, a man kidnapped a 4-year-old boy after the mother rejected his marriage proposal. Police rescued the child within 8 hours.