మరణానికి ఆతిథ్యం ఇచ్చే హోటల్: ఆధ్యాత్మిక నగరంలో అంతిమ ప్రయాణం

ప్రపంచంలో ఎన్నో పురాతన నగరాలు ఉన్నాయి.. కానీ ముక్తిని ప్రసాదించే మహానగరం మాత్రం ఒక్క వారణాసి మాత్రమే! విశ్వేశ్వరుడిపై నమ్మకం, కాలప్రవాహంలోనూ చెక్కుచెదరని సనాతన సంస్కృతి, జీవనది గంగమ్మ పవిత్ర ధారలు.. ఇవన్నీ వారణాసిని ఈ భూమిపై అత్యంత ఆధ్యాత్మిక ప్రదేశంగా మార్చాయి. సాధారణంగా మనుషులు సుఖసంతోషాలు, ప్రశాంతత కోసం విహారయాత్రలకు వెళ్తుంటారు. కానీ, జనన మరణాల చక్రం నుంచి శాశ్వత విముక్తి పొంది, ఆ పరమశివుడి పాదాల వద్ద ప్రాణాలు వదిలి మోక్షం సాధించడానికి కాశీకి వచ్చే వారి కథలు సరికొత్త ఆధ్యాత్మిక లోకానికి దారితీస్తాయి. ఈ అంతిమ ప్రార్థనకు ప్రత్యక్ష సాక్ష్యంగా నిలుస్తోంది కాశీలోని అరుదైన నివాసం 'ముక్తి భవన్'.

హిందూ విశ్వాసాల ప్రకారం వారణాసి కేవలం ఒక ఆధ్యాత్మిక క్షేత్రం మాత్రమే కాదు.. అది ఆత్మకు శాశ్వత విముక్తిని ప్రసాదించే దివ్య క్షేత్రం. కాశీ భూమిపై ప్రాణాలు విడిస్తే పునర్జన్మ అనే బంధాల నుంచి విముక్తి లభిస్తుందని, గంగానది తీరాన విడిచే చివరి శ్వాస సమస్త పాపాలను ప్రక్షాళన చేస్తుందని కోట్లాది మంది నమ్ముతారు. పూర్వకాలంలో వృద్ధులు 'కాశీ యాత్రకు వెళ్తున్నాం' అని చెబితే, తమ లౌకిక జీవితాన్ని ముగించి మోక్షం వైపే అడుగులు వేస్తున్నారని అర్థం. సరిగ్గా అదే ప్రాచీన సంప్రదాయానికి ప్రతీకగా నిలుస్తూ, తమ చివరి ఘడియల్లో ఇళ్లను, అనుబంధాలను వదిలివచ్చే వృద్ధులకు ఈ ముక్తి భవన్ ఆశ్రయాన్ని ఇస్తోంది.

కఠిన నిబంధనలు.. 14 రోజుల గడువు

విచిత్రంగా అనిపించినా, ఈ భవనంలో బస చేయడానికి అత్యంత కఠినమైన నిబంధనలు ఉంటాయి. ఇది సాధారణ హోటల్ కాదు.. అలాగే ఇక్కడ ఎలాంటి హత్యలకు, ఆత్మహత్యలకు తావులేదు. కేవలం ఆయుష్షు ముగింపునకు వచ్చి, మరణానికి అత్యంత సమీపంలో ఉన్న వృద్ధులకు లేదా తీవ్ర అనారోగ్యంతో ఉన్నవారికి మాత్రమే ఇక్కడ గదులు కేటాయిస్తారు. భవనంలో కేవలం 12 గదులు మాత్రమే ఉంటాయి. ఇక్కడికి వచ్చిన వారికి గరిష్టంగా రెండు వారాలు మాత్రమే బస చేసేందుకు అనుమతి ఉంటుంది. ఒకవేళ ఆ 14 రోజుల్లో శ్వాస ఆగకపోతే, మోక్షం కోసం నిరీక్షిస్తున్న మరొకరికి అవకాశం కల్పిస్తూ ఆ రూమ్‌ను ఖాళీ చేసి వెళ్లాల్సి ఉంటుంది.

మంత్రోచ్ఛారణల నడుమ ప్రశాంత నిష్క్రమణ

ముక్తి భవన్ ప్రాంగణంలో ప్రతి క్షణం ఆధ్యాత్మికత ప్రతిధ్వనిస్తుంటుంది. ఒక చిన్న దేవాలయం, ప్రత్యేకంగా పూజారులు ఇక్కడ నిరంతరం అందుబాటులో ఉంటారు. తమ చివరి ఘడియలు లెక్కిస్తున్న వారి మానసిక ప్రశాంతత కోసం పూజారులు వేద మంత్రాలను పఠిస్తూ, పవిత్ర గంగాజలాన్ని అందిస్తూ మరణాన్ని పండుగలా స్వీకరించే వాతావరణాన్ని కల్పిస్తారు. గత నాలుగు దశాబ్దాలుగా ఇక్కడి మేనేజర్ వేలాది మంది జీవులు ప్రశాంతంగా కన్నుమూయడాన్ని దగ్గరుండి చూస్తూ వారి ఆత్మశాంతి కోసం ప్రార్థిస్తున్నారు. చలికాలంలో ఇక్కడికి వచ్చే వారి సంఖ్య మరింత ఎక్కువగా ఉంటుంది. జీవితం అంటే ఏమిటో, మరణం ఎంత సహజమైనదో ప్రపంచానికి చాటిచెప్పే ఒక అద్భుత ఆధ్యాత్మిక నివాసంగా కాశీలోని ముక్తి భవన్ నిలుస్తోంది.

English summary

Located in the holy city of Varanasi, Mukti Bhavan is a unique hotel with 12 rooms where elderly and ailing individuals check in for their final days to die and attain salvation (Moksha).