రైల్వేలో నూతన PRS: రిజర్వేషన్ వ్యవస్థలో భారీ మార్పులు
రైల్వే మంత్రిత్వ శాఖ పాసింజర్ రిజర్వేషన్ వ్యవస్థలో భారీ మార్పులకు శ్రీకారం చుట్టింది. 40 ఏళ్ల నాటి పాత రిజర్వేషన్ వ్యవస్థను సమూలంగా మార్చబోతోంది. కొత్త సిస్టమ్ ఆగస్టు నుంచి అమలులోకి వచ్చే అవకాశం ఉంది. 1986 నుంచి సేవలందిస్తున్న ప్యాసింజర్ రిజర్వేషన్ సిస్టమ్ (PRS) స్థానంలో ఇప్పుడు అత్యాధునిక వెర్షన్ అందుబాటులోకి రాబోతోంది.
టికెట్ బుకింగ్ ప్రక్రియను మరింత వేగవంతం చేయడంతో పాటు, మరింత సౌకర్యవంతమైన ప్రయాణాన్ని అందించడమే ఈ మార్పు లక్ష్యం. దీనిపై రైల్వే మంత్రి అశ్విని వైష్ణవ్ రైల్ భవన్లో ఈ ప్రాజెక్టుపై సమీక్ష నిర్వహించారు కూడా. ఈ మార్పుల వల్ల ప్రయాణికులకు ఎటువంటి అసౌకర్యం కలగకుండా చర్యలు తీసుకోవాలని అధికారులను ఆదేశించారు.
నిజానికి 1986లో ప్రారంభమైన పాత వ్యవస్థ కాలక్రమేణా కొన్ని చిన్నపాటి మార్పులకు లోనైనా, దాని ప్రాథమిక నిర్మాణం చాలా కాలంగా అలాగే ఉంది. గత నాలుగు దశాబ్దాల్లో ప్రయాణికుల సంఖ్య భారీగా పెరగడం, ఆన్లైన్ బుకింగ్స్ విపరీతంగా పెరగడంతో ఆధునీకీకరించడం అనివార్యమైంది. ప్రస్తుత పరిస్థితుల్లో దాదాపు 88 శాతం టికెట్లు ఆన్లైన్ ద్వారానే బుక్ అవుతున్నాయి.
నూతనంగా అందుబాటులోకి రానున్న రిజర్వేషన్ సిస్టమ్, అత్యాధునిక సాంకేతికతపై ఆధారపడి పనిచేస్తుంది. ఇది పాత వ్యవస్థ కంటే మెరుగైన సామర్థ్యం దీని సొంతం. ఆర్టిఫీషియల్ ఇంటెలిజెన్స్ ను వినియోగించనుంది రైల్వేశాఖ. దీనివల్ల సర్వర్పై ఒత్తిడి గణనీయంగా తగ్గి, వెబ్సైట్ లేదా యాప్లో బుకింగ్లు వేగంగా పూర్తవుతాయి. పండుగ రోజుల్లో లేదా తత్కాల్ టికెట్ బుకింగ్ సమయంలో సర్వర్లు మొరాయించడం, సాంకేతిక ఆటంకాలు ఎదురుకావడం వంటి సమస్యలకు పరిష్కారం లభిస్తుందని రైల్వే శాఖ చెబుతోంది.
రైల్వే డిజిటలైజేషన్ వ్యూహంలో భాగంగా ప్రవేశపెట్టిన రైల్ వన్ (RailOne) యాప్ ప్రజాదరణ పొందుతోన్న విషయం తెలిసిందే. 2025 జూలైలో ప్రారంభమైన ఈ యాప్ను ఏడాది లోపే 3.5 కోట్లకు పైగా వినియోగదారులు డౌన్లోడ్ చేసుకున్నారు. ఈ యాప్ ద్వారా టికెట్ బుకింగ్, రద్దు, లైవ్ లొకేషన్, కోచ్ వివరాలు, ఫిర్యాదుల నమోదు వంటి సేవలు సులభతరమయ్యాయి. ఈ యాప్ ద్వారా రోజుకు సుమారు 9.29 లక్షల టికెట్లు బుక్ అవుతున్నాయి.
ఆది విజయవంతం కావడంతో పీఆర్ఎస్ లోనూ మార్పులు చేయాలని రైల్వే శాఖ నిర్ణయించింది. ఈ అప్గ్రేడెడ్ సిస్టమ్లో అత్యంత ప్రత్యేకమైన ఫీచర్ ఏఐ ఆధారిత వెయిటింగ్ లిస్ట్ ప్రిడిక్షన్. ఒక ప్రయాణికుడి వెయిటింగ్ టికెట్ కన్ఫర్మ్ అయ్యే అవకాశాలను ఇది ఖచ్చితంగా అంచనా వేస్తుంది. గతంలో దీని ఖచ్చితత్వం 53 శాతంగా ఉండగా, ఇప్పుడు AI సాంకేతికతతో అది 94 శాతానికి చేరింది.
Click it and Unblock the Notifications
Sign in with Google