ఒడిశా రైలు ఘటన- కొడుకు బాడీ తీసుకెళ్దామని అంబులెన్స్ లో వస్తే- మార్చురీలో షాకింగ్..

ఒడిశా రైలు ప్రమాదం ఘటనలో చనిపోయిన వారి మృతదేహాల్ని రాజధాని భువనేశ్వర్ లోని మార్చురీలో ఉంచారు. దాదాపు వంద మృతదేహాల్ని ఇప్పటికీ వారి బంధువులు గుర్తించలేదు. దీంతో ఆయా మృతదేహాల ఫొటోల్ని రైల్వే అధికారులు సర్కులేట్ చేస్తున్నారు. ఇదే క్రమంలో పశ్చిమబెంగాల్ కు చెందిన ఓ వ్యక్తి తన కుమారుడి మృతదేహం కూడా ఈ ఫొటోల్లో ఉండటంతో అంబులెన్స్ లో ఒడిశా బయలుదేరి వచ్చాడు.

తన కుమారుడి మృతదేహాన్ని తీసుకునేందుకు సదరు తండ్రి నేరుగా మార్చురీకి వెళ్లాడు. అక్కడ మృతదేహాల్ని ఒక్కొక్కటిగా పరిశీలిస్తున్నాడు. ఈ క్రమంలో ఓ మృతదేహం కదులుతున్నట్లు కనిపించింది. దీంతో అనుమానం వచ్చి అక్కడికి వెళ్లాడు. చూడగానే అతను తన కొడుకే. అంతే కాదు అతను బతికే ఉన్నాడు. దీంతో సదరు తండ్రి షాకయ్యాడు. వెంటనే ఆస్పత్రి సిబ్బందిని పిలిపించి తన కుమారుడి బాడీని మార్చురీ నుంచి బయటికి తెప్పించాడు.

బెంగాల్ లోని షాలిమార్ లో హెలారామ్ అనే వ్యక్తి తన 24 ఏళ్ల కుమారుడిని గత శుక్రవారం కోరమాండల్ ఎక్స్ ప్రెస్ లో ఎక్కించాడు. కొద్దిగంటల్లోనే ఈ రైలు ప్రమాదానికి గురైందని తెలిసి హతాశుడయ్యాడు. కుమారుడికి ఫోన్ చేస్తే తన పరిస్ధితి ఏమీ బాగోలేదని, తీవ్ర గాయాలతో ఉన్నట్లు చెప్పాడు. దీంతో తండ్రి మరింత ఆందోళనకు గురయ్యాడు. వెంటనే బెంగాల్ నుంచి 200 కిలోమీటర్ల దూరంలోని బాలాసోర్ కు బయలుదేరాడు. అక్కడికి చేరుకోగానే అంబులెన్స్ ను కూడా మాట్లాడుకున్నాడు. ఆస్పత్రులన్నీ వెతికినా తన కుమారుడు దొరకలేదు.

దీంతో స్ధానికంగా ఓ ప్రాంతంలో ఏర్పాటు చేసిన తాత్కాలిక మార్చురీకి వెళ్లాడు. అక్కడ గుర్తించని మృతదేహాల్ని ఉంచారు. అందులో వెతికితే తన కుమారుడు దొరికాడు. వెంటనే అతన్ని స్ధానిక అధికారుల సాయంతో బాలాసోర్ ఆస్పత్రికి తరలించి ప్రాథమిక చికిత్స అందించి, ఆ తర్వాత కటక్ మెడికల్ కాలేజీ ఆస్పత్రికి తరలించారు. చివరికి అతను కోలుకుంటున్నాడు. అయితే ఒడిశా రైలు ప్రమాదం జరగ్గానే గాయాలతో సృహకోల్పోయిన అతన్ని చనిపోయినట్లుగా భావించిన స్ధానికులు అధికారులకు అప్పగించారు. దీంతో వారు కూడా చెక్ చేయకుండానే మార్చురీకి పంపినట్లు తెలిసింది.

English summary

in a shocking incident, after odisha train tragedy a man from west bengal rushed to odisha mortuary to collect his son's body in ambulance but surprisingly finds that he is alive.