ఖైదీ నెం.15528.. రోజుకు రూ.540, నెలకు 2 సార్లు మాంసాహారం!

Prajwal Revanna: ఒకప్పుడు నెలకు రూ.1.2 లక్షల బేసిక్ సాలరీతో పాటు పలు అలవెన్సులు పొందుతూ లగ్జరీ లైఫ్ గడిపిన మాజీ ఎంపీ ప్రజ్వల్ రేవణ్ణ.. ఇప్పుడు బెంగళూరు సెంట్రల్ జైలులో ఖైదీ నంబర్.15528గా కఠినమైన వాస్తవాలను ఎదుర్కోనున్నారు. గతేడాది అంటే ఏప్రిల్ 2024లో లోక్‌సభ సభ్యుడిగా అనర్హత వేటు పడేవరకు ఆయనకు నెలకు భారీ ఆదాయం ఉండేది. కానీ ఇప్పుడు ఆయన జీవితం పూర్తిగా మారిపోయింది. జైలులో ఆయనకు కేటాయించే పనిని బట్టి రోజుకు గరిష్టంగా కేవలం రూ.540 మాత్రమే సంపాదించే అవకాశం ఉంది. తన పని కేటాయింపు కోసం ఎదురుచూస్తున్న ప్రజ్వల్ రేవణ్ణ.. ఇకపై ఖైదీల దినచర్య, నిర్ణీత మెనూ, పరిమిత ఫోన్ కాల్స్, కఠినమైన సందర్శన నియమాలను తప్పనిసరిగా పాటించాల్సి ఉంటుంది.

ఒక ఎంపీ నుంచి ఖైదీ వరకు..
ప్రజ్వల్ రేవణ్ణ జైలులో జీవిత ఖైదీగా ఉండటంతో ఆయన సంపాదన రోజుకు కేవలం 540 రూపాయలకు మించదు. ఇది 8 గంటల షిఫ్టుల్లో వారానికి ఆరు రోజులు పని చేసే ఖైదీలకు నిర్ణయించిన ప్రామాణిక వేతనం. జైలు నిబంధనల ప్రకారం.. ఆదివారాలు మినహా ఆరోగ్య కారణాలతో మినహాయింపు పొందినవారు తప్ప.. ఖైదీలందరూ పని చేసి సంపాదించడానికి అర్హులే. అయితే ప్రజ్వల్‌కు ఇంకా ఎలాంటి పని కేటాయించలేదు అని జైలు అధికారులు వెల్లడించారు. "కొత్త ఖైదీలు సాధారణంగా బేకరీలో సహాయం చేయడం లేదా ప్రాథమిక టైలరింగ్ వంటి నైపుణ్యం లేని పనులతో ప్రారంభిస్తారు. ఒక సంవత్సరం తర్వాత వారి ప్రవర్తన, పనితీరు బాగుంటే, నేత లేదా కమ్మరి పనులు వంటి నైపుణ్యం కలిగిన కార్మికుల పాత్రలకు పదోన్నతి పొందే అవకాశం ఉంది" అని సీనియర్ జైలు వర్గాలు వివరించాయి.

హసన్ మాజీ లోక్‌‌సభ సభ్యుడు శుక్రవారం ఖైదీల బ్యారక్‌కు మార్చబడినందున ఆయనకు సోమవారం వరకు పనిని ఎంచుకోవడానికి సమయం ఇవ్వబడుతుంది. "ప్రతి సోమవారం, కొత్త ఖైదీలకు వారి పనులు కేటాయించబడతాయి. పని స్వభావంతో సంబంధం లేకుండా, నిర్ణీత వేతనం రోజుకు రూ. 540 ఇవ్వబడుతుంది." అని ఒక అధికారి ధృవీకరించారు."జైలు మార్గదర్శకాల ప్రకారం కఠిన కారాగార శిక్ష పడిన ఏ ఖైదీ అయినా తప్పనిసరిగా పని చేయాలి" అని మరో సీనియర్ అధికారి స్పష్టం చేశారు.

జైలులో ప్రజ్వల్ దినచర్య
ఆరోగ్య కారణాలతో మినహాయింపు పొందినవారు తప్ప, జైలులోని ఖైదీలందరూ ఉదయం 6:30 గంటలకు తమ దినచర్యను ప్రారంభిస్తారు. ప్రాథమిక దినచర్య తర్వాత వారికి అల్పాహారం వడ్డిస్తారు. ఖైదీలకు అందించే ఆహారపు మెనూ వారంలో మారుతూ ఉంటుంది:

ఆదివారం: వెజ్ పులావ్

సోమవారం: టమాటో బాత్

మంగళవారం: చిత్రాన్నం

బుధవారం: పోహా

గురువారం: పులిహోర

శుక్రవారం: ఉప్మా

శనివారం: వాంగీభాత్

మధ్యాహ్న భోజనం 11:30 నుండి మధ్యాహ్నం 12:00 గంటల మధ్య వడ్డిస్తారు. ఖైదీలందరూ సాయంత్రం 6:30 గంటలకు తమ బ్యారక్‌లకు తిరిగి రావాలి. మధ్యాహ్న భోజనం, రాత్రి భోజనం రెండూ చపాతీలు, రాగి సంగటి, సాంబార్, తెల్ల అన్నం, మజ్జిగతో ఉంటాయి.మాంసాహారం విషయానికొస్తే, మంగళవారాలు ఖైదీలకు ఒక గుడ్డు లభిస్తుంది. ప్రతి నెలా మొదటి, మూడో శుక్రవారం మటన్.. రెండో, నాలుగో శనివారం చికెన్ వడ్డిస్తారు. ప్రజ్వల్‌కు, ఇతర ఖైదీల మాదిరిగానే వారానికి రెండు ఫోన్ కాల్స్ చేయడానికి అనుమతి ఉంటుంది, ఒక్కో కాల్ గరిష్టంగా 10 నిమిషాలు ఉంటుంది. జైలు సందర్శన నిబంధనల ప్రకారం, అతను వారానికి ఒకసారి కుటుంబ సభ్యులను లేదా స్నేహితులను కూడా కలుసుకోవచ్చు.

వేతన బకాయిలతో ఖైదీల సమస్యలు.. లక్షలాది రూపాయల పెండింగ్
ప్రజ్వల్ తన పని కేటాయింపు కోసం ఎదురుచూస్తుండగా, రాష్ట్రంలోని ఇతర జైళ్లలో ఇప్పటికే పని చేస్తున్న వేలాది మంది ఖైదీలకు సంవత్సరానికి పైగా వేతనాలు చెల్లించబడలేదు. "రాష్ట్రవ్యాప్తంగా, 1,500 మందికి పైగా ఖైదీలు వివిధ పనులలో నిమగ్నమై ఉన్నారు, కానీ వారి వేతనాలు - దాదాపు రూ. 3 కోట్లు - బకాయిపడి ఉన్నాయి" అని కీలక సమాచారం వెలుగులోకి వెలుగులోకి వచ్చింది. కర్ణాటకలోని 8 సెంట్రల్ జైళ్లు, అనేక జిల్లా జైళ్లలో సుమారు 14,500 మంది ఖైదీలు ఉన్నారు. అయితే, ప్రస్తుత నిబంధనల ప్రకారం వారిలో 15 శాతం మందికి మాత్రమే పని కేటాయించవచ్చు. "బకాయిలు త్వరలో విడుదల చేయబడతాయని ప్రభుత్వం మాకు హామీ ఇచ్చింది" అని అధికారులు తెలిపారు. అయితే ఈ బకాయిలు ఎప్పుడు చెల్లిస్తారనే దానిపై స్పష్టత లేదు. ప్రజ్వల్ రేవణ్ణ విషయంలో ఆయనకు వేతనం ఎప్పుడు మొదలవుతుందో, బకాయిల సమస్య ఆయనను కూడా ప్రభావితం చేస్తుందో లేదో వేచి చూడాలి.

English summary

Former MP Prajwal Revanna, once earning Rs.1.2 lakh per month, now lives as Prisoner No.15528 in Bengaluru Central Jail. From Rs.540 daily wages to limited meals and phone calls – here’s a look at his new life.