దేశం కోసం మరో కొడుకును ఆర్మీకి ఇస్తా .. పాకిస్తాన్ పై ప్రతిదాడి చేయాలన్న వీరజవాను తండ్రి

Published: Friday, February 15, 2019, 13:00 [IST]

పాట్నా : పుల్వామా ఉగ్రదాడిని యావత్ ప్రపంచం ఖండిస్తోంది. ఈ దాడిని హేయనీయమైన చర్యగా అభివర్ణిస్తున్నాయి. ఉగ్రదాడిలో జవాన్ల వీరమరణంతో ఆయా కుటుంబాల్లో విషాదం నెలకొంది. వీరుడా .. వందనం అంటూ యావత్ జాతి జవాన్లకు నివాళులర్పిస్తోంది.

దాడిలో నెలకొరిగిన వీరుడు

గురువారం మధ్యాహ్నం జరిగిన ఉగ్ర దాడిలో బీహర్ కు చెందిన జవాను రతన్ కుమార్ వీరమరణం పొందాడు. ఇంటికి పెద్దవాడి మరణంతో కుటుంబంలో విషాదం నెలకొంది. రతన్ ఇకలేరనే విషయాన్ని కుటుంబసభ్యులు, బంధువులే కాదు స్థానికులు కూడా జీర్ణించుకోలేకపోతున్నారు.

మరో కొడుకును ఇస్తా కానీ ...

భారతమాతకు సేవ చేసేందుకు రతన్ కుమార్ ను సైన్యంలో చేర్పించానని ఆయన తండ్రి గద్గత స్వరంతో చెప్పారు. దేశానికి సేవ చేసేందుకు తన మరో కుమారుడిని ఇస్తానని భాగల్ పూర్ లో మీడియాకు చెప్పారు. కానీ పుల్వామా ఉగ్రదాడికి ధీటుగా పాకిస్థాన్ కు జవాబివ్వాలన్నారు. భారతమాతకు సేవలందించేందుకు తన కుమారుడిని త్యాగం చేశానని .. దేశానికి సేవ చేసేందుకు మరో కుమారుడిని కూడా ఇచ్చేందుకు సిద్ధమని ప్రకటించారు. కానీ పాకిస్థాన్ కు మాత్రం సరైన సమాధానం చెప్పాలని స్పష్టంచేశారు.

దాడిలో వీరుల మరణం

గురువారం మధ్యాహ్నం జమ్ము నుంచి సీఆర్పీఎఫ్ జవాన్ల కాన్వాయ్ శ్రీనగర్ బయల్దేరింది. దాదాపు 78 వాహనాల్లో 2 వేల 547 మంది జవాన్లు వెళ్తుండగా .. పుల్వామా జిల్లాలో గోరిపుర ప్రాంతంలో గల అవంతిపుర వద్ద ఉగ్రవాదులు దాడికి తెగబడ్డారు. ఓ కారులో ఐఈడీ పేలుడు పదార్థంతో కాన్వాయ్ లోని వాహనాన్ని ఢీ కొనడంతో వాహనం తునాతునకాలై .. జవాన్ల ఎగిరిపడ్డారు. ఆ ప్రాంతమంతా మాంసపు ముద్దలతో .. రక్తంతో భీతావహంగా మారింది. ఈ దాడిలో పదుల సంఖ్యలో జవాన్లు చనిపోయారు. గాయపడ్డ వారికి శ్రీనగర్ ప్రభుత్వ ఆస్పత్రిలో చికిత్స అందిస్తున్నారు.

యూపీ వీర జవాన్లకు పరిహారం

ఉగ్రదాడిలో మరణించిన వీర జవాన్ల కుటుంబాలకు ఉత్తరప్రదేశ్ ప్రభుత్వం పరిహారం ప్రకటించింది. ఒక్కో కుటుంబానికి రూ.25 లక్షలు అందజేస్తామని తెలిపింది. పుల్వామా ఉగ్రదాడిలో యూపీకీ చెందిన 12 మంది జవాన్లు ప్రాణాలు కోల్పోయారు.

Published On February 15, 2019