కరోనావైరస్ సెకండ్‌ వేవ్‌కి పూర్తి బాధ్యత ఎలక్షన్ కమిషన్‌దే: మద్రాస్ హైకోర్టు ఆగ్రహం - Newsreel

By Bbc Telugu

Updated: Monday, April 26, 2021, 19:41 [IST]

దేశంలో కరోనావైరస్ సెకండ్ వేవ్‌ తీవ్ర రూపం దాల్చడానికి ఎలక్షన్ కమిషనే కారణమని మద్రాస్ హైకోర్టు పేర్కొంది.

ఎన్నికల అధికారులపై హత్య కేసులు నమోదు చేయాలని కోర్టు వ్యాఖ్యానించింది.

దేశంలో కరోనావైరస్ రెండో వేవ్ మొదలైనప్పటికీ రాజకీయ పార్టీల సభలకు అనుమతులు ఇవ్వడంపై కోర్టు ఆగ్రహించింది.

ఓట్ల లెక్కింపు సమయంలో కోవిడ్ నిబంధనలు పాటించేలా కోర్టు ఆదేశాలు జారీచేయాలంటూ ఓ ప్రజాప్రతినిధి దాఖలు చేసిన పిటిషన్‌ను విచారించిన సందర్భంగా మద్రాస్ హైకోర్టు చీఫ్ జస్టిస్ సంజీవ్ బెనర్జీ ఈ వ్యాఖ్యలు చేశారు.

https://twitter.com/ANI/status/1386609810368462850

ఎన్నికల ప్రచార సమయంలో కోవిడ్ నిబంధనలు పాటించేలా చూడడంలో ఎలక్షన్ కమిషన్ పూర్తిగా విఫలమైందని కోర్టు అభిప్రాయపడింది.

''ప్రచారం జరుగుతున్న సమయంలో ఎన్నికల అధికారులు ఏమైనా ఇతర గ్రహాలలో ఉన్నారా?'' అంటూ న్యాయమూర్తి తీవ్ర స్థాయిలో ఆగ్రహించారు.

ప్రజారోగ్యానికి ఉన్న ప్రాముఖ్యాన్ని రాజ్యాంగ సంస్థలు గుర్తుంచుకోవాలని.. కనీసం లెక్కింపు సందర్భంగానైనా కోవిడ్ నిబంధనలు పక్కాగా పాటించేలా ప్రణాళికలు వేయకపోతే కౌంటింగ్ నిలిపివేయిస్తామని కోర్టు హెచ్చరించింది.

మే 2న కౌంటింగ్ సందర్భంగా తీసుకోబోయే కోవిడ్ జాగ్రత్త చర్యలపై కేంద్ర ఎన్నికల సంఘం, రాష్ట్ర ఎన్నికల ప్రధానాధికారి, తమిళనాడు ఆరోగ్యశాఖ ప్రణాళిక రూపొందించి ఏప్రిల్ 30న కోర్టుకు సమర్పించాలని న్యాయమూర్తి ఆదేశించారు.

ఇవి కూడా చదవండి: