కాశ్మీర్ పోలీస్ స్టేషన్ లో భారీ పేలుడు వెనుక- ఆ వీడియోల్లో..?

అర్ధరాత్రి జమ్మూ కాశ్మీర్ లో భారీ పేలుడు సంభవించింది. ఈ ఘటనలో ఏడుమంది దుర్మరణం పాలయ్యారు. 30 మందికి పైగా తీవ్రంగా గాయపడ్డారు. మృతుల సంఖ్య ఇంకా పెరిగే అవకాశం ఉంది. దేశ రాజధాని రెడ్ ఫోర్ట్ వద్ద కారు బాంబు పేలుడు ఉదంతాన్ని ఇంకా విస్మరించకముందే ఈ ఘటన చోటు చేసుకుంది. సమాచారం అందిన వెంటనే పోలీసులు, భద్రత అధికారులు హుటాహుటిన సంఘటన స్థలానికి చేరుకున్నారు. సహాయక చర్యలను చేపట్టారు.

శ్రీనగర్ నౌగామ్ పోలీస్ స్టేషన్‌లో ఈ పేలుడు సంభవించింది. ఫరీదాబాద్ లో స్వాధీనం చేసుకున్న కొన్ని డిటొనేటర్లు, ఇతర పేలుడు పదార్థాలను నిల్వ చేస్తున్న సమయంలో ఈ పేలుడు జరిగింది. సీసీటీవీ ఫుటేజీలు, ప్రత్యక్ష సాక్షుల కథనం ప్రకారం- పేలుడు ధాటికి పోలీస్ స్టేషన్ భవనం పూర్తిగా ధ్వంసమైంది. మంటలు చెలరేగాయి. ఆ ప్రాంతం అంతా దట్టమైన పొగ కమ్ముకుంది. అగ్నిమాపక దళం, అంబులెన్స్‌లు, సీనియర్ పోలీసులు వెంటనే సంఘటనా స్థలానికి చేరుకున్నారు.

ఇటీవలే ఫరీదాబాద్ లో ఉగ్రవాదుల నుండి 360 కిలోల పేలుడు పదార్థాలను పోలీసులు, భద్రత సిబ్బంది స్వాధీనం చేసుకున్నారు. అందులో కొన్ని పేలుడు పదార్థాలను నౌగామ్ పోలీస్ స్టేషన్‌లో నిల్వ ఉంచారు. కొన్నింటిని ఫోరెన్సిక్ ల్యాబ్‌కు పంపించారు. వీటిని పోలీసులు, ఫోరెన్సిక్ బృందాలు పరిశీలిస్తున్న సమయంలో ఈ పేలుడు సంభవించింది. భారీ శబ్దంతో ఒక్కసారిగా పేలుడు సంభవించింది. మృతదేహాలు 300 అడుగుల దూరం వరకు చెల్లాచెదురుగా పడ్డాయి.

ఈ పేలుడు వెనుక రెండు కోణాల్లో దర్యాప్తు జరుగుతున్నట్లు పోలీసు వర్గాలు వెల్లడించాయి. మొదటిది- మెజిస్ట్రేట్ సమక్షంలో అమ్మోనియం నైట్రేట్‌ను సీల్ చేస్తున్నప్పుడు అనుకోకుండా మంటలు అంటుకోవడం. రెండవది- ఉగ్రదాడి. పోలీస్ స్టేషన్ ఆవరణలో నిలిపి ఉన్న ఓ స్వాధీనం చేసుకున్న కారులో ఐఈడీ అమర్చి ఉండవచ్చని, అది ఈ భారీ పేలుడుకు కారణమై ఉండవచ్చని అనుమానిస్తున్నారు. జైషే మహమ్మద్ అనుబంధ సంస్థ పీపుల్స్ యాంటీ-ఫాసిస్ట్ ఫోర్స్ (PAFF) ఈ దాడికి బాధ్యత వహించినట్లు ప్రకటించింది.

ఢిల్లీ కారు పేలుడు ఘటనలో అరెస్ట్ అయిన డాక్టర్ ముజమ్మిల్ అద్దె ఇంట్లో ఈ 360 కిలోల పేలుడు పదార్థాలను స్వాధీనం చేసుకోవడం, తాజాగా పీఏఎఫ్ఎఫ్ తెరమీదికా రావడం వంటి పరిణామాలతో ఉగ్రవాద కోణంలో దర్యాప్తు ముమ్మరం చేశారు అధికారులు. సీసీటీవీ ఫుటేజీని విశ్లేషించారు. ఢిల్లీ ఘటనలో అరీఫ్ నిసార్ దార్ అలియాస్ సాహిల్, యాసిర్ ఉల్ అష్రాఫ్, మక్సూద్ అహ్మద్ దార్ అలియాస్ షాహిద్ అనే ముగ్గురు నిందితులను అరెస్టు చేశారు. గతంలో జమ్మూ కాశ్మీర్ లో చోటు చేసుకున్న కొన్ని అవాంఛనీయ ఘటనలతో సంబంధం ఉందని తేల్చారు.

English summary

Origin of explosion is suspected to be explosives seized by J&K Police from Faridabad in connection with probe into JeM module alleged to be behind Delhi blast. జమ్మూ కాశ్మీర్ లో నౌగావ్ పోలీస్ స్టేషన్ పేలుడు ఘటనపై ఉగ్రవాద దాడి కోణంలో దర్యాప్తు చేపట్టినట్లు వెల్లడించిన అధికారులు