యుద్దమే! సిద్దంగా ఉండాలంటూ సైన్యానికి కిమ్ ఆదేశం: కొరియన్ వార్-2 దిశగా..
రెండో కొరియన్ యుద్దానికి సిద్దంగా ఉండాలంటూ ఉత్తరకొరియా అధ్యక్షుడు కిమ్ జాంగ్ ఉన్ సైన్యానికి ఆదేశాలు జారీ చేశారు.
ప్యోంగ్యాంగ్: ప్రత్యర్థి తమపై దాడి మొదలుపెట్టకముందే అప్రమత్తంగా వ్యవహరించాలని భావిస్తున్న అమెరికా.. ఇందుకోసం దక్షిణ కొరియా సహాయంతో అక్కడ తమ బలగాలను మోహరించిన సంగతి తెలిసిందే.
దాదాపు 17,500మంది అమెరికన్ 50 వేల మంది దక్షిణ కొరియా సైనికులు దక్షిణ కొరియాలో ఉల్కీ-ఫ్రీడమ్ గార్డియన్ మిలటరీ డ్రిల్ చేపడుతున్నారు. సోమవారం నుంచి ప్రారంభం కానున్న మిలటరీ డ్రిల్ అగస్టు 31వ తేదీన ముగియనుంది.
ఈ పరిణామాలతో ఆందోళన చెందుతుందనుకున్న ఉత్తరకొరియా అందుకు పూర్తి విరుద్దంగా వ్యవహరిస్తుండటం గమనార్హం. కాళ్లబేరానికి రావడమో.. లేక యుద్దం ఆలోచనను పూర్తిగా విరమించుకుంటామని ఆ దేశం ప్రకటిస్తుందని అమెరికా భావించినప్పటికీ.. పరిస్థితులు మాత్రం అలా కనిపించడం లేదు.
రెండో కొరియన్ యుద్దానికి సిద్దంగా ఉండాలంటూ ఉత్తరకొరియా అధ్యక్షుడు కిమ్ జాంగ్ ఉన్ తమ సైనికులకు ఆదేశాలు జారీ చేయడమే ఇందుకు నిదర్శనం. 1950లో దక్షిణకొరియా-ఉత్తరకొరియా మధ్య తొలి కొరియన్ యుద్దం చోటు చేసుకుంది.
కాగా, అమెరికా- దక్షిణ కొరియా సంయుక్తంగా చేబడుతున్న ఉల్కీ-ఫ్రీడమ్ గార్డియన్ మిలటరీ డ్రిల్లో ఆస్ట్రేలియా, బ్రిటన్, కెనడా, కొలంబియా, డెన్మార్క్, నెదర్లాండ్, న్యూజిలాండ్ అధికారులు కూడా పాల్గొంటారని తెలుస్తోంది.
రోజురోజుకు అమెరికాకు మద్దతు పెరుగుతుండటం.. తమ బద్ద శత్రువైన దక్షిణ కొరియా ఆ దేశానికి స్థావరంలా మారడం ఉత్తరకొరియాను కలవరపెట్టే అంశమే. అయినప్పటికీ ఆ దేశం పరిస్థితులను ధీటుగా ఎదుర్కోవాలనే భావిస్తుందే తప్ప.. వెనక్కి తగ్గాలన్న ఆలోచన చేయడం లేదు.
ఇందుకు తగ్గట్లే ఉత్తరకొరియా మీడియాలోను వార్తలు రావడం గమనార్హం. అమెరికా-దక్షిణ కొరియా చేపట్టబోతున్న మిలటరీ డ్రిల్ ను అక్కడి పత్రిక 'అణు యుద్దానికి నిర్లక్ష్యపూరిత కసరత్తులు' అని పేర్కొంది. ఇలాంటి పరిస్థితులు నియంత్రణ లేని అణుయుద్దానికి దారితీస్తాయని దారి తీస్తాయని తెలిపింది.
Click it and Unblock the Notifications
Sign in with Google