24 గంటల్లోనే వణికించిన వరుస భూకంపాలు: పరుగులు తీసిన జనం

ఖాట్మాండ్: హిమాలయ దేశం నేపాల్‌ను వరుస భూకంపాలు వణికిస్తున్నాయి. ఆదివారం రెండుసార్లు భూకంపాలు చోటు చేసుకున్నాయి. దీంతో జనం భయాందోళనలకు గురవుతున్నారు. ఆదివారం సాయంత్రం 4.3 తీవ్రతతో భూకంపం వచ్చినట్లు నేపాల్ సెంటర్ ఫర్ సిస్మోలజీ వెల్లడించింది. ఆదివారం సాయంత్రం 5 గంటల ప్రాంతంలో ఈ భూకంపం వచ్చింది. దీంతో జనం నివాసాల నుంచి బయటికి పరుగులు తీశారు. భూమికి 5 కిలోమీటర్ల లోతులో భూకంప కేంద్రం ఉన్నట్లు తెలిపింది.

అంతకుముందు ఆదివారం ఉదయం ఖాట్మాండులో భూకంపం సంభవించింది. రిక్టార్ స్కేలుపై 6.1 తీవ్రత నమోదైనట్లు అధికారులు తెలిపారు. ధాడింగ్ జిల్లా జతీయ భూకంప పర్యవేక్షణ, పరిశోధన కేంద్రం ఈ వివరాలను వెల్లడించింది. ఆదివారం ఉదయం 7.39 గంటలకు ప్రకంపనలు మొదలయ్యాయి. బాగ్‌మతి, గండిక ప్రావిన్సుల్లోని ఇతర జిల్లాల్లోనూ భూ ప్రకంపనలు వచ్చినట్లు అధికారులు తెలిపారు.

టిబెటన్, ఇండియన్ టెక్నోనిక్ ప్లేట్లు కలిసే శిఖరంపై ఉన్న నేపాల్‌లో తరచూ భూకంపాలు సంభవిస్తుంటాయి. ప్రతి శతాబ్ద కాలానికి ఈ రెండు ప్లేట్లు ఒకదానికొకటి రెండు మీటర్ల మేర దగ్గరకు జరుగుతున్నాయి. దీంతో లోపల ఒత్తిడి ఏర్పడి భూకంపాలు సంభవిస్తున్నట్లు శాస్త్రవేత్తలు వెల్లడించారు.

కాగా, 2015లో నేపాల్ లో భారీ భూకంపం సంభవించింది. రిక్టార్ స్కేలుపై 7.8 తీవ్రత నమోదు కావడంతో దాదాపు 9 వేల మంది మరణించారు. ప్రపంచంలో అత్యధిక భూకంపాలు సంభవించే దేశాల్లో నేపాల్ 11వ స్థానంలో ఉందని పోస్ట్ డిజాస్టర్ నీడ్స్ అసెస్మెంట్ నివేదిక పేర్కొంది.

English summary

Back-to-back earthquakes strike Nepal on Sunday.