భారత్ ఒక్కరోజులోనే! అమెరికా మాత్రం..: ఎలాన్ మస్క్ స్పెషల్ ట్వీట్

భారత ఎన్నికల ప్రక్రియపై ప్రశంసలు కురిపించారు ప్రపంచ కుబేరుడు ఎలాన్ మస్క్(Elon Musk). అమెరికాలోని కాలిఫోర్నియాలో పోలింగ్ జరిగి వారాలు గడుస్తున్నా ఇంకా ఓట్ల లెక్కింపు పూర్తికాకపోవడంపై అసంతృప్తి వ్యక్తం చేశారు. ఈ మేరకు ఎక్స్ వేదికగా భారత్‌తో పోల్చితే అమెరికా ఎన్నికల ప్రక్రియ ఎంతో ఆలస్యమని పేర్కొన్నారు.

భారతదేశంలో ఒక్క రోజులోనే 640 మిలియన్ల ఓట్లను ఎలా లెక్కించారు? అనే హెడ్‌లైన్‌తో ప్రచురితమైన ఓ వార్త కథనాన్ని ఎలాన్ మస్క్ ఎక్స్ వేదికగా షేర్ చేశారు. దీనికి 'భారత్ ఒక్కరోజులోనే 640 మిలియన్ ఓట్లను లెక్కించింది కానీ, కాలిఫోర్నియా ఇంకా ఓట్ల లెక్కింపులోనే ఉంది' అంటూ ఎలాన్ మస్క్ పేర్కొన్నారు. ప్రస్తుతం ఈ పోస్టు వైరల్‌గా మారింది.

కాగా, నవంబర్ 5న అమెరికాలో అధ్యక్ష ఎన్నికలు జరిగిన విషయం తెలిసిందే. ఈ ఎన్నికల్లో రిపబ్లికన్ అభ్యర్థి డొనాల్డ్ ట్రంప్ ఘన విజయం సాధించినట్లు కూడా ప్రకటించారు. అయినప్పటికీ.. కాలిఫోర్నియాలో ఇంకా ఓట్ల లెక్కింపు పూర్తికాకపోవడం గమనార్హం. అమెరికాలో అత్యధిక జనాభా కలిగిన రాష్ట్రం కాలిఫోర్నియానే.

India counted 640 million votes in 1 day.

California is still counting votes 🤦‍♂️ https://t.co/ai8JmWxas6

— Elon Musk (@elonmusk) November 24, 2024

ఇక, కాలిఫోర్నియాలో మెయిల్ ద్వారా పోలైన ఓట్లు ఎక్కువగా ఉండటంతో వాటిని లెక్కించేందుకు ఎక్కువ సమయం పడుతోంది. ఇప్పటికే 98 శాతం కౌంటింగ్ పూర్తయినట్లు అక్కడి అధికారులు తెలిపారు. 54 ఎలక్టోరల్ ఓట్లను డెమోక్రటిక్ అభ్యర్థి కమలా హారిస్ ఆ ప్రాంతంలో నుంచి సాధించారు. కాగా, అమెరికా అధ్యక్షుడిగా డొనాల్డ్ ట్రంప్ జనవరిలో బాధ్యతలు తీసుకోనున్నారు. 2025, జనవరి 20న అమెరికా 47వ అధ్యక్షుడిగా ట్రంప్ రెండోసారి అధ్యక్షుడు కానున్నారు.

English summary

Elon Musk praises India's election process.