Fumio Kishida: జపాన్‌కు 100వ ప్రధాని కానున్న నేత - Newsreel

By Bbc Telugu

| Updated: Wednesday, September 29, 2021, 19:04 [IST]

జపాన్‌‌లోని పాలక లిబరల్ డెమొక్రటిక్ పార్టీ(ఎల్డీపీ) నాయకత్వ రేసులో విజయం సాధించిన ఫుమియో కిషిడా ఆ దేశానికి ప్రధాని కానున్నారు.

ప్రస్తుత ప్రధాని యోషిహిదే సుగా నుంచి కిషిడా అక్టోబరు 4న ఆ బాధ్యతలు స్వీకరిస్తారు. కిషిడా జపాన్‌కు 100వ ప్రధాన మంత్రి కానున్నారు.

ప్రస్తుతం ప్రధాని పదవిలో ఉన్న సుగా ఏడాది కిందటే బాధ్యతలు చేపట్టారు. అయితే, ఆయన బాధ్యతల నుంచి తప్పుకోవాలని నిర్ణయించుకోవడంతో ఆయన స్థానంలో కిషిడాను పార్టీ ఎన్నుకుంది.

ప్రధానిగా వచ్చే సాధారణ ఎన్నికల్లో ఎల్డీపీని విజయం వైపు తీసుకెళ్లడమే కిషిడా ప్రధాన లక్ష్యం కానుంది.

కరోనా మహమ్మారి సమయంలో టోక్యో ఒలింపిక్స్‌ నిర్వహించడంపై జపాన్‌లో ప్రజావ్యతిరేకత వెల్లువెత్తింది. ఫలితంగా పాలక ఎల్డీపీ ప్రజాదరణ కోల్పోయింది.

సుగా స్థానంలో టారో కోనో ప్రధాని అవుతారని ఎక్కువ మంది భావించారు కానీ విదేశీ వ్యవహారాల మంత్రిగా పనిచేసిన కిషిడా ఆయన్ను వెనక్కు నెట్టి రేసులో విజేతగా నిలిచారు.

పార్లమెంటులో ఎల్డీపీకి ఆధిక్యం ఉండడంతో కిషిడా జపాన్ తర్వాత ప్రధాన మంత్రి కావడం ఖాయమైంది.

64 ఏళ్ల కిషిడా సుదీర్ఘ కాలంగా ఈ పదవి కోసం ఎదురుచూస్తున్నారు. గత ఏడాది జరిగిన ఎన్నికల్లో సుగా ఆయనపై గెలిచారు.

జపాన్ కొత్త ప్రధానిగా కిషిడా ముందు అనేక సవాళ్లు ఉన్నాయి. కోవిడ్ మహమ్మారిని అదుపు చేయడం, ఆర్థిక వ్యవస్థను పట్టాలెక్కించడం, ఉత్తర కొరియా బెదిరింపులకు ఎదురునిలవడం వంటివి ఆయన ముందున్న సవాళ్లు.

మహమ్మారిని ఎదుర్కోడానికి 'ఆరోగ్య సంక్షోభ నిర్వహణ సంస్థ'ను ఏర్పాటు చేయాలని ఆయన పిలుపునిచ్చారు. వీగర్ మైనారిటీల పట్ల చైనా తీరును ఖండిస్తూ ఒక తీర్మానాన్ని ఆమోదించాలనే ఆలోచనకు మద్దతిచ్చారు.

"ప్రజలు మాటను వినడమే నా నైపుణ్యం. ఎల్డీపీ, జపాన్‌ ఉజ్వల భవిష్యత్తు కోసం అందరితో కలిసి కృషి చేయాలని నిర్ణయించుకున్నాను" అని ప్రధాని రేసులో విజయం సాధించిన తర్వాత కిషిడా అన్నారు.

ఇవి కూడా చదవండి: