హంగేరియన్‌ రచయిత లాస్లో క్రాస్నాహోర్కైకు సాహిత్యంలో నోబెల్‌..!

ప్రతిష్ఠాత్మక నోబెల్ బహుమతి ఈ సంవత్సరం.. హంగేరియన్ రచయిత లాస్లో క్రాస్నాహోర్కై (László Krasznahorkai)కి దక్కింది. సాహిత్య రంగంలో 2025కి గాను ఆయన ఈ అవార్డు దక్కించుకున్నారు. లాస్లో గాఢమైన తాత్విక ఆలోచనలు.. మానవ మనస్తత్వాన్ని లోతుగా వ్యక్తపరిచే శైలికి ప్రపంచవ్యాప్తంగా విమర్శకుల ప్రశంసలు అందుకున్నాయి.

లాస్లో క్రాస్నాహోర్కై రచనలు సాధారణంగా ప్రపంచవ్యాప్త అశాంతి, ఆధ్యాత్మికత, నైతిక సంక్షోభం వంటి అంశాలను లోతుగా పరిశీలిస్తాయి. ఆయన ప్రముఖ రచనలు “Satantango,” “The Melancholy of Resistance,” “War and War” వంటి నవలలు అంతర్జాతీయ స్థాయిలో గుర్తింపు పొందాయి. ఈ రచనలు మానవుడి ఒంటరితనం, ఆధునిక నాగరికతలోని నిస్సారతపై సాహిత్య పరంగా మంచి పేరు పొందాయి.

విశ్వ సాహిత్యంలో ప్రత్యేక స్థానం..

లాస్లో రచనలు మొదట హంగేరియన్ భాషలో రాయబడినప్పటికీ.. అవి అనేక యూరోపియన్ భాషల్లోకి అనువదించబడి.. ప్రపంచ పాఠకుల్లో విశేష ఆదరణ పొందాయి. ఆయనకు అంతకుముందే పలు అంతర్జాతీయ పురస్కారాలు, వాటిలో బుకర్ ఇంటర్నేషనల్ ప్రైజ్ (2015) కూడా లభించాయి. సినీ దర్శకుడు బెలా టార్ తీసిన చిత్రాలు కూడా లాస్లో నవలల ఆధారంగా రూపొందడంతో ఆయన రచనలకు అంతర్జాతీయ ఖ్యాతి మరింత పెరిగింది.

గత సంవత్సరం ఈ నోబెల్ గౌరవం దక్షిణ కొరియా రచయిత్రి హాన్ కాంగ్కు లభించింది. ఆమె రచనల్లో మహిళా జీవితం, యుద్ధం, మానవ హక్కుల అంశాలు ప్రధానంగా ఉంటాయి.హాన్ కాంగ్‌కి ఈ గౌరవం లభించడం ద్వారా ఆసియా సాహిత్యానికి కొత్త ఉత్సాహం వచ్చింది. ఈ సంవత్సరం లాస్లో ఎంపికతో యూరోపియన్ సాహిత్యం మళ్లీ నోబెల్ వేదికపై వెలుగొందింది.

నోబెల్ సాహిత్య బహుమతుల చరిత్ర..

1901లో మొదటిసారిగా నోబెల్ బహుమతులు ప్రారంభమయ్యాయి. అప్పటి నుంచి 2024 వరకు 117 సార్లు సాహిత్యంలో నోబెల్ బహుమతి ప్రకటించబడింది.ఈ గౌరవాన్ని ఇప్పటివరకు 18 మంది మహిళా రచయిత్రులు అందుకున్నారు. ప్రపంచంలోని వివిధ దేశాల సాహిత్య రంగానికి ఇది ఒక గొప్ప గుర్తింపు.

ఈ ఏడాది నోబెల్ ప్రకటనల షెడ్యూల్..

నోబెల్ కమిటీ ప్రకటనల ప్రకారం, ఈ ఏడాది పురస్కారాల ప్రకటన అక్టోబర్ 6 నుంచి అక్టోబర్ 13 వరకు జరుగుతుంది.

• సోమవారం వైద్యశాస్త్రంలో

• మంగళవారం భౌతికశాస్త్రంలో

• బుధవారం రసాయనశాస్త్రంలో

• గురువారం సాహిత్యంలో గ్రహీతల పేర్లు ప్రకటించారు.

  ఇక శుక్రవారం శాంతి బహుమతి గ్రహీతను, అక్టోబర్ 13న అర్థశాస్త్ర బహుమతి గ్రహీతను ప్రకటించనున్నారు.

  స్వీడన్ రసాయన శాస్త్రవేత్త, డైనమైట్ ఆవిష్కర్త ఆల్ఫ్రెడ్ నోబెల్ వర్ధంతి రోజైన డిసెంబర్ 10న ప్రతీ సంవత్సరం అవార్డుల ప్రదాన కార్యక్రమం జరుగుతుంది. ఈ వేడుక స్టాక్‌హోమ్‌ నగరంలో అత్యంత ఘనంగా నిర్వహించబడుతుంది. సాహిత్య రంగంలోని విజేతలకు నోబెల్ పతకం, సర్టిఫికేట్‌తో పాటు భారీ నగదు బహుమతిని కూడా అందజేస్తారు.

English summary

Laszlo Krasznahorkai, a distinguished Hungarian writer, has been awarded the 2025 Nobel Prize in Literature. This follows the previous year's award to Han Kang from South Korea. The Nobel Prize announcements will continue until October 13, culminating in ceremonies on December 10.