ఇజ్రాయెల్ భీకర ప్రతీకారం: హిజ్బుల్లా మాస్టర్‌మైండ్ హతం!

మధ్యప్రాచ్యంలో యుద్ధ మేఘాలు మరింత దట్టంగా అలుముకున్నాయి. లెబనాన్ రాజధాని బీరుట్‌పై ఇజ్రాయెల్ వైమానిక దళం జరిపిన భీకర దాడిలో హిజ్బుల్లా ఉగ్రవాద సంస్థకు కోలుకోలేని ఎదురుదెబ్బ తగిలింది. ఈ దాడిలో హిజ్బుల్లా దక్షిణ విభాగానికి మాస్టర్‌మెండ్‌గా భావించే టాప్ కమాండర్ యూసుఫ్ ఇస్మాయిల్ హషీమ్ హతమయ్యాడు. దక్షిణ లెబనాన్ సరిహద్దుల నుంచి ఇజ్రాయెల్ భూభాగంపై జరిగే అనేక దాడులకు ఇతనే ప్రధాన వ్యూహకర్త అని ఇజ్రాయెల్ రక్షణ దళం అధికారికంగా ధ్రువీకరించింది.

ప్రపంచ మార్కెట్‌పై యుద్ధ ప్రభావం
అమెరికా-ఇజ్రాయెల్ ఓ వైపు.. ఇరాన్, దాని మద్దతు ఉన్న గ్రూపులు మరోవైపు సాగిస్తున్న ఈ పోరు ఇప్పట్లో ముగిసేలా కనిపించడం లేదు. ఈ ఉద్రిక్తతల ప్రభావం నేరుగా అంతర్జాతీయ మార్కెట్‌పై పడుతోంది. హోర్ముజ్ జలసంధిని మూసివేస్తారన్న భయాల మధ్య క్రూడ్ ఆయిల్ ధరలు ఆకాశాన్ని తాకుతున్నాయి. దీని వల్ల ప్రపంచవ్యాప్తంగా పెట్రోల్, డీజిల్, ఎల్పీజీ ధరలు పెరిగి సామాన్యుడిపై ఆర్థిక భారం పడుతోంది. ముఖ్యంగా ఆర్థిక ఆంక్షలతో సతమతమవుతున్న ఇరాన్.. ఈ యుద్ధం కారణంగా తీవ్ర నష్టాన్ని చవిచూస్తోంది.

అమెరికా వ్యూహం.. ఇరాన్ మొండితనం
ఈ యుద్ధం ముగింపుపై అమెరికా విదేశాంగ మంత్రి మార్కో రూబియో సంచలన కామెంట్స్ చేశారు. ఇరాన్‌లో ఈ యుద్ధం ఖచ్చితంగా ముగుస్తుందని.. అది నేడు కాకపోయినా భవిష్యత్తులో జరగక తప్పదని ఆయన పేర్కొన్నారు. అయితే ఇరాన్ మాత్రం దీనిపై వెనక్కి తగ్గడం లేదు. అమెరికా ప్రభుత్వంపై తమకు ఏమాత్రం నమ్మకం లేదని.. ఎలాంటి చర్చలకు తావులేదని ఇరాన్ విదేశాంగ మంత్రి అబ్బాస్ అరాగ్చీ స్పష్టం చేశారు. అగ్రరాజ్యం వైఖరిని తాము తప్పుబడుతున్నామని ఆయన తేల్చి చెప్పడం గమనార్హం.

క్షిపణుల వర్షం.. కుప్పకూలిన భవనాలు
ఈ యుద్ధ తీవ్రత ఇతర దేశాలకు కూడా విస్తరిస్తోంది. బహ్రెయిన్ తన వాయు రక్షణ వ్యవస్థ ద్వారా ఇరాన్ ప్రయోగించిన సుమారు 186 క్షిపణులు, 419 డ్రోన్లను కూల్చివేసినట్లు ప్రకటించింది. మరోవైపు కువైట్ అంతర్జాతీయ విమానాశ్రయంపై ఏడో సారి దాడి జరగడం కలకలం రేపింది. ఇటు ఇజ్రాయెల్‌లోని టెల్ అవీవ్‌లో కూడా మిస్సైల్ దాడుల కారణంగా ఎన్నో భవనాలు పాక్షికంగా కూలిపోయాయి. ఈ దాడుల్లో సామాన్య ప్రజలు కూడా గాయపడుతుండటంతో పరిస్థితి అత్యంత దారుణంగా మారుతోంది.

అంతర్జాతీయ పరిణామాలు
యుద్ధం నేపథ్యంలో ప్రపంచ దేశాలు తమ వ్యూహాలను మారుస్తున్నాయి. అర్జెంటీనా ఇప్పటికే ఇరాన్ కు చెందిన IRGC (ఇస్లామిక్ రివల్యూషనరీ గార్డ్ కార్ప్స్)ని ఉగ్రవాద సంస్థగా ప్రకటించి షాక్ ఇచ్చింది. రష్యా మాత్రం భారత్ వంటి దేశాలు తమకు నచ్చిన చోట చమురు కొనుగోలు చేయవచ్చని.. ఎవరి ఒత్తిడికి తలొగ్గాల్సిన అవసరం లేదని మద్దతు తెలిపింది. అమెరికా అధ్యక్షుడు డొనాల్డ్ ట్రంప్ రేపు ఈ యుద్ధంపై దేశాన్ని ఉద్దేశించి ప్రసంగించనున్నారు, దీంతో శాంతి చర్చలు మొదలవుతాయా లేదా యుద్ధం మరింత ముదురుతుందా అన్నది తేలనుంది.

English summary

Israel eliminates Hezbollah's Southern Front commander Yusuf Ismail Hashem in a major Beirut strike. Tensions rise as crude oil prices soar amid the ongoing Iran-Israel conflict.