సైన్యం అంటే గ్లామరా? ఇజ్రాయెల్ గురించి తెలియాల్సిన నిజాలు

సోషల్ మీడియాలో ఇజ్రాయెల్‌ ఆర్మీ (IDF)కి సంబంధించిన ఫొటోలు, వీడియోలు తరచూ వైరల్ అవుతుంటాయి. ముఖ్యంగా మహిళా సైనికుల చిత్రాలు చూసినప్పుడు “ఇజ్రాయెల్‌ ఆర్మీలో అందమైన అమ్మాయిల్నే ఎంపిక చేస్తారా?” అన్న సందేహం చాలామందిలో కలుగుతుంది. ఈ ప్రశ్న చుట్టూనే ఎన్నో కథనాలు, ఆరోపణలు, వాదనలు నడుస్తుంటాయి. కానీ వాస్తవాలు ఏమంటున్నాయి? ప్రచారం, నిజం మధ్య గల తేడా ఏంటి? అన్నది లోతుగా చూడాల్సిన అవసరం ఉంది.

ఇజ్రాయెల్‌ ప్రత్యేకత ఏమిటంటే… అక్కడ సైనిక సేవ కేవలం పురుషులకు మాత్రమే పరిమితం కాదు. 18 ఏళ్లు నిండిన మహిళలకూ తప్పనిసరిగా మిలిటరీ సర్వీస్ ఉంటుంది. ఇది 1948 నుంచే అమల్లో ఉన్న చట్టం. సాధారణంగా మహిళలు కనీసం రెండేళ్ల పాటు, కొన్ని విభాగాల్లో అయితే అంతకంటే ఎక్కువ కాలం సేవలందించాల్సి ఉంటుంది. అందుకే ఇజ్రాయెల్‌ ఆర్మీలో కనిపించే మహిళల వయసు ఎక్కువగా 18 నుంచి 21 ఏళ్ల మధ్యే ఉంటుంది. ఆ వయసులో సహజంగానే యువతలో చురుకుదనం, ఆరోగ్యకరమైన రూపం కనిపిస్తుంది. దీనినే చాలామంది 'అందం’గా భావించి, ఎంపికలో అదే కారణమని అనుకుంటారు.

ఆ అంశానికి ఎక్కడా స్థానం లేదు..

అసలు విషయానికి వస్తే… ఇజ్రాయెల్‌ ఆర్మీ నియామకాల్లో అందం అనే అంశానికి ఎక్కడా స్థానం లేదు. శారీరక సామర్థ్యం, మానసిక బలం, విద్యార్హతలు, సాంకేతిక నైపుణ్యం వంటి అంశాలే ప్రధాన ప్రమాణాలు. సైన్యంలో చేరక ముందే యువతకు కఠినమైన ఫిట్‌నెస్‌ పరీక్షలు, మానసిక మూల్యాంకనం జరుగుతుంది. ఎంపికైన తర్వాత ఆయుధాల వినియోగం, సైబర్‌ భద్రత, ఇంటెలిజెన్స్‌, ఇంజినీరింగ్‌ వంటి కీలక రంగాల్లో శిక్షణ ఇస్తారు. ఇది పురుషులకూ, మహిళలకూ సమానంగా ఉంటుంది.

ప్రత్యేక ఇమేజ్‌

మరో ముఖ్యమైన అంశం సోషల్ మీడియా. ఇజ్రాయెల్‌లో సైనికులు కొన్ని నియమాల పరిధిలో స్మార్ట్‌ఫోన్లు వాడుకోవచ్చు. విధుల్లో ఉన్నప్పుడో, సెలవుల్లోనో చాలా మంది మహిళా సైనికులు తమ యూనిఫాంలో ఫొటోలు పోస్ట్ చేస్తుంటారు. అవి అందంగా, ఆకర్షణీయంగా కనిపించడం సహజం. కానీ అలాంటి ఫొటోలు మాత్రమే వైరల్ అవుతాయి. సాధారణంగా కష్టసాధ్యమైన శిక్షణ, యుద్ధ పరిస్థితుల దృశ్యాలు అంతగా వైరల్ కావు. దీంతో ప్రపంచవ్యాప్తంగా ఒక ప్రత్యేక ఇమేజ్‌ ఏర్పడింది.

గ్లామర్‌ ఇమేజ్‌ను సాఫ్ట్‌ పవర్‌లా

ఇదే అంశాన్ని ఆధారంగా చేసుకుని కొందరు విమర్శకులు మరో వాదన తెరపైకి తీసుకొచ్చారు. ఇజ్రాయెల్‌ తన ఆర్మీని “మోడ్రన్‌, కూల్‌, ప్రోగ్రెసివ్‌”గా చూపించేందుకు మహిళా సైనికుల గ్లామర్‌ ఇమేజ్‌ను సాఫ్ట్‌ పవర్‌లా వాడుతోందని వారు ఆరోపిస్తున్నారు. యుద్ధ భీకరతను, పాలస్తీనా ప్రాంతాల్లో జరుగుతున్న మానవ హక్కుల ఉల్లంఘనలపై దృష్టి మళ్లించేందుకే ఈ తరహా చిత్రాలను ప్రోత్సహిస్తోందన్న అభిప్రాయం కూడా ఉంది. అయితే ఇవన్నీ రాజకీయ, సామాజిక విశ్లేషణలు మాత్రమే. అధికారికంగా ఇజ్రాయెల్‌ ప్రభుత్వం లేదా ఐడీఎఫ్‌ ఇలాంటి విధానాన్ని అంగీకరించిన సందర్భం లేదు.

ఆర్మీలో కీలక పాత్ర

వాస్తవానికి మహిళలు ఇజ్రాయెల్‌ ఆర్మీలో కీలక పాత్ర పోషిస్తున్నారు. ఇంటెలిజెన్స్‌, ఎయిర్‌ డిఫెన్స్‌, సైబర్‌ యూనిట్లతో పాటు కొన్ని యుద్ధ విభాగాల్లోనూ మహిళలు సేవలందిస్తున్నారు. హమాస్‌ చేసిన దాడుల సమయంలో మహిళా సైనికులు ముందు వరుసలో విధులు నిర్వహించారు. కొందరు ప్రాణాలు కోల్పోగా, మరికొందరు బందీలయ్యారు కూడా. ఇవన్నీ చూస్తే… ఆర్మీలో మహిళల పాత్ర కేవలం ప్రచారానికే పరిమితం కాదని స్పష్టమవుతుంది.

మొత్తానికి, ఇజ్రాయెల్‌ ఆర్మీ అందమైన అమ్మాయిల్నే ఎంపిక చేస్తుంది అన్నది ఒక సోషల్ మీడియా మిథ్‌ మాత్రమే. తప్పనిసరి సైనిక సేవ, యువ వయసు, కఠినమైన శిక్షణ వల్ల ఏర్పడే ఫిట్‌నెస్‌, వైరల్ అయ్యే ఫొటోలు… ఇవన్నీ కలిసి ఆ ప్రచారానికి కారణమయ్యాయి. కానీ వాస్తవంలో మాత్రం ఐడీఎఫ్‌ ఎంపికలు పూర్తిగా వృత్తిపరమైన ప్రమాణాల ఆధారంగానే జరుగుతాయి. అందం కాదు… సామర్థ్యమే అక్కడ అసలు అస్త్రం.

English summary

This article profiles Israel Defense Forces women serving in frontline border duties along the southern frontier with Egypt, detailing training, teamwork, duty, and the impact on national security. It highlights leadership by K and Y, gender equality in service, and the demanding conditions faced at the border.