చేతులకు సంకెళ్లతో బందీగా న్యూయార్క్ లో మదురో: గుడ్ నైట్, హ్యాపీ న్యూ ఇయర్ అంటూ విష్.. !!

వెనెజులాలో అమెరికా సైనిక చర్య ప్రపంచ రాజకీయాల్లో ప్రకంపనలు సృష్టించింది. రాజధాని కరాకస్‌పై దాడి అనంతరం ఆ దేశాధ్యక్షుడు నికోలస్ మదురోను అరెస్టు చేసి న్యూయార్క్‌కు తరలించారు. 'ఆపరేషన్ అబ్‌సొల్యూట్ రిసాల్వ్'గా దీనికి పేరు పెట్టింది అమెరికా. వెనెజులా ప్రస్తుతానికి తమ నియంత్రణలో ఉంటుందని అధ్యక్షుడు డొనాల్డ్ ట్రంప్ ప్రకటించారు. త్వరలోనే కొత్త అధ్యక్షుడిని నియమిస్తామనీ పేర్కొన్నారు.

అమెరికా వైమానిక దాడుల్లో భారీ ప్రాణ, ఆస్తి నష్టం సంభవించింది. కరాకస్‌లో కనీసం 40 మంది మరణించినట్లు 'ది న్యూయార్క్ టైమ్స్' వెల్లడించింది. వెనెజులా ప్రభుత్వ అధికారి ఒకరు ఈ విషయాన్ని ధృవీకరించినట్లు తెలిపింది. జనవరి 3న ఆరంభమైన 'ఆపరేషన్ అబ్‌సొల్యూట్ రిసాల్వ్'లో భాగంగానే ఈ దాడులు జరిగాయని ఆ అధికారిని ఉటంకిస్తూ న్యూయార్క్ టైమ్స్ ఓ ప్రత్యేక కథనాన్ని ప్రచురించింది.

ఆపరేషన్ సమయంలోనే అమెరికా సైనికులు నికొలస్ మదురోను అదుపులోకి తీసుకున్నారు. ఆయనను తీసుకువచ్చిన ప్రత్యేక సైనిక విమానం న్యూయార్క్‌లోని స్టువర్ట్ ఎయిర్ నేషనల్ గార్డ్ బేస్‌లో ల్యాండ్ అయింది. ఆ వెంటనే కట్టుదిట్టమైన భద్రత మధ్య మదురోను విమానం నుండి దించుతూ కనిపించారు సైనికులు. డజనుకు పైగా ఫెడరల్ ఏజెంట్లు ఆయనను చుట్టుముట్టారు. మొత్తం 30 మందికి పైగా అమెరికా ఏజెంట్లు రన్‌వేపై మోహరించారు.

JUST IN: 🇻🇪🇺🇸 Close up video of Nicolás Maduro being escorted out of a plane by US authorities in New York after being kidnapped from #Venezuela. pic.twitter.com/m5lvmfLMvv

— Commentary: Trump Truth Social Posts On X (@TrumpTruthOnX) January 4, 2026

అమెరికా కాలమానం ప్రకారం సమయం సాయంత్రం 5:25 నిమిషాలకు.. మదురో న్యూయార్క్ గడ్డపై కాలుపెట్టారు. భద్రతా వలయం మధ్య టార్మాక్ దాటారు. దీనికి సంబంధించిన కొన్ని ఫొటోలు సోషల్ మీడియాలో విడుదల అయ్యాయి. జియాన్స్ ఆఫ్ ఇజ్రాయెల్ అనే యూజర్ ఈ ఫొటోలను తన అధికారిక ఎక్స్ అకౌంట్ లో పోస్ట్ చేశారు. చేతులకు బేడీలతో కనిపించారు మదురో. లేత నీలం రంగు స్వెట్టర్, క్యాప్ ధరించి కనిపించారు.

'GOOD NIGHT HAPPY NEW YEAR' MADURO 1ST WORDS AT NYC DEA pic.twitter.com/mvCIjOWiXi

— RT (@RT_com) January 4, 2026

ఈ ఘటనకు ముందు, అధ్యక్షుడు డొనాల్డ్ ట్రంప్.. మదురో ఫోటోను షేర్ చేశారు. అందులో నికోలస్ మదురోకు సంకెళ్ళు వేసి, కళ్లకు గంతలు కట్టి అమెరికా యుద్ధనౌకపై కనిపించారు. వెనెజులా వైమానిక రక్షణ వ్యవస్థను ధ్వంసం చేయడానికి 150కి పైగా సైనిక విమానాలను మోహరించారు. ఇది ప్రత్యేక ఆపరేషన్ దళాల హెలికాప్టర్లు మదురో నివాసానికి చేరడానికి మార్గం సుగమం చేసింది. స్థానిక సమయం తెల్లవారుజామున 2 గంటలకు అమెరికా ప్రత్యేక బలగాలు మదురో నెలవుపై దాడి చేసి అరెస్టు చేశాయి.

English summary

US forces captured Maduro in Caracas after a swift military operation, aiming to curb drug trafficking and regional instability, plunging Venezuela into political uncertainty.