'విజన్ 2030'తో గేమ్ ఛేంజ్!: సముద్రంలో ట్రిలియన్ డాలర్లు!

Saudi Arabia: శతాబ్ధాలుగా సౌదీ అరేబియా ముస్లిమేతరులకు మూసి ఉన్న దేశంగా ఉండేది. సౌదీ పర్యాటకం కోసం నాన్-ముస్లిం వీసాలు మంజూరు చేయలేదు. మక్కా, మదీనా వంటి పవిత్ర స్థలాలను సందర్శించడానికి మాత్రమే అనుమతి ఉండేది. అయితే 2019లో సౌదీ అరేబియాలో పరిస్థితి మారింది. సౌదీ క్రౌన్ ప్రిన్స్ మొహమ్మద్ బిన్ సుల్తాన్ పర్యాటకుల కోసం కింగ్‌డమ్‌ను తెరవాలని నిర్ణయించుకున్నారు. గత ఆరేళ్లుగా సౌదీ అరేబియాలో పరిస్థితి మారుతూ వస్తోంది. యాత్రికులతో పాటు లగ్జరీ కోసం వచ్చే పర్యాటకులను ఆకర్షించడానికి సౌదీ అరేబియా ప్రయత్నిస్తోంది. బీచ్ లో బికినీలతో ఈత కొట్టడానికి వచ్చే పర్యాటకులను కూడా ఆకర్షించేందుకు యత్నిస్తోంది.

విజన్ 2030.. చమురుపై ఆధారపడటం తగ్గించడం
సౌదీ అరేబియా 'విజన్ 2030' ప్రాజెక్టులో పర్యాటకం ఓ కీలక భాగంగా నిలుస్తోంది. ఈ జాబితాలో ఎర్ర సముద్రం(Red Sea) ప్రాజెక్టు అగ్రస్థానంలో ఉంది. ప్రాథమిక అంచనాల ప్రకారం.. 2035 నాటికి సౌదీ అరేబియా ఎర్ర సముద్రంపై 1 ట్రిలియన్ డాలర్లు (వెయ్యి బిలియన్ డాలర్లు) ఖర్చు చేయనుంది. చమురుపై దేశం ఆధారపడటాన్ని తగ్గించి.. స్థిరమైన ఆదాయ వనరులను సృష్టించడానికి పర్యాటక రంగాన్ని అభివృద్ధి చేయాలని సౌదీ అరేబియా కృతనిశ్చయంతో ఉంది. విజన్ 2030లో భాగం పర్యాటకం ద్వారా జీడీపీకి 10 శాతం కంటే ఎక్కువ సహకారం అందించాలని లక్ష్యంగా పెట్టుకుంది. లగ్జరీ కోసం వచ్చే పర్యాటకులను ఆకర్షించడానికి మక్కా-మదీనాకు మించిన సౌదీ అరేబియా 'మరో' కోణాన్ని ప్రపంచానికి చూపించడానికి ఈ పెట్టుబడి దోహదపడుతుంది. ఈ ప్రాజెక్టు ద్వారా దేశ పౌరులకు భారీగా ఉపాధి అవకాశాలు లభించే అవకాశం ఉంది.

సౌదీ అరేబియాలో 'మాల్దీవులు'
సౌదీ అరేబియా పశ్చిమ తీరంలో 90 ద్వీపాలను కలిగి ఉన్న ఎర్ర సముద్ర ఆర్కిపెలాగో ఉంది. సౌదీ తన సరిహద్దుల్లోనే మెరుగైన ఉష్ణోగ్రతలతో, ఉష్ణమండల అనుభూతిని ఇచ్చే మాల్దీవులు వంటి గమ్యస్థానాన్ని సృష్టించాలని చూస్తోంది. ఇక్కడ వాతావరణం ఏప్రిల్ నెలలో కూడా 24 డిగ్రీల సెల్సియస్ చుట్టూ చల్లగా ఉంది. 2030 నాటికి 50 కొత్త విలాసవంతమైన రిసార్టులు ఎర్ర సముద్ర తీరాన్ని అలంకరించనున్నాయి.
ఇప్పటికే ప్రారంభమైన వాటిలో సెంట్ రెజిస్ రెడ్ సీ (St Regis Red Sea), సిక్స్ సెన్సెస్ సదరన్ డూన్స్ (Six Senses Southern Dunes) వంటివి ఉన్నాయి.

సెంట్ రెజిస్ రెడ్ సీలో అత్యల్ప స్థాయి విల్లా ధర రెండు వ్యక్తులకు సుమారు రూ.2.5 లక్షలు. ఇక్కడకు చేరుకోవడానికి ప్రత్యేకమైన సీప్లేన్ లేదా స్పీడ్‌బోట్ సౌకర్యాలు ఉన్నాయి. ఇది "పరిమితులు లేని లగ్జరీ" (Luxury Without Limits) అనే ట్యాగ్‌లైన్‌తో మార్కెట్ అవుతోంది. ఈ ఎర్ర సముద్రం ప్రాజెక్టులో భాగంగా సౌదీ అరేబియా పరిరక్షించబడిన పగడపు దిబ్బలను, సముద్ర జీవరాశిని ప్రపంచ ఆకర్షణలుగా మార్చడానికి యత్నిస్తోంది. ఈ ప్రాంతంలోని అన్ని గమ్యస్థానాలకు 100 శాతం పునరుత్పాదక శక్తితో (Renewable Energy) విద్యుత్ సరఫరా చేయబడుతుంది. సౌదీలోని సెంట్ రెజిస్ రిసార్టులో అన్ని విల్లాలలో ప్రైవేట్ పూల్స్ ఉన్నాయి. సిక్స్ సెన్సెస్ రిసార్ట్‌లో ఆయుర్వేదం, బ్యూటీ థెరపీలు వంటి వెల్నెస్ సేవలకు ప్రాధాన్యత ఇస్తున్నారు.

సామాజిక మార్పుకు సూచన
సౌదీ అరేబియాలో ప్రస్తుతం మద్యం అనుమతించబడదు. అయితే రియాద్‌లో నాన్-ముస్లిం దౌత్యవేత్తల కోసం ఒక లిక్కర్ స్టోర్ ప్రారంభం కావడంతో, భవిష్యత్తులో ఈ పర్యాటక ప్రాంతాల్లో ఆంక్షలు సడలించే అవకాశం ఉందని సంకేతాలు వెలువడుతున్నాయి. ఈ భారీ పెట్టుబడి ద్వారా సౌదీ అరేబియా ప్రపంచంలో తన స్థానాన్ని మార్చుకోవాలని, చారిత్రక, సాంస్కృతిక, మతపరమైన అంశాలకు అతీతంగా విలాసవంతమైన పర్యాటక కేంద్రంగా ఎదగాలని కోరుకుంటోంది.

సౌదీ అరేబియా ఈ ప్రతిష్టాత్మక పర్యాటక ప్రాజెక్ట్ విజయం సాధిస్తోందనడానికి సూచనగా.. 2023లో 23 మిలియన్ల అంతర్జాతీయ పర్యాటకులు రాగా, 2024లో ఆ సంఖ్య 29.7 మిలియన్లకు పెరిగింది. ఇది దేశ జీడీపీలో దాదాపు 4 శాతం సహకారం అందిస్తోంది.

English summary

Saudi is investing $1 trillion in Red Sea tourism as part of Vision 2030 to reduce oil dependency. Luxury resorts, marine conservation, social transformation aim to turn the Kingdom into a global travel hotspot.