'న్యాయవ్యవస్థ అంతా అవినీతిమయం': ట్రంప్ తీవ్ర ఆగ్రహం
అమెరికా అధ్యక్షుడు డొనాల్డ్ ట్రంప్ ఫెడరల్ న్యాయ వ్యవస్థపై మరోసారి తీవ్ర స్థాయిలో విరుచుకుపడ్డారు. తన పరిపాలనా నిర్ణయాలు, ఆర్థిక విధానాలకు వ్యతిరేకంగా కోర్టుల నుంచి వరుసగా వస్తున్న ప్రతికూల తీర్పులపై ఆయన తీవ్ర అసహనం వ్యక్తం చేశారు. ముఖ్యంగా వాషింగ్టన్లోని చారిత్రాత్మక 'కెన్నెడీ సెంటర్' వివాదం, టారిఫ్లపై సుప్రీంకోర్టు ఇచ్చిన ఆదేశాలను ఆయన తప్పుబట్టారు. "మన రాజకీయ వ్యవస్థ ఎంత అవినీతిమయంగా మారిందో.. కోర్టుల వ్యవస్థా అంతే దారుణంగా, మోసపూరితంగా తయారైంది" అంటూ శనివారం తన సొంత సోషల్ మీడియా వేదిక 'ట్రూత్ సోషల్’లో ట్రంప్ ఘాటుగా పోస్టు చేశారు. దేశ ప్రజలకు ఈ వాస్తవాలన్నీ తెలుసని, అందుకే వారు తనను భారీ మెజారిటీతో అధ్యక్షుడిగా గెలిపించారని పేర్కొన్న ఆయన.. దేశ ప్రయోజనాల కోసం చివరివరకు పోరాడతానని స్పష్టం చేశారు.
ట్రంప్కు డబుల్ స్ట్రోక్.. ప్రతిష్టకు భంగం
ఇరాన్తో దౌత్యపరమైన చిక్కులు ఎదుర్కొంటున్న తరుణంలోనే, ట్రంప్కు శుక్రవారం న్యాయస్థానాల నుంచి రెండు ప్రధాన ఎదురుదెబ్బలు తగిలాయి. 'మేక్ అమెరికా గ్రేట్ అగైన్' (MAGA) ఎజెండాను ముందుకు తీసుకెళ్లడానికి, ఫెడరల్ సంస్థలను పునర్నిర్మించడానికి ఆయన చేస్తున్న ప్రయత్నాలకు ఈ తీర్పులు తీవ్ర ఆటంకంగా మారాయి. వాషింగ్టన్ డిస్ట్రిక్ట్ జడ్జి క్రిస్టోఫర్ కూపర్ సంచలన ఆదేశాలు జారీ చేస్తూ.. కెన్నెడీ సెంటర్ ఫర్ ది పెర్ఫార్మింగ్ ఆర్ట్స్ భవన ముఖభాగం, అధికారిక సామగ్రి, బ్రాండింగ్ నుంచి 'ట్రంప్' పేరును రెండు వారాల్లోగా తొలగించాలని స్పష్టం చేశారు. అలాగే, రెండేళ్ల పునరుద్ధరణ ప్రాజెక్టు నెపంతో ఈ వేసవిలో సాంస్కృతిక కేంద్రాన్ని మూసివేయాలన్న ప్రతిపాదనను కూడా జడ్జి నిలిపివేశారు. ఇలాంటి నిర్ణయాలు తీసుకునే అధికారం కేవలం కాంగ్రెస్కు మాత్రమే ఉందని న్యాయమూర్తి స్పష్టం చేయడం.. వాషింగ్టన్లోని ప్రముఖ సంస్థపై తన ముద్ర వేయాలనుకున్న ట్రంప్ ఆశలకు పెద్ద అవమానంగా పరిణమించింది.
న్యాయమూర్తులపై వ్యక్తిగత ఆరోపణలు
కెన్నెడీ సెంటర్ వ్యవహారంలో తీర్పునిచ్చిన యూఎస్ డిస్ట్రిక్ట్ జడ్జి క్రిస్టోఫర్ కూపర్పై ట్రంప్ వ్యక్తిగత విమర్శలకు దిగారు. మాజీ అధ్యక్షుడు బరాక్ ఒబామా హయాంలో నియమితులైన కూపర్ నిష్పాక్షికంగా వ్యవహరించడం లేదని ఆరోపించారు. కూపర్ భార్య అమీ జెఫ్రెస్ రాజకీయంగా వామపక్ష భావజాలానికి అనుకూలమైన న్యాయవాది అని, గతంలో తనకు వ్యతిరేకంగా కేసులు నడిపిన వర్గాలతో ఆమెకు సంబంధాలు ఉన్నాయని ట్రంప్ పేర్కొన్నారు. ఆమె ప్రభావం వల్లే న్యాయమూర్తి ఇటువంటి పక్షపాత తీర్పులు ఇస్తున్నారని, తాను "ఒబామా జడ్జీలు" అని పిలిచే వారి నుంచి ఎప్పుడూ ఇలాంటి ప్రతికూలతలే ఎదురవుతున్నాయని మండిపడ్డారు.
రూ. 84వేల కోట్ల ($10 బిలియన్ల) ఐఆర్ఎస్ దావా మళ్లీ మొదటికి..
కెన్నెడీ సెంటర్ వివాదం నడుస్తుండగానే, కొన్ని గంటల వ్యవధిలోనే మియామిలో ట్రంప్కు మరో గట్టి షాక్ తగిలింది. ఇంటర్నల్ రెవెన్యూ సర్వీస్ (IRS)పై ట్రంప్ దాఖలు చేసిన $10 బిలియన్ల (సుమారు రూ. 84,000 కోట్లు) దావాను తిరిగి ప్రారంభిస్తున్నట్లు యూఎస్ డిస్ట్రిక్ట్ జడ్జి కాథ్లీన్ విలియమ్స్ ప్రకటించారు. గతంలో న్యాయ శాఖతో జరిగిన ఒక సంశయాస్పద ఒప్పందం తర్వాత ట్రంప్ స్వచ్ఛందంగా ఈ కేసును ఉపసంహరించుకున్నారు. అయితే, ఆ రాజీ ఒప్పందం "మోసం మీద ఆధారపడిందని", "కోర్టును తప్పుదోవ పట్టించేలా ఉందనే" తీవ్ర ఆరోపణలు రావడంతో జడ్జి విలియమ్స్ ఈ వ్యవహారంపై విచారణకు ఆదేశించారు.
మాజీ ఐఆర్ఎస్ కాంట్రాక్టర్ ఒకరు ట్రంప్ పన్ను రికార్డులను లీక్ చేయడంతో ఈ వివాదం మొదలైంది. అయితే, ఈ నెల ప్రారంభంలో రాజకీయ ప్రేరేపిత ప్రభుత్వ చర్యల వల్ల నష్టపోయామని భావించే MAGA మద్దతుదారుల కోసం $1.776 బిలియన్ల నిధితో ఒక అసాధారణ రాజీ కుదిరింది. ఈ రహస్య ఒప్పందంపై చట్టపరమైన నిపుణుల నుంచి తీవ్ర విమర్శలు రావడంతో, కోర్టు తాజాగా పారదర్శకతను ప్రశ్నిస్తూ కేసును రీ-ఓపెన్ చేసింది.
పరిపాలన వర్సెస్ న్యాయవ్యవస్థ
ఇటీవలి కాలంలో చైనా, ఇరాన్ వ్యవహారాలతో పాటు దేశీయంగా వలసల అమలు, ఫెడరల్ ఉద్యోగుల పునర్వ్యవస్థీకరణ, నిధుల నిలుపుదల వంటి అనేక అంశాలలో ట్రంప్ అధికారిక ఉత్తర్వులను ఫెడరల్ కోర్టులు అడ్డుకున్నాయి. కొన్ని అప్పీళ్లలో ప్రభుత్వం విజయం సాధించినప్పటికీ, కీలక విధానాల్లో కోర్టులు పదేపదే జోక్యం చేసుకోవడం ట్రంప్ వర్గానికి మింగుడుపడటం లేదు. "ఎన్నుకోబడని న్యాయవ్యవస్థ ప్రజలు ఎన్నుకున్న అధ్యక్షుడి అధికారాలను అడ్డుకుంటోంది" అని ట్రంప్ మద్దతుదారులు వాదిస్తుండగా.. శ్వేతసౌధం యొక్క మితిమీరిన అధికారాలకు, ఏకపక్ష నిర్ణయాలకు అడ్డుకట్ట వేసే ఏకైక రాజ్యాంగ రక్షణ వ్యవస్థ న్యాయవ్యవస్థేనని విమర్శకులు స్పష్టం చేస్తున్నారు. రాజకీయంగా ఎంతటి శక్తివంతుడైనా న్యాయస్థానాల ముందు తలవంచాల్సిందేనని తాజా తీర్పులు నిరూపిస్తున్నాయి.
Click it and Unblock the Notifications
Sign in with Google