గ్రీన్ కార్డ్ దరఖాస్తుదారులకు ట్రంప్ బిగ్ షాక్..! అమెరికా వీడాల్సిందే..!

అమెరికాలో విదేశీయుల్ని టార్గెట్ చేస్తూ ఎప్పటికప్పుడు నిబంధనల్లో మార్పులు చేస్తున్న ట్రంప్ సర్కార్ తాజాగా మరో కీలక నిర్ణయం తీసుకుంది. గ్రీన్ కార్డు (US Green Card) దరఖాస్తు దారులకు షాకిచ్చేలా కొత్త రూల్ ను తీసుకొచ్చింది. ఇప్పటివరకూ వివిధ వీసాలపై అమెరికాకు వచ్చి అక్కడ పని చేసుకుంటూ.. అక్కడి నుంచే గ్రీన్ కార్డులకు దరఖాస్తు చేసుకుంటున్న విదేశీయులకు అదేమీ చెల్లదంటూ తేల్చేసింది. దీంతో అమెరికాలో ఉంటూ గ్రీన్ కార్డుకు దరఖాస్తు చేసుకోవడం కుదరదని తేలిపోయింది.

తాత్కాలిక వీసాలపై అమెరికాలో ఉన్న విదేశీయులు శాశ్వత నివాసం కోసం గ్రీన్ కార్డ్ కు దరఖాస్తు చేసుకునే విధానాన్ని ప్రాథమికంగా మార్చే ఒక కొత్త విధానాన్ని అమెరికా ప్రభుత్వం జారీ చేసింది. ఈ కొత్త నిబంధనల ప్రకారం చాలా మంది అమెరికాలో ఉంటూ దరఖాస్తు చేసుకోవడానికి బదులుగా, తమ స్వదేశానికి తిరిగి వెళ్లవలసి ఉంటుంది. దీంతో చాలా విషయాలు మారబోతున్నాయి. గతంలో విద్యార్థి, పర్యాటక లేదా పని వీసాలపై అమెరికాలో నివసిస్తున్న చాలా మంది విదేశీయులు దేశం విడిచి వెళ్లకుండానే గ్రీన్ కార్డ్ కు దరఖాస్తు చేసుకోగలిగేవారు. 'అడ్జస్ట్‌మెంట్ ఆఫ్ స్టేటస్' అని పిలిచే ఈ ప్రక్రియ అందరిికీ సౌలభ్యంగా ఉండేది. కానీ ఇప్పుడు దీన్ని యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ కొత్త విధానం ప్రకారం పరిమితంగా, అసాధారణమైన సందర్భాలలో మాత్రమే ఆమోదిస్తారు.

ఈ విధానంలో గ్రీన్ కార్డ్ కోసం దరఖాస్తు చేసుకోవాలని ప్లాన్ చేస్తున్న తాత్కాలిక, నాన్-ఇమ్మిగ్రెంట్ వీసాపై యూఎస్‌లో ఉన్న విద్యార్థులు, పర్యాటకులు, తాత్కాలిక కార్మికులతో సహా ప్రతి ఒక్కరినీ ప్రభావితం చేస్తుంది. దీర్ఘకాలంగా ఉన్న ఇమ్మిగ్రేషన్ చట్టం, ఇమ్మిగ్రేషన్ కోర్టు తీర్పులకు అనుగుణంగా, స్టేటస్ సర్దుబాటు కోరుకునే విదేశీయులు దేశం బయట ఉన్న విదేశాంగ శాఖ ద్వారా కాన్సులర్ ప్రాసెసింగ్ ద్వారానే దరఖాస్తు చేసుకోవాలని అమెరికా ప్రభుత్వం తెలిపింది. దీని ప్రకారం ఒక విదేశీయుడు ఈ అసాధారణమైన ఉపశమనానికి అర్హుడా కాదా అని నిర్ణయించేటప్పుడు, అధికారులు ప్రతి కేసును విడివిడిగా పరిశీలించి, అన్ని అంశాలను, సమాచారాన్ని పరిగణనలోకి తీసుకోవాలని ఆదేశించారు.