వీడియో వైరల్ : ఈ 77ఏళ్ల తాతయ్య దొంగకు చుక్కలు చూపించాడు..ఫిదా అయిన నెటిజెన్లు

Published: Wednesday, February 19, 2020, 17:47 [IST]

అసలే కలికాలం ఎటు చూసినా దొంగలే.. దొంగతనాలే. గతంలో ఓ వృద్ధ దంపతులను దోచుకునేందుకు వచ్చిన దొంగలపై వారు ఎలా తిరగబడ్డారో చూశాం. ఆ ఘటన మనదేశంలో జరిగితే తాజాగా మరో వృద్ధుడు ఓ దొంగను తరిమికొట్టిన తీరు అందరినీ ఆకట్టుకుంటోంది. ప్రస్తుతం ఆ వీడియో సోషల్ మీడియాలో వైరల్‌గా మారింది.

దొంగతో పోట్లాటకు దిగిన తాతయ్య

యూకేలో ఓ ఘటన చోటుచేసుకుంది. 77 ఏళ్ల వృద్ధుడినుంచి ఓ దొంగ డబ్బులు దోచుకునే ప్రయత్నం చేశాడు. ఈ వృద్ధుడు దొంగను నిలువరించిన తీరు ప్రతి ఒక్కరినీ ఆకట్టుకుంటోంది. యూకేలో కార్డిఫ్ ప్రాంతంలో ఈ ఘటన చోటుచేసుకుంది. నిర్మానుష్యమైన ప్రాంతంలో రాత్రివేళలో ఓ వృద్ధుడు తన కారును పార్కు చేసి డబ్బులు డ్రా చేసుకునేందుకు ఏటీఎం దగ్గరకు వెళ్లాడు. డబ్బులు డ్రా చేసుకున్నాడు. అంతవరకు బాగానే ఉంది. తిరిగి కారు వద్దకు వెళుతున్న సమయంలో ఓ దొంగ తనపైకి వచ్చాడు. డబ్బులు ఇవ్వాల్సిందిగా బెదిరించాడు. కానీ ఈ తాతయ్య మాత్రం బెదిరిపోలేదు సరికదా దొంగను ధీటుగా ఎదుర్కొన్నాడు.

ముసలోడు కదా.. ఈజీగా దోచేయొచ్చనుకున్నాడు

వృద్ధుడు కదా.. పైగా ఒంటరిగా దొరికాడులే అనుకున్నాడు దొంగ. పంటపండిందనుకున్నాడు. కానీ ఆ వృద్దుడు మాత్రం మామూలుగా ఆ దొంగను బెదరగొట్టలేదు. దమ్ముంటే నాపైకి రా అంటూ సవాలు విసిరినట్లుగా ఉంది. దొంగతో తాతయ్య ఫైట్ అక్కడే ఉన్న సీసీటీవీ కెమెరా కంటికి చిక్కింది. ఆ వృద్ధుడు దొంగతో చాలా ధైర్యంగా ఫైట్ చేశాడు. బేసిక్ బాక్సింగ్ స్కిల్స్‌తో దొంగ పారిపోయేలా చేశాడు. అంతేకాదు దొంగ ముఖంపై నాలుగు పంచులు కూడా విసిరాడు. ఫిబ్రవరి 18న కార్డిఫ్ పోలీసులు ఈ వీడియోను సోషల్ మీడియాలో పోస్టు చేశారు. అంతే ఒక్కరోజులోనే ఈ వీడియో తెగవైరల్ అయ్యింది.

తాతయ్య చూపిన ధైర్యంకు నెటిజెన్ల ఫిదా

అంతేకాదు ఈ వీడియోలో ఆ తాతయ్యను చూసిన నెటిజెన్లు సలామ్ చేశారు. ఆయన ప్రదర్శించిన ధైర్యసాహసాలు భేష్ అంటూ కొనియాడారు. కుర్రకారుకు తాతయ్య ఇన్స్‌పిరేషన్ అని కొందరు పోస్టులో రాసుకొచ్చారు. అందుకే అప్పుడెప్పుడో స్కూళ్లో నేర్చుకున్న బాక్సింగ్ మెలుకువలు జీవితంలో ఏదో ఒక రకంగా ఉపయోగపడుతాయని మరో నెటిజెన్ కామెంట్ పోస్టు చేశాడు. ఆ వయస్సుల్లో ఈ తాతయ్య ఓ దొంగను బెదరగొట్టాడంటే గ్రేట్.. హ్యాట్సాఫ్ అంటూ మరికొందరు నెటిజెన్లు తాతయ్యను పొగడ్తలతో ముంచెత్తారు.

Published On February 19, 2020