తెలంగాణలో కుండపోత.. హైదరాబాద్కు హై అలర్ట్!
రాయలసీమ, తెలంగాణ ప్రాంతాల మీదుగా కొనసాగుతున్న ఉపరితల ద్రోణి కారణంగా.. తెలంగాణ రాష్ట్రంలోని పలు జిల్లాల్లో కుండపోత వర్షం కురుస్తోంది. రెండు రోజులపాటు భారీ వర్షాలు పడే అవకాశాలున్నట్టు వాతావరణ
హైదరాబాద్: రాయలసీమ, తెలంగాణ ప్రాంతాల మీదుగా కొనసాగుతున్న ఉపరితల ద్రోణి కారణంగా.. తెలంగాణ రాష్ట్రంలోని పలు జిల్లాల్లో కుండపోత వర్షం కురుస్తోంది. రెండు రోజులపాటు భారీ వర్షాలు పడే అవకాశాలున్నట్టు వాతావరణ శాఖ హెచ్చరించింది.
మరోవైపు భారీ వర్ష సూచన నేపథ్యంలో హైదరాబాద్ లో హై అలర్ట్ విధించారు. అత్యవసరమైతే తప్ప ప్రజలు ఇళ్ల నుంచి బయటకు రావొద్దని అధికారులు సూచిస్తున్నారు. మరోవైపు ఉపరితల ద్రోణి కారణంగా తెలంగాణలోని పలు జిల్లాల్లో భారీ వర్షం కురుస్తోంది.
హైదరాబాద్ లో...
బుధవారం తెల్లవారుజాము నుంచే హైదరాబాద్ నగర వ్యాప్తంగా దట్టమైన మేఘాలు అలుముకోవడంతో వాతావరణం అంధకారంగా మారింది. ఉదయం తొమ్మిది గంటల సమయంలో 40 నిమిషాల పాటు భారీ వర్షం కురిసింది. ఉప్పల్, రామాంతాపూర్, ఎల్బీనగర్, వనస్థలిపురం, హయత్నగర్, అబ్దుల్లాపూర్మెట్, దిల్సుఖ్నగర్, చైతన్యపురి, కొత్తపేట తదిరత ప్రాంతాల్లో కుండపోత వర్షం కురుసింది. వరదల వల్ల ట్రాఫిక్ జాం ఏర్పడటం, చుట్టూ చీకట్లు అలుముకోవడం, గణేష్ విగ్రహాల నిమజ్జనం ఇంకా కొనసాగుతుండటంతో వాహనదారులు తీవ్ర ఇబ్బందులు పడుతున్నారు. ఈదురుగాలులు వీస్తుండటంతో పలు ప్రాంతాల్లో విద్యుత్ సరఫరా నిలిపేశారు.
వరంగల్ నగరంలో కూడా...
మరోవైపు వరంగల్ నగరాన్ని కుండపోత వర్షం ముంచెత్తింది. ఉదయం నుంచి కురుస్తున్న వర్షానికి నగరం మొత్తం తడిసి ముద్దయింది. హన్మకొండ, ఖాజీపేట, హసన్పర్తి తదితర ప్రాంతాల్లో జోరుగా వర్షం పడింది. ఫలితంగా నగరంలోని ప్రధాన రోడ్లన్నీ చెరువులను తలపిస్తున్నాయి. లోతట్టు ప్రాంతాలు నీటమునిగి, ఇళ్లల్లోకి నీరు చేరడంతో ప్రజలు అవస్థలు పడుతున్నారు. భారీ వర్షానికి వరంగల్ నగరంలోని పలు ప్రైవేట్ పాఠశాలలకు సెలవు ప్రకటించారు.
జయశంకర్ భూపాలపల్లి జిల్లాల్లోనూ...
వరంగల్ రూరల్, జయశంకర్ భూపాలపల్లి జిల్లాల్లోనూ భారీ వర్షం కురుస్తోంది. నర్సంపేట ప్రాంతంలో ఈదురుగాలుల ధాటికి మొక్కజొన్న పంట నేలకొరిగింది. కష్టపడి వేసుకున్న పంట దెబ్బతినడంతో రైతులు ఆవేదన వ్యక్తం చేస్తున్నారు.
పొంగిపొర్లుతున్న గౌరంవాగు...
జయశంకర్ భూపాలపల్లి జిల్లాలో భారీ వర్షం ధాటికి గౌరంవాగు పొంగిపొర్లుతోంది. వరద ఉధృతికి బైపాస్ రోడ్డు తెగిపోవడంతో 20 గ్రామాలకు రాకపోకలు నిలిచిపోయాయి. కరీంనగర్, పెద్దపల్లి జిల్లాల్లోనూ భారీ వర్షం కురుస్తోంది. కరీంనగర్ నగరంతో పాటు హుజురాబాద్, సైదాపూర్, జమ్మికుంట, పెద్దపల్లి, కమాన్పూర్, గోదావరిఖనిలో కుండపోత వర్షం కురిసింది.
Click it and Unblock the Notifications
Sign in with Google