Kanakai Waterfalls: 'తెలంగాణ స్విట్జర్లాండ్' చూసి తీరాల్సిందే..

అడవుల అందాల మధ్య దాగి ఉన్న ఈ జలపాతం చాలా కొద్దిమందికి మాత్రమే తెలుసు. తెలంగాణ స్విట్జర్లాండ్ గా పిలువబడుతున్న ఈ జలపాతం అందాలను చూడాలంటే ఒక్కసారైనా విజిట్ చేయాల్సిందే. ఆదిలాబాద్ అడవుల మధ్య ఈ జలపాతం దాగి ఉంది. ఆదిలాబాద్ జిల్లా బజార్ హాత్నూర్ మండలం గిర్నూర్ గ్రామ శివార్లలో కడెం నదిపై సహజంగా ఈ వాటర్ ఫాల్స్ ఏర్పడ్డాయి. శీతాకాలంలో ఆదిలాబాద్ అడవులు 'తెలంగాణ స్విట్జర్లాండ్' ను తలపిస్తాయి. ఆ అడవుల్లో దాగి ఉన్న ఈ జలపాతాన్ని సందర్శించే క్రమంలో టూరిస్టులు గొప్ప అనుభూతికి లోనవుతారు. ఇక్కడ నీరు దాదాపు 30 అడుగుల ఎత్తు నుంచి 100 అడుగుల వెడల్పుతో పెద్ద కొలనులోకి దుంకుతుంది.

ఈ జలపాతాన్ని కనకాయి జలపాతం లేదా కనకదుర్గ వాటర్ ఫాల్స్ అని అంటారు. ఈ జలపాతం చుట్టపక్కల గ్రామాల ప్రజలు ఇక్కడి కనకదుర్గమ్మ ఆలయానికి వచ్చి ప్రత్యేక పూజలు నిర్వహించేవాళ్లు. అలా ఈ జలపాతానికి ఆ పేరు వచ్చింది. వాటర్ ఫాల్స్ చుట్టుపక్కల పచ్చని పచ్చిక బయళ్లు.. దట్టమైన అడవి.. కొండలూ ఇవన్నీ కలిపి చూపరులను ఆకట్టుకుంటున్నాయి. అందుకే ఈ ప్రాంతాన్ని 'తెలంగాణ స్విట్జర్లాండ్' అని పిలుచుకుంటారు. ఇటీవలికాలంలో కొందరు ఔత్సాహికులు సామాజికమాధ్యమాల్లో ఈ జలపాతం అందాలను వైరల్ చేయడంతో పర్యటకుల తాకిడి పెరిగింది.

హైదరాబాద్ లాంటి సిటీలో బిజీబిజీగా గడిపే టెకీలు, ఇతర ఉద్యోగులు వారాంతంలో ఈ ప్రాంతానికి వస్తే అన్నీ మరచిపోతారు. ఇక్కడి పక్షుల రాగాలు మనల్ని మైమరపింపజేస్తాయి. ఆదిలాబాద్ అడవుల మధ్య కడెం నది అందాలు చూపరులను ఆశ్చర్యపరుస్తాయి. ఈ ప్రదేశం ఆదిలాబాద్ నుంచి 35 కి. మీ. దూరంలో అలాగే నిర్మల్ నుంచి 54 కి. మీ. దూరంలో ఉంటుంది. ఇక హైదరాబాద్ నుంచి ఈ జలపాతం 272 కి. మీ. ఉంటుంది. వారాంతంలో ఉదయం వెళ్లి సాయంత్రం రావడానికి వీలుగా ఉంటుంది. అంతేకాక ఇక్కడ ట్రెక్కింగ్ వెసులుబాటు కూడా ఉంది. ట్రెక్కింగ్ పై ఆసక్తి ఉన్నవారికి ఇది స్వర్గధామంగా ఉంటుంది.