ఘోర రోడ్డు ప్రమాదం.. చీకట్లో కలిసిన 9 మంది ప్రాణాలు..
సంగారెడ్డి జిల్లా జహీరాబాద్ సమీపంలో జాతీయ రహదారిపై వరుసగా చోటుచేసుకున్న రెండు వేర్వేరు భయానక ప్రమాదాలు తొమ్మిది మంది ప్రాణాలను బలిగొన్నాయి. కూలీలతో వెళ్తున్న ఆటోను వేగంగా వచ్చిన ట్యాంకర్ బలంగా ఢీకొట్టడంతో ఏడుగురు అక్కడికక్కడే కన్నుమూశారు. ఈ దారుణం జరిగిన కొన్ని క్షణాల్లోనే అదే రహదారిపై మూడు కార్లు వరుసగా ఢీకొనడంతో మరో ఇద్దరు ప్రాణాలు కోల్పోయారు. నిమిషాల వ్యవధిలోనే ప్రశాంతంగా ఉన్న రహదారి మృతదేహాలతో, క్షతగాత్రుల ఆర్తనాదాలతో రక్తాసిక్తంగా మారింది.
కూలీల కుటుంబాల్లో చీకట్లు: ట్యాంకర్ ధాటికి ఏడుగురు మృతి
జహీరాబాద్ మండలం సత్వార్ సరిహద్దుల వద్ద ఈ మొదటి విషాదం చోటుచేసుకుంది. కర్ణాటకలోని బీదర్ జిల్లా రాజగిరి గ్రామానికి చెందిన 14 మంది వ్యవసాయ కూలీలు నిత్యంలాగే పొలం పనుల కోసం ఆటోలో జహీరాబాద్ పరిసర ప్రాంతాలకు బయలుదేరారు. మార్గమధ్యంలో వేగంగా వచ్చిన ట్యాంకర్ ఆటోను ఢీకొనడంతో ఆటో పూర్తిగా నుజ్జునుజ్జయ్యింది. ఈ ఘటనలో ఏడుగురు కూలీలు దారుణంగా ప్రాణాలు కోల్పోగా, మరో ఐదుగురికి తీవ్ర గాయాలయ్యాయి. గమనించిన స్థానికులు వెంటనే స్పందించి బాధితులను జహీరాబాద్ ఏరియా ఆసుపత్రికి తరలించారు.
అదే హైవేపై మరో విషాదం: కార్లు వరుసగా ఢీకొని ఇద్దరు మృతి
ఆటో ప్రమాద కలకలం రేగుతుండగానే, అదే జాతీయ రహదారిపై మరో ఘోరం జరిగింది. అదుపుతప్పిన మూడు కార్లు ఒకదానినొకటి వరుసగా ఢీకొన్నాయి. ఈ రెండో ప్రమాదంలో మరో ఇద్దరు అక్కడికక్కడే ప్రాణాలు వదిలారు. ఇందులో తీవ్రంగా గాయపడిన మరో ముగ్గురి పరిస్థితి అత్యంత విషమంగా ఉండటంతో వారిని ఆసుపత్రిలోని అత్యవసర విభాగానికి తరలించి చికిత్స అందిస్తున్నారు. ఒకే రహదారిపై స్వల్ప వ్యవధిలో 9 మంది మృతి చెందడంతో ప్రాంతమంతా తీవ్ర విషాద ఛాయలు అలుముకున్నాయి. పోలీసులు కేసులు నమోదు చేసి దర్యాప్తు చేస్తున్నారు.
Click it and Unblock the Notifications
Sign in with Google