అమెరికాలో అన్నమయ్య జయంతి ఉత్సవం

సన్నివేల్(అమెరికా): అన్నమయ్య జయంతి ఉత్సవం సన్నివేల్ హిందూ ఆలయంలో ఘనంగా జరుగనున్నాయి. తాళ్లపాక అన్నమాచార్య 602 జయంత్యుత్సవం సందర్భంగా సిలికానాంధ్ర ఆధ్వర్యంలో మే 29న అమెరికాలోని సన్నివేల్‌ హిందూ దేవాలయంలో సహస్రగళ సంకీర్తనార్చన ఏర్పాటు చేసినట్లు నిర్వాహకులు కూచిభొట్ల ఆనంద్‌ తెలిపారు. అన్నమయ్య సంకీర్తనా వైభవాన్ని అమెరికా వేదికపై చాటిచెప్పేందుకు గాయనీ, గాయకులు కార్యక్రమంలో పాల్గొనాలని విజ్ఞప్తి చేశారు. పోటీలో పాల్గొనేవారు 5 డాలర్లు చెల్లించి పేరు నమోదు చేసుకోవాలని సూచించారు.

గోష్టిగానం అనంతరం 108 కీర్తనలతో జరిగే సంకీర్తనార్చనలో పాల్గొనేందుకు కూడా పేరు నమోదు చేసుకోవాలని వివరించారు. మరింత సమాచారం కోసం మంగళంపల్లి వసంత [email protected] 408 446 0424, పద్మిని సెరిపెల్ల [email protected] 408 834 8764 నెంబరుకు సంప్రదించాలని తెలిపారు. ఈ కార్యక్రమంలో వేయి మంది గాయనీ, గాయకులు పాల్గొంటారు. భావములోన, బ్రహ్మకడిగిన పాదము, ఎంతమాత్రమున, పొడుగంటిమయ్య, కొండలలో నెలకొన్న, నారాయణతే నమో, ముద్దుగారె యశోద సంకీర్తలను ఏకకాలంలో, ఏకస్వరంగా గోష్టిగానం చేయనున్నట్లు తెలిపారు.