జగన్ అరెస్టుకు ఎన్నారైల డిమాండ్

వరంగల్ జిల్లా మహబూబాబాద్ మారణకాండకు కారణమైన కాంగ్రెసు పార్లమెంటు సభ్యుడు వైయస్ జగన్ ను వెంటనే ఆరెస్టు చేసి ప్రాసిక్యూట్ చేయాలని అమెరికాలోని జై తెలంగాణ ఫోరం డిమాండ్ చేసింది. ఈ మేరకు తాము ముఖ్యమంత్రి కె. రోశయ్యకు బహిరంగ లేఖ రాసినట్లు ఫోరం ప్రతినిధులు విజయకృష్ణ చాట్ల, రామ్ ఎనగంటి, జగదీశ్ బొందుగుల, శేఖర్ వేమూరి, రఘు, మనోహర్, సుదర్శన్, సుమన్, పురుషోత్తమ్, వెంగల్, అనిల్, రాజేష్, రవి ఓ ప్రటనలో తెలిపారు. కాంగ్రెసు శాసనసభ్యురాలు కొండా సురేఖ, ఆమె భర్త కొండా మురళిలను కూడా అరెస్టు చేయాలని వారు డిమాండ్ చేశారు. తెలంగాణ ప్రజలు మరణించినా కూడా లెక్క చేయకుండా జగన్ ఓదార్పు యాత్ర తలపెట్టడాన్ని వారు ఖండించారు.

తెలంగాణ కోసం ఆత్మహత్య చేసుకున్న అమరవీరుల కుటుంబ సభ్యులు తమకు కొండా సురేఖ ఇవ్వజూపిన 25 వేల రూపాయలేసి సాయాన్ని తిరస్కరించిన విషయాన్ని వారు గుర్తు చేశారు. జగన్ ఇచ్చేది మొత్తం 30 లక్షల రూపాయలైతే ఓదార్పు యాత్రకు కల్పించే భద్రతకు కోట్లాది రూపాయలు ఖర్చవుతోందని వారన్నారు. ఓదార్పు యాత్ర పేరు మీద జగన్ తెలంగాణ ప్రజలు తీయడానికి ఒడిగట్టారని వారు ఆరోపించారు. జగన్ ను ప్రభుత్వం రైలు ఎక్కినివ్వకుండా ఉండాల్సిందని వారు అభిప్రాయపడ్డారు. జగన్ వరంగల్ యాత్రకు అనుమతి కూడా తీసుకోలేదని, తెలంగాణ సంఘాలకు మాత్రం అనుమతి నిరాకరిస్తున్నారని వారు విమర్శించారు. జగన్ చట్టానికి అతీతుడిగా కనిపిస్తున్నారని వారు వ్యాఖ్యానించారు.