వైభవంగా సిలికానాంధ్ర ఉత్సవాలు

సిలికాన్‌ వ్యాలీలోని మూడు తరాల ప్రవాసాంధ్రులు పాల్గొన్న సిలికానాంధ్ర దశాబ్ధి ఉత్సవాలు వైభవంగా జరిగాయి. స్థానిక క్యూపర్టినో నగరంలోని ఫ్లింట్‌ సెంటర్‌లో అక్టోబర్‌ 9 జరిగిన ఈ వేడుకలకు ప్రవాసాంధ్రులు అధిక సంఖ్యలో హాజరయ్యారు. దీనబాబు కొండుభట్ల, మంగళంపల్లి రాజశేఖర్‌ సారథ్యంలో నిర్వహించిన సాంస్కృతిక కార్యక్రమాలు తెలుగుదనానికి అద్దం పట్టాయి. ఫణిమాధవ్‌ కస్తూరి చేసిన ఇంద్రజాలం, శాంతి కూచిభొట్ల, హేమలత వరదలు రూపొందించిన మా ఇంటి పాటలు, నారాయణమూర్తి దండి భొట్ల నృత్యరూపకాలను ప్రేక్షకులను మంత్ర ముగ్ధులను చేశాయి. స్నేహ వేదుల రూపొందించిన పల్లెకు పోదాం కనువిందు చేసింది. ఆంధ్రప్రదేశ్‌ ప్రభుత్వం తరఫున రాష్ట్ర సాంస్కృతిక సంఘ ఛైర్మన్‌ ఆర్వీ రమణమూర్తి ముఖ్య అతిథిగా హాజరై ముఖ్యమంత్రి రోశయ్య సందేశాన్ని వినిపించారు. ఈ సందర్భంగా ఆర్వీ మాట్లాడుతూ.. తెలుగు సంస్కృతి వ్యాప్తికి సిలికానాంధ్ర చేస్తున్న కృషిని కొనియాడారు. మనబడి కార్యక్రమానికి ప్రభుత్వం తరఫున ఇరవై వేల రూపాయలు విలువగల పుస్తకాలను పంపిస్తామని హామీ ఇచ్చారు. భవిష్యత్తులో సిలికానాంధ్ర ఎన్నో మహత్తర కార్యాలకు వేదిక కావాలని డాక్టర్‌ లక్కిరెడ్డి హనిమిరెడ్డి, వ్యవస్థాపక అధ్యక్షులు ఆనంద్‌ కూచిభొట్లలు ఆకాంక్షించారు.

మురళీ నాదామృతవర్షిణి, నాగరాజు సంగీత విభావరి, అనూష కూచిభొట్ల, జ్యోతిల తమసోమా జ్యోతిర్గమయా నాట్య కదంబం, నంది అవార్డు గ్రహీత గుమ్మడి గోపాలకృష్ణ దర్శకత్వం వహించిన శ్రీకృష్ణ రాయబార నాటకంలో గోపాలకృష్ణ, రవీంద్ర కూచిభొట్లలు పోటాపోటీగా నటించారు. దిలీప్‌ కొండపర్తి పలువురు ప్రముఖుల్ని జ్ఞాపికలతో సత్కరించారు. అనంతరం మధుబాబు సంపాదకత్వంలోని ీఆహ్లాదచంద్రిక' అనే ప్రత్యేక సంచికను విడుదల చేశారు. ఈ సందర్భంగా సిలికానాంధ్ర నూతన కార్యవర్గాన్ని ఎన్నుకున్నారు. అధ్యక్షుడిగా దీనబాబు కొండిభట్ల ఎన్నికయ్యారు.