ప్రైవేటు ట్యూషన్: ముగ్గురు ఉపాధ్యాయుల అరెస్ట్

రియాద్: సౌదీ ఆరేబియాలో ప్రైవేటు ట్యూషన్ చెప్పారనే నేరం కింద ముగ్గురు భారతీయ ఉపాధ్యాయులు అరెస్టయ్యారు. ప్రైవేటు ట్యూషన్ చెప్పడం అనేది ఇక్కడి చట్టాల ప్రకారం నేరంగా పరిగణించబడుతుంది.

అక్కడి మీడియా అరబ్ న్యూస్ కథనం ప్రకారం.. ఇంటర్నెషనల్ ఇండియన్ స్కూల్‌లో ఉపాధ్యాయులుగా పని చేస్తున్న ముగ్గురు భారతీయులు తమ నివాసాల్లో పలువురు విద్యార్థులకు ప్రైవేటు ట్యూషన్ చెబుతున్నారు. ఈ మేరకు విచారణ జరిపిన పోలీసులు, వారిని అరెస్ట్ చేశారు.

భారతదేశంలోని కర్ణాటకకు చెందిన మహబూబ్ పాషా, తమిళనాడుకు చెందిన మహ్మద్ రిఫాయ్, ఉత్తరప్రదేశ్‌కు చెందిన అహ్మద్ సిద్దిఖిలను జైలుకు తరలించారు.

కాగా, ఈ ఘటనపై స్కూల్ మేనేజ్‌మెంట్ అత్యవసరంగా సమావేశమైంది. అరెస్టయిన ముగ్గురు భారతీయ ఉపాధ్యాయులను బెయిల్‌పై తీసుకురావాలని నిర్ణయించింది.

English summary

Three Indian teachers in Saudi Arabia have been arrested here for giving private tuitions, an illegal and punishable offence in the kingdom.