ఎలానడుస్తావో

ఒకదృశ్యానికి మరో దృశ్యానికి నడుమ
మొలుచుకొచ్చిన గోడలు
సిమెంటు కాంక్రీటు దయతలిస్తేతప్ప
తలదాచుకోలేని ఆకుపచ్చదనం
సహజమైన ఆకలి సహస్ర ముఖాలతో
వికృతమై వింజృంభిస్తున్నదశలో
బిగుసుకున్న పిడికిళ్లు ఈగుంపులోనే!
ఇక్కడే గుంపులో మనిషి మరీవొంటరివాడై
లోలోపల మండే అంతరాత్మలో
దాక్కొన్న చీకటి కొట్టంలో
మళ్లీ తనవాళ్ల కోసం దేవులాడేఆర్తిలో
ఈ ఒంటరి గుంపులో నగరజీవితవేగంతో!
ఎవరెవరి అసలు ముఖాలు
ఏ మూలలో ఏ గోడ వెనక
ఏ కొమ్మల కింద బిక్కుబిక్కుమంటూ
తన తనంలో జీవిస్తున్నదో?
ఎప్పటికప్పుడు ఇక్కడే ఈ తారురోడ్డుపక్క
మనమంతా మళ్లీ మళ్లీ అన్వేషించకతప్పదు
విద్వేషాల విచ్చుకత్తుల విషపు నవ్వులఎదుట
మంచితనపు చేతకానితనం
చేజేతులా నశిస్తే
తిరిగి నిలిచేవి ఒంటరిగాళ్ల సమాధుల గోడలే!!

-నిఖిలేశ్వర్‌

• వానకిటికీ

• విశ్వమానవత

• చిలుక

• మబ్బులు

• ఆగంతకుని స్వప్నం