• search
  • Live TV
వేగవంతమైన అలర్ట్స్ కోసం
వెంటనే సబ్‌స్క్రైబ్ చేసుకోండి  
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

బిడ్డలాలా

By నారాయణ స్వామి
|

Kavitha
వీ అవ్వను

చేతులు జోడిస్తున్న

నా తోడే

మిమ్మల్ని మీరు చంపుకోకుండ్రి

ఏడ్సెతందుకు నీల్లు లేవు నా కంట్ల

మొత్తుకునేతందుకు సత్తువ లేదు నా ఒంట్ల

బరిసెలు గావల్సినోల్లు

నా కండ్ల ముందె

కట్టెలవుతుంటే

వశపడుత లేదు

నిప్పులసుంటి కొడుకులు

నట్టింట్ల బూడిదైతుంటె

పానమాగుత లేదు

ఎండిన రొమ్ములకెల్లి

జీవం పిండి పోసిన

సేతికందకుంటనే

ఎల్లిపోతర

బాంచెననిపించుకున్నోన్ని

బండకు కొట్టందే

బతుకు సాలిస్తర

బిడ్లలాల

మీరెందుకు సావాలె

బతికెటందుకు హక్కు లేనోల్లు

బాజాప్త తిరుగుతుంటె

లేత మోదుగాకు కులసుంటోల్లు

మీరెందుకు ఎండిపోవాలె

పచ్చని మామిడి పిందెలసుంటోల్లు

మీరెందుకు రాలిపోవాలె

నీల్ల మీద వెలుగసుంటోల్లు

మీరెందుక మాయమవాలె

బిడ్డలాల

ఆశ విడువొద్దు

బతుకు మీద బరోస ఇడువొద్దు

నేల మీద కాల్లు గట్టిగుండాలె

నా పెయ్యి మీద తేలిన నరాలు చూడుండ్రి

ఉబ్బిన నరాలల్ల పొంగిన పోరాటం చూడుండ్రి

గన్నుల తోటి కొట్లాడి గెల్చిన

మనోల్ల రేషం చూడుండ్రి

మీరెందుకు బిడ్డా

కోడెనాగులసుంటి మీ వయసుని

పానం లేని కట్టెను జేస్తరు

ఎర్రటి కొలిమసుంటి మీ కోపం మీద

సావు నీల్లు జల్లుతరు

బిడ్డలాలా

తాల్లు పేనింది

మీ కుతికెలకెసుకనేటందుకు గాదు

మనని తొక్కే మదపునేన్గుల్ని

కట్టి నేలక్కొట్టేందుకు

గాసు నూనె డబ్బాలు

మీ మీద పోసుకుని

నిండుపానం తీసుకునేటందుకు గాదు

మనకున్నదంత ఊడ్సుకుని

బడాచోర్లను నడి బజార్ల

నిలబెట్టి భగ్గుమనిపిచ్చెటందుకు

రాండ్రి బిడ్డలాల

ఒక్కటవుదాం

ఒక్కటిగుందాం

చేతులొక్కటి చేసి

చప్పట్లు కొడదాం

జీవితం జిందాబాదని

మాటలొక్కటి జేసి

మంటిని మింటిని ఒక్కటి చేద్దాం

చరిత్ర మనదేనని

English summary
A poem by Narayana Swamy
న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X