అసలేంటి "వైబ్ కోడింగ్".. నేర్చుకోవాలని మెటా ఏఐ సీఈఓ షాకింగ్ కామెంట్స్ ??

వైబ్ కోడింగ్ (Vibe Coding) అనేది కృత్రిమ మేధ ఆధారిత కొత్త తరహా సాఫ్ట్‌వేర్ డెవలప్‌మెంట్ పద్ధతి. 2025 ప్రారంభంలో ఆండ్రెజ్ కార్పథీ (Andrej Karpathy) దీన్ని ప్రాచుర్యంలోకి తీసుకువచ్చారు. సంప్రదాయ కోడింగ్‌లోలా లైన్-బై-లైన్ కోడ్ రాయడం ఇందుకు అవసరం లేదు. ఇందులో యూజర్ ఏఐకి ఒక సాధారణ ఇంగ్లీష్ ప్రాంప్ట్ ఇస్తే.. అది ఆటోమేటిక్‌గా ఫంక్షనల్ కోడ్‌గా మారుస్తుంది. ఉదాహరణకు, “నాకు సేల్స్ డాష్‌బోర్డ్ యాప్ కావాలి” అని ప్రాంప్ట్ ఇస్తే, ఏఐ ఆ యాప్‌కు కావలసిన మొత్తం కోడ్‌ను క్షణాల్లో తయారుచేస్తుంది.

వైబ్ కోడింగ్ ఎలా పనిచేస్తుంది..?

వైబ్ కోడింగ్‌లో రెండు ప్రధాన స్థాయిలు ఉంటాయి — లో లెవెల్, హై లెవెల్. లో లెవెల్‌లో చిన్న ఫంక్షన్లు లేదా నిర్దిష్ట కోడ్‌లను రూపొందిస్తారు. హై లెవెల్‌లో మాత్రం ఒక పూర్తి అప్లికేషన్‌ను ఏఐ సహాయంతో తయారు చేస్తారు. యూజర్ ప్రాంప్ట్ ఇస్తే ఏఐ కోడ్‌ను సృష్టిస్తుంది. ఆ తర్వాత ఫీడ్‌బ్యాక్ ఇచ్చి కోడ్‌ను రిఫైన్ చేసుకోవచ్చు. ఏఐ ఆటోమేటిక్‌గా టెస్టింగ్ కూడా చేసి.. అవసరమైతే కోడ్‌ను మెరుగుపరుస్తుంది. గతంలో ఈ పనులు మానవ డెవలపర్లు, టెస్టర్లు చేతపడి చేసేవారు. ఇప్పుడు రిప్లిట్ (Replit), కర్సర్ (Cursor) వంటి టూల్స్ ఈ ప్రక్రియను కొన్ని నిమిషాల్లో పూర్తి చేస్తున్నాయి.

వైబ్ కోడింగ్ వాడుకలోకి వస్తున్న కంపెనీలు..

ప్రస్తుతం గూగుల్, క్లార్నా, మైక్రోసాఫ్ట్ వంటి టెక్ దిగ్గజాలు వైబ్ కోడింగ్ టూల్స్‌ను ఉపయోగిస్తున్నాయి. వీటితో ప్రోటోటైప్ డిజైన్, యాప్ డెవలప్‌మెంట్ వంటి పనులు వారాల తరబడి కాకుండా కేవలం 20 నిమిషాల్లో పూర్తవుతున్నాయి. ఉత్పాదకతను పెంచడానికి, సమయాన్ని ఆదా చేయడానికి కంపెనీలు ఈ టెక్నాలజీని వేగంగా స్వీకరిస్తున్నాయి.

ఉద్యోగాలపై వైబ్ కోడింగ్ ప్రభావం..

వైబ్ కోడింగ్, ఏఐ, ఆటోమేషన్‌ల విస్తరణతో ఉద్యోగ నియమకాల్లో భారీ మార్పులు చోటు చేసుకున్నాయి. ముఖ్యంగా జూనియర్ సాఫ్ట్‌వేర్ డెవలపర్లు, టెస్టర్లు, ఆపరేషనల్ రోల్స్ వంటి పనులు ప్రమాదంలో పడ్డాయి. 2025లో గప్‌షప్, వెర్సె ఇన్నోవేషన్, ఓలా ఎలక్ట్రిక్ వంటి సంస్థలు కలిపి సుమారు 4,000 మంది ఉద్యోగులను తొలగించాయి. టీసీఎస్ కూడా 12,000 ఉద్యోగాలను తగ్గించనున్నట్లు ప్రకటించింది. పరిశ్రమ వర్గాల అంచనా ప్రకారం, 2025 చివరి నాటికి భారత ఐటీ రంగంలో 1–3 లక్షల ఉద్యోగాలు కోల్పోయే ప్రమాదం ఉంది. అమెరికాలో ఇప్పటికే సాఫ్ట్‌వేర్ డెవలపర్ల జాబ్ లిస్టింగ్‌లు 70 శాతం తగ్గిపోయాయి.

దీంతో భవిష్యత్తులో వైబ్ కోడింగ్ వల్ల సాంప్రదాయ మాన్యువల్ కోడింగ్ పద్ధతులు పూర్తిగా మారిపోతాయి. కంపెనీలు ఏఐతో కలిసి పనిచేసే స్మార్ట్ టీమ్స్‌ను ఏర్పాటు చేయనున్నాయి. డెవలపర్లు ఏఐ ప్రాంప్ట్ ఇంజినీరింగ్, డేటా విశ్లేషణ, ఆటోమేషన్ వర్క్‌ఫ్లో డిజైన్ వంటి నైపుణ్యాలను అభివృద్ధి చేసుకోవాలి. ఇవే భవిష్యత్‌లో విలువైన టెక్ స్కిల్స్‌గా మారతాయని అభిప్రాయం వ్యక్తం చేస్తున్నారు.