Aadhaar Authentication: ఇప్పటి దాకా ఎన్ని సార్లు మీ ఆధార్ వాడారు? హిస్టరీ చూసేయండిలా
నేటి డిజిటల్ యుగంలో బ్యాంక్ అకౌంట్ తెరవాలన్నా, ప్రభుత్వ పథకాలు అందాలన్నా, కనీసం కొత్త సిమ్ కార్డు తీసుకోవాలన్నా ఆధార్ కార్డు తప్పనిసరి అయిపోయింది. మన నిత్యజీవితంలో ఇంత కీలకంగా మారిన ఈ గుర్తింపు కార్డుతో పాటు సైబర్ మోసాల ముప్పు కూడా అదే స్థాయిలో పెరుగుతోంది. మనకు ఏమాత్రం తెలియకుండానే మన ఆధార్ వివరాలను ఇతరులు దుర్వినియోగం చేసే ప్రమాదం పొంచి ఉంది. ఈ నేపథ్యంలో మన ఆధార్ ఎక్కడెక్కడ వాడారో తెలుసుకునేందుకు, దాన్ని భద్రంగా ఉంచుకునేందుకు భారత విశిష్ట గుర్తింపు ప్రాధికార సంస్థ (UIDAI) ప్రత్యేక ఆన్‌లైన్ సదుపాయాన్ని కల్పిస్తోంది.
ఆధార్ హిస్టరీని ఎలా చెక్ చేసుకోవాలి?
మీ ఆధార్ కార్డు ఎప్పుడు, ఎక్కడ ఉపయోగించారో తెలుసుకోవడం చాలా సులభం.
- ముందుగా యూఐడీఏఐ అధికారిక వెబ్‌సైట్ (uidai.gov.in) లేదా 'మై ఆధార్' (myAadhaar) పోర్టల్‌లోకి వెళ్లాలి.
- అక్కడ 'ఆధార్ అథెంటికేషన్ హిస్టరీ' ఆప్షన్‌ను ఎంచుకుని, మీ ఆధార్ నంబర్ లేదా 16 అంకెల వర్చువల్ ఐడీని (VID), స్క్రీన్‌పై కనిపించే క్యాప్చా కోడ్‌ను నమోదు చేయాలి.
- ఆ తర్వాత మీ రిజిస్టర్డ్ మొబైల్ నంబర్‌కు వచ్చే ఓటీపీని ఎంటర్ చేసి లాగిన్ అవ్వాలి.
- ఇందులో గత ఆరు నెలల కాలంలో మీ ఆధార్ ద్వారా జరిగిన లావాదేవీల తేదీ, సమయం, ఏ సంస్థ ఉపయోగించింది వంటి గరిష్టంగా 50 రికార్డుల వివరాలను మీరు స్పష్టంగా పరిశీలించవచ్చు.
అనుమానాస్పద లావాదేవీలు కనిపిస్తే ఏం చేయాలి?
లావాదేవీల జాబితాను పరిశీలిస్తున్నప్పుడు మీరు చేయని ఏదైనా అథెంటికేషన్ రిక్వెస్ట్ కనిపిస్తే వెంటనే అప్రమత్తం కావాలి. ముందుగా ఆ లావాదేవీ జరిగిన తేదీ, సమయం, సంబంధిత సర్వీస్ ప్రొవైడర్ వివరాలను గమనించాలి. ఆ సంస్థను సంప్రదించి మీ ఆధార్ వివరాలను ఎందుకు ఉపయోగించారో ఆరా తీయాలి. ఒకవేళ మీ కార్డు దుర్వినియోగం జరిగిందని బలంగా అనిపిస్తే, ఏమాత్రం ఆలస్యం చేయకుండా యూఐడీఏఐ ఫిర్యాదుల విభాగంలో కంప్లైంట్ ఇవ్వాలి. లేదా యూఐడీఏఐ టోల్ ఫ్రీ నంబర్ 1947 కు కాల్ చేసి లావాదేవీ రిఫరెన్స్ వివరాలను అందిస్తే అధికారులు తగిన చర్యలు తీసుకుంటారు.
ఆధార్ దుర్వినియోగం కాకుండా తీసుకోవాల్సిన జాగ్రత్తలు
సైబర్ నేరగాళ్ల బారిన పడకుండా ఉండేందుకు మీ ఆధార్ బయోమెట్రిక్ వివరాలను లాక్ చేసుకోవడం అత్యంత ఉత్తమమైన మార్గం. మై ఆధార్ పోర్టల్ లేదా ఎం-ఆధార్ (mAadhaar) యాప్ ద్వారా బయోమెట్రిక్ లాక్ ఆన్ చేస్తే, మీరు తిరిగి అన్‌లాక్ చేసే వరకు మీ వేలిముద్రలు, ఐరిస్‌ను ఎవరూ వాడలేరు. అలాగే, ప్రతిచోటా అసలు ఆధార్ జిరాక్స్ కాపీలు ఇవ్వకుండా, మొదటి ఎనిమిది అంకెలు కనబడకుండా ఉండే 'మాస్క్‌డ్ ఆధార్' లేదా వర్చువల్ ఐడీని ఉపయోగించడం మంచిది. వీటితో పాటు ఫోన్ కాల్స్, మెసేజ్‌ల ద్వారా వచ్చే ఓటీపీలను ఎట్టిపరిస్థితుల్లోనూ ఇతరులతో పంచుకోకుండా జాగ్రత్త పడితే మీ ఆధార్ ఎప్పటికీ సురక్షితంగా ఉంటుంది.
Click it and Unblock the Notifications
Sign in with Google
