30 ఏళ్లలో ఎన్నడూ లేనంత చిన్నదిగా.. 2060 నాటికి ఓజోన్ పొర..

పర్యావరణ పరిరక్షణలో మానవాళి సాధించిన అతిపెద్ద విజయం కళ్లముందే కనిపిస్తోంది. అంటార్కిటికాపై ఏర్పడిన ఓజోన్ రంధ్రం 1990ల తర్వాత ఎన్నడూ లేనంతగా చిన్నదిగా మారుతోందని శాస్త్రవేత్తలు ప్రకటించారు. 2025లో నమోదైన లెక్కల ప్రకారం, ఇది 1992 నుండి ఐదవ అతిచిన్న రంధ్రంగా రికార్డు సృష్టించింది. సూర్యుడి నుంచి వచ్చే ప్రాణాంతకమైన అతినీలలోహిత (UV) కిరణాల నుండి మనల్ని కాపాడే ఈ రక్షక కవచం మళ్లీ పూర్వవైభవాన్ని సంతరించుకుంటోంది.

ఒకప్పుడు ఎయిర్ కండిషనర్లు, రిఫ్రిజిరేటర్లు, స్ప్రేల నుంచి వెలువడే క్లోరో ఫ్లోరూ కార్బన్‌లు (CFCలు) ఓజోన్ పొరను జల్లెడలా మార్చేశాయి. అయితే, 1992లో అమల్లోకి వచ్చిన 'మోంట్రియల్ ప్రోటోకాల్' అనే అంతర్జాతీయ ఒప్పందం ఈ రసాయనాల వాడకంపై ఉక్కుపాదం మోపింది.

• తగ్గిన క్లోరిన్: 2000వ సంవత్సరంతో పోలిస్తే వాతావరణంలో ఓజోన్‌ను నాశనం చేసే క్లోరిన్, బ్రోమిన్ స్థాయిలు మూడింట ఒక వంతు తగ్గాయి.
• పెరిగిన ఉష్ణోగ్రతలు: అంటార్కిటికా స్ట్రాటో స్పియర్ పొరలో ఉష్ణోగ్రతలు పెరగడం వల్ల కూడా ఈ ఏడాది ఓజోన్ క్షీణత తగ్గింది.
• తక్కువ విస్తీర్ణం: ఈ ఏడాది సెప్టెంబర్ 9న గరిష్టంగా 8.83 మిలియన్ చదరపు మైళ్ల మేర రంధ్రం విస్తరించింది. ఇది 2006లో నమోదైన అతిపెద్ద రంధ్రం కంటే 30 శాతం చిన్నది!

శాస్త్రవేత్తలు ఏమంటున్నారు?

నాసా ఓజోన్ పరిశోధన బృందం నాయకుడు పాల్ న్యూమాన్ మాట్లాడుతూ, "మేము అంచనా వేసినట్లే ఓజోన్ రంధ్రాలు పరిమాణంలో తగ్గుతున్నాయి. ఇవి ఆలస్యంగా ఏర్పడి, ముందే విచ్ఛిన్నమవుతున్నాయి" అని సంతోషం వ్యక్తం చేశారు. ఒకవేళ 25 ఏళ్ల క్రితం ఉన్నంత క్లోరిన్ స్థాయిలు ఇప్పుడు ఉండి ఉంటే, ఈ ఏడాది రంధ్రం మరో మిలియన్ చదరపు మైళ్ల మేర ఎక్కువగా ఉండేదని ఆయన వివరించారు.

మన ప్రాణాలకు రక్ష..

ఓజోన్ పొర గనుక దెబ్బతింటే నేరుగా భూమిని చేరే UV కిరణాల వల్ల చర్మ క్యాన్సర్, కంటి శుక్లాలు వంటి ఆరోగ్య సమస్యలు రావడమే కాకుండా పంటలు కూడా నాశనమవుతాయి. అయితే, వాతావరణ బెలూన్ల పరిశీలన ప్రకారం, 2006లో 92 డాబ్సన్ యూనిట్లుగా ఉన్న ఓజోన్ స్థాయి, ఇప్పుడు 147 యూనిట్లకు పెరగడం శుభసూచకం.

ముందున్న లక్ష్యం..

మనం ఇదే పద్ధతిలో కాలుష్యకారక రసాయనాలను నియంత్రిస్తే, 2060వ సంవత్సరం నాటికి అంటార్కిటికాపై రంధ్రం పూర్తిగా కోలుకుంటుందని, ఈ శతాబ్దం చివరకల్లా ఓజోన్ పొర 1980ల నాటి పటిష్ట స్థితికి చేరుకుంటుందని పరిశోధకులు ఆశిస్తున్నారు. భూమికి అమర్చిన ఈ 'గ్లోబల్ సన్‌స్క్రీన్' మళ్లీ గట్టిపడటం అనేది ప్రకృతి మనకిస్తున్న గొప్ప కానుక.

English summary

In a major environmental milestone, NASA and NOAA scientists report that the 2025 Antarctic ozone hole is one of the smallest since 1990. Thanks to the Montreal Protocol, chlorine levels are dropping, and the ozone layer is expected to fully recover by the end of the century.