అతడి ఇన్నింగ్సే గేమ్ ఛేంజర్: విరాట్ కోహ్లీ
ఐపీఎల్ 2026 సీజన్లో గుజరాత్ టైటాన్స్పై ఆర్సీబీ సాధించిన ఘనవిజయం ఆ జట్టులో కొత్త ఉత్సాహాన్ని నింపింది. ఈ మ్యాచ్లో అద్భుత ఇన్నింగ్స్ ఆడి 'ఆరెంజ్ క్యాప్' కైవసం చేసుకున్న స్టార్ బ్యాటర్ విరాట్ కోహ్లీ.. విజయం అనంతరం తన ఆనందాన్ని పంచుకున్నాడు. జట్టు సమష్టి కృషి, బౌలర్ల క్రమశిక్షణ, యువ ఆటగాడు దేవదత్ పడిక్కల్ ప్రదర్శనపై కోహ్లీ ప్రశంసలు కురిపించాడు.
పడిక్కల్ ఇన్నింగ్స్ 'గేమ్ ఛేంజర్'
లక్ష్య ఛేదనలో తనతో పాటు కీలక భాగస్వామ్యం నెలకొల్పిన దేవదత్ పడిక్కల్ను కోహ్లీ ఆకాశానికెత్తాడు. "మేము మ్యాచ్ ప్రారంభంలోనే పిచ్ పరిస్థితులను అంచనా వేయాల్సి వచ్చింది. ఓ బలమైనభాగస్వామ్యం ఉంటే లక్ష్యాన్ని చేరుకోవడం సులభమని మాకు తెలుసు. పడిక్కల్ ఈ సీజన్లో ఇప్పటికే రెండుసార్లు ఇలాంటి అద్భుత ఇన్నింగ్స్లు ఆడాడు. ఓ యువ ఆటగాడు ఇంత పరిణతితో ఆడటం అరుదు. నిజానికి అతని ఇన్నింగ్సే మ్యాచ్లో అసలైన తేడాను చూపింది. మా మధ్య ఉన్న ఆ భాగస్వామ్యమే 'గేమ్ ఛేంజర్'గా మారింది" అని కోహ్లీ పేర్కొన్నాడు.
బౌలర్ల ప్రదర్శన, స్పిన్నర్ల సవాల్
గుజరాత్ టైటాన్స్ను తక్కువ స్కోరుకే పరిమితం చేసిన ఆర్సీబీ బౌలర్ల పనితీరును విరాట్ కొనియాడాడు. పిచ్పై స్పిన్నర్లకు ఆశించిన స్థాయిలో పట్టు దొరకనప్పటికీ..బౌలర్లు క్రమశిక్షణతో బౌలింగ్ చేశారని చెప్పాడు. "పరిస్థితులను ఒకసారి అర్థం చేసుకున్న తర్వాత, మా బౌలర్లు తమపై తాము నమ్మకం ఉంచి ప్రణాళికలను అమలు చేశారు. లక్ష్యం పట్ల మాకు ఎలాంటి అనుమానాలు లేవు, చాలా స్పష్టమైన వ్యూహంతో బరిలోకి దిగాం" అని కోహ్లీ వివరించాడు. జట్టులోని సానుకూల ధోరణి, ఆటగాళ్లపై ఉన్న అచంచల విశ్వాసమే ఈ విజయానికి పునాది అని ఆయన అన్నాడు.
కృనాల్ పాండ్యా 'స్మార్ట్నెస్'
ఆర్సీబీ జట్టు కూర్పు, బెంచ్ స్ట్రెంత్పై కోహ్లీ పూర్తి నమ్మకాన్ని వ్యక్తం చేశాడు. ముఖ్యంగా కృనాల్ పాండ్యా జట్టులో ఉండటం తమకు అదనపు బలాన్ని ఇస్తోందని అన్నాడు. "మా జట్టులో ప్రత్యర్థి బౌలర్లను ఒత్తిడిలోకి నెట్టగల ప్రతిభావంతులు చాలా మంది ఉన్నారు. కృనాల్ పాండ్యా వంటి క్రికెట్ నాలెడ్జ్ (స్మార్ట్నెస్) ఉన్న ఆటగాడు ఉండటం వల్ల జట్టులో ఆత్మవిశ్వాసం పెరుగుతోంది. ఇది అతని బౌలింగ్లో స్పష్టంగా కనిపిస్తోంది. మా బ్యాటింగ్, బౌలింగ్ విభాగాల్లో మంచి డెప్త్ ఉంది" అని కోహ్లీ విశ్లేషించాడు.
చిన్నస్వామి స్టేడియంలో హోమ్ విక్టరీ సంబరాలు
చివరగా తన హోమ్ గ్రౌండ్ అయిన బెంగళూరులోని చిన్నస్వామి స్టేడియం గురించి కోహ్లీ భావోద్వేగంగా మాట్లాడాడు. "చిన్నస్వామిలో ఆడటం ఎప్పుడూ ఒక ప్రత్యేకమైన అనుభూతిని ఇస్తుంది. ఇక్కడ క్రికెట్ ఆడటం నాకు చాలా ఇష్టం. మా సొంత అభిమానుల మధ్య ఈ సీజన్లో ఇక్కడ నాలుగు మ్యాచ్లు గెలవడం గొప్ప ఆరంభం. ఈ విజయం టోర్నమెంట్లో మా స్థానాన్ని మరింత బలోపేతం చేసింది" అని కోహ్లీ ముగించాడు. ఆరెంజ్ క్యాప్ హోల్డర్గా కోహ్లీ ఫామ్ ఆర్సీబీ అభిమానుల్లో ఈసారి కప్పు గెలుస్తామన్న ఆశలను రేకెత్తిస్తోంది.
Click it and Unblock the Notifications
Sign in with Google