పవన్ కళ్యాణ్ పై సాక్షి విసుర్లు

యువరాజ్యం అధినేత పవర్ స్టార్ పవన్ కళ్యాణ్ కు వ్యతిరేకంగా కాంగ్రెసు కడప పార్లమెంటు సభ్యుడు వైయస్ జగన్ కు చెందిన సాక్షి న్యూస్ చానెల్ ఓ వార్తాకథనాన్ని ప్రసారం చేసింది. యువరాజ్యం అధ్యక్షుడు పవన్ కళ్యాణ్ ఏమయ్యారంటూ వ్యాఖ్యానించింది. యువరాజ్యం అధ్యక్షుడిగా ప్రజారాజ్యం పార్టీకి ఊపునిచ్చిన పవన్ కళ్యాణ్ పార్టీ దూరం కావడంపై ప్రత్యేకంగా బుధవారం సాక్షి ఈ వార్తాకథనాన్ని ప్రసారం చేసింది. తెరకే పరిమితమై పవన్ కళ్యాణ్ యువరాజ్యాన్ని వదిలేశారని వ్యాఖ్యానించింది. ఎన్నికల సమయంలో ఇతర పార్టీలపై విరుచుకుపడి పవన్ కళ్యాణ్ కేసులను కూడా ఎదుర్కున్నారని, ఇప్పుడు మాత్రం పార్టీలో ఏ విధమైన పాత్ర నిర్వహించడం లేదని చెప్పింది.

పవన్ కళ్యాణ్ స్థానంలో యువరాజ్యం అధ్యక్షుడిగా ఎవరు వస్తారని కూడా ప్రశ్నించింది. పార్టీకి అవసరమైనప్పుడు పవన్ కళ్యాణ్ వస్తారని, పార్టీకి పవన్ కళ్యాణ్ దూరం కాలేదని చెప్పిన ప్రజారాజ్యం అధికార ప్రతినిధి వాసిరెడ్డి పద్మ మాటలను కూడా ప్రసారం చేసింది. పవన్ కళ్యాణ్ సినిమాల నుంచి కొన్ని దృశ్యాలను మధ్యమధ్యలో ప్రసారం చేసింది. సాక్షి ఆ కథనాన్ని ప్రసారం చేయడం టిఆర్పీ రేటింగ్ పెంచుకోవడానికా, చిరంజీవిపై వ్యతిరేకతతోనా అనే ప్రశ్న వేస్తున్నారు. అయితే, చిరంజీవిపై వ్యతిరేకతతోనే ఆ వార్తాకథనాన్ని ప్రసారం చేయడానికి అవకాశం ఉందనే మాట బలంగా వినిపిస్తోంది.

ప్రజారాజ్యం పార్టీ అధ్యక్షుడు చిరంజీవి కాంగ్రెసు పార్టీకి దగ్గరైనప్పటి నుంచి వైయస్ జగన్ తీవ్ర ఆగ్రహంతో ఉన్నారు. తనకు పోటీగానే చిరంజీవిని కాంగ్రెసు అధిష్టానం చిరంజీవిని చేరదీసినట్లు ఆయన భావిస్తున్నట్లు ప్రచారం కూడా జరిగింది. అప్పటి నుంచి సాక్షి టీవీ చానెల్లోనూ, దినపత్రికలోనూ చిరంజీవికి వ్యతిరేకంగా వార్తాకథనాలు వస్తున్నాయని చెబుతున్నారు. ఇందులో భాగంగానే ఏ మాత్రం సందర్భం లేకుండా పవన్ కళ్యాణ్ కు వ్యతిరేకంగా వార్తాకథనాన్ని ప్రసారం చేసినట్లు భావిస్తున్నారు.