సోనియాపై బాబు టిట్ ఫర్ ట్యాట్?

By Pratap

Published: Tuesday, November 22, 2011, 13:51 [IST]

తెలుగుదేశం పార్టీ అధ్యక్షుడు నారా చంద్రబాబు నాయుడు కాంగ్రెసు అధ్యక్షురాలు సోనియా గాంధీపై ప్రతీకారం తీర్చుకోవాలని భావిస్తున్నారని తెలుస్తోంది. సోనియా గాంధీ కుటుంబ సభ్యుల ఆస్తులపై సిబిఐ చేత విచారణ జరిపించాలని కోరుతూ సుప్రీంకోర్టులో పిటిషన్ వేయాలనే ఆలోచన చంద్రబాబు బుర్రలో మెదులుతోందని ఆ తెలుగు దినపత్రిక ఓ వార్తాకథనాన్ని ప్రచురించింది. తనపై వైయస్సార్ కాంగ్రెసు పార్టీ అధ్యక్షురాలు వైయస్ విజయమ్మ చేత కాంగ్రెసు పార్టీయే పిటిషన్ వేయించిందని చంద్రబాబు నిప్పులు కక్కుతున్నారు. దానికి ప్రతీకారం తీర్చుకోవడానికి సోనియాను టార్గెట్ చేయాలని ఆయన భావిస్తున్నారట. ఇందుకు సంబంధించి తెలుగుదేశం పార్టీ నాయకులు న్యాయ నిపుణులతో చర్చలు జరుపుతున్నట్లు కూడా ఆ పత్రిక రాసింది.

జాతీయ స్థాయిలో బలహీనపడుతున్న కాంగ్రెసు పార్టీ ప్రాంతీయ పార్టీలను వివిధ రూపాల్లో దెబ్బ తీయాలని భావిస్తోందని, అందుకు సిబిఐని వాడుకుంటోందని చంద్రబాబు జాతీయ నేతలకు వివరించారని అంటున్నారు. దానికి బ్రేకులు వేయకపోతే ప్రాంతీయ పార్టీల ఉనికికి ప్రమాదం ఏర్పడుతుందని ఆయన అంటున్నారని తెలుస్తోంది. కోర్టు ప్రస్తుతం అందరి పిటిషన్లను స్వీకరిస్తున్నందున తాము సోనియాపై వేసే పిటిషన్‌ను కూడా స్వీకరిస్తుందని తెలుగుదేశం నాయకులు గట్టిగా నమ్ముతున్నారని అంటున్నారు.

తెలుగుదేశం పార్టీ ప్రధానంగా సోనియా అల్లుడు రాబర్ట్ వద్రాను లక్ష్యం చేసుకోనున్నట్లు తెలుస్తోంది. ఆయన ఆస్తులు, ఆయన సంస్థలకు ప్రభుత్వం ఇచ్చిన రాయితీలు, కాంట్రాక్టుల వివరాలపై తెలుగుదేశం పార్టీ నియమించిన న్యాయవాదుల బృందం అధ్యయనం చేస్తోందని అంటున్నారు. సోనియా కుటుంబ సభ్యులకు సంబంధించిన వివిధ ప్రభుత్వేతర సంస్థలను కూడా ఇందులోకి లాగాలని చూస్తున్నట్లు సమాచారం. పిటిషన్ ఎవరు వేయాలనే చర్చ కూడా సాగుతోంది. పార్టీపరంగా వేయాలా, వ్యక్తుల పరంగా వేయాలనే ఆలోచన సాగుతున్నట్లు చెబుతున్నారు. వ్యక్తులపరంగా వేయాల్సి వస్తే పార్టీ నాయకులు ఎర్రంనాయుడు లేదా యనమల రామకృష్ణుడు వేయవచ్చునని అంటున్నారు. ఏమైనా, ఇది ఏ మేరకు రూపు దాలుస్తుందో వేచి చూడాల్సిందే.

Published On November 22, 2011