చిరు నినాదం అందుకున్న బాబు?

By Srinivas

Published: Wednesday, October 12, 2011, 13:01 [IST]

తెలుగుదేశం పార్టీ అధ్యక్షుడు నారా చంద్రబాబు నాయుడు తిరుపతి శాసనసభ్యుడు చిరంజీవి నినాదాన్ని అందుకున్నట్లుగా కనిపిస్తోంది. అయితే అందులో చిన్న తేడా ఉంది. తెలంగాణ విషయంలో చిరంజీవి సామాజిక తెలంగాణ అనే నినాదంతో ముందుకు వస్తే రాయలసీమ, ఆంధ్ర ప్రాంతాలలో తెలుగుదేశం పార్టీని బలోపేతం చేసుకునే ఉద్దేశ్యంతో బాబు కొన్ని వర్గాలను ఆకట్టుకునేందుకు సామాజిక రాజకీయం అనే అంతర్గత వ్యూహంతో వెళుతున్నట్లుగా కనిపిస్తోంది. ఆంధ్రా ప్రాంతంలో ఉన్న వివిధ కాపు సామాజిక వర్గాన్ని, రాయలసీమలో ఉన్న బలిజ వర్గాలను ఆకట్టుకోవడానికి ఆయన తీవ్రంగా ప్రయత్నిస్తున్నట్లు తెలుస్తోంది. కృష్ణ, గుంటూరు జిల్లాల్లో కాపులు ఎప్పుడూ టిడిపితో లేనప్పటికీ ఉబయ గోదావరి, ఉత్తరాంధ్ర జిల్లాల్లో కాపులు మొదటి నుండి టిడిపి వెంటే ఉండేవారు.

అయితే అనూహ్యంగా చిరంజీవి రాజకీయాల్లోకి రావడంతో కాపులంతా ఆయన వెంట నడిచారు. అయితే మూడు సంవత్సరాలు కూడా నడపకుండానే తాను స్థాపించిన ప్రజారాజ్యం పార్టీని చిరంజీవి కాంగ్రెసులో విలీనం చేయడంతో చంద్రబాబు గతంలో తెదేపాతో ఉండి చిరు పార్టీ స్థాపించాక ఆయనతో వెళ్లిన వారిని తిరిగి పార్టీ వైపు తిప్పుకునే ప్రయత్నాలు చేస్తున్నట్టుగా కనిపిస్తోంది. వంగా గీత, బండారు సత్యానందరావు తదితర ప్రధాన నేతలు తెదేపా నుండి చిరు పంచన చేరిన వారే. కృష్ణా జిల్లాలో వంగవీటి రాధాకృష్ణ వైయస్సార్ కాంగ్రెసు పార్టీలో చేరడంతో అక్కడి విభేదాలు తనకు అనుకూలంగా మల్చుకునే వ్యూహంలో బాబు ఉన్నారని సమాచారం.

ఇక రాయలసీమ ప్రాంతంలోనూ బలంగా ఉన్న వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిని ధీటుగా ఎదుర్కొనేందుకు అక్కడి బలిజ సామాజిక వర్గాన్ని పార్టీ వైపు తిప్పుకునేందుకు బాబు తన వంతు ప్రయత్నాలు చేస్తున్నారట.

Published On October 12, 2011