జెఏసితో వద్దు, సొంతగానే?

By Srinivas

Published: Sunday, October 16, 2011, 16:12 [IST]

సకల జనుల సమ్మెలో భాగంగా శనివారం తెలంగాణ ప్రాంత కాంగ్రెసు నేతలలో చాలామంది రైలు రోకోలో పాల్గొనక పోవడంపై వారు ప్రత్యేక కార్యాచరణతో ముందుకు వెళ్లాలని భావిస్తున్నట్లుగా కనిపిస్తోంది. రైలు రోకోలో పాల్గొనాలని ఎంపీలు పిలుపునిచ్చినప్పటికీ కాంగ్రెసు ఎమ్మెల్యేల నుండి అంతగా స్పందన కనిపించలేదు. మాజీ మంత్రులు జూపల్లి కృష్ణారావు, కోమటిరెడ్డి వెంకట్ రెడ్డి తదితర నలుగురైదుగురు మినహా ఎవరూ పాల్గొనలేదు. ఎంపీలు మాత్రం అందరూ పాల్గొన్నారు. మరోవైపు మంత్రి జానారెడ్డి సమ్మె విరమించాలని విజ్ఞప్తి చేశారు. దీంతో వారు తెలంగాణ కోసం కోదండరాం ఆధ్వర్యంలో జెఏతో కలిసి పని చేయకుండా ప్రత్యేక కార్యాచరణతో ముందు వెళ్లాలని భావిస్తున్నట్లుగా కనిపిస్తోంది. ఎంపీలు కేకే, కోమటిరెడ్డి రాజగోపాల్ రెడ్డి, గుత్తా సుఖేందర్‌రెడ్డి, పొన్నం ప్రభాకర్, మధుయాష్కీ, వివేక్, రాజయ్య, బలరాం నాయక్ రైల్‌రోకోలో పాల్గొన్నారు.

అత్యధిక ఎమ్మెల్యేలు, ఎమ్మెల్సీలు, మంత్రులు తెలంగాణ కోసం సొంత కార్యక్రమంతో ముందుకు సాగాలన్న అభిప్రాయం వ్యక్తం చేస్తున్నట్టుగా తెలుస్తోంది. సీమాంధ్ర నేతలు అనుసరిస్తున్న విధానాలను వారు ఉదహరిస్తున్నారట. 2009 డిసెంబర్ 9 ప్రకటన వెంటనే సీమాంధ్రలో అన్ని పార్టీల ఎమ్మెల్యేలూ రాజీనామా చేసినా, మంత్రులు విధులు నిర్వర్తించిన విషయాన్ని కొందరు మంత్రులు, ఎమ్మెల్యేలు గుర్తుచేస్తున్నారు. తెలంగాణ ఏర్పాటు ఖాయమని సంబరాలు చేసుకుంటున్న తరుణంలో సీమాంధ్ర నేతలు అధిష్ఠానంపై రాజకీయంగా ఒత్తిడి తేవడం వల్ల.. మొత్తం ప్రక్రియ ఆగిపోయిందని చెబుతున్నారు. ఆ తర్వాత కూడా సీమాంధ్ర నేతలు సమైక్య గళాన్ని వారి వారి పార్టీ వేదికల ద్వారానే వినిపిస్తున్నారని ఈ విషయంలో ఒక పార్టీ మరో పార్టీపై, ఒక నేత మరోనేతపై విమర్శలు, ప్రతివిమర్శలు చేయట్లేదని గుర్తుచేస్తున్నారు.

తెలంగాణలో ఇందుకు విరుద్ధంగా జరుగుతుండటంపై వారు తీవ్ర అసంతృప్తితో ఉన్నట్లు సమాచారం. సమైక్య గళాన్ని అధిష్ఠానానికి, కేంద్రానికి వినిపించే మొత్తం బాధ్యతను అక్కడి ఎంపీలు తీసుకుంటే ఇక్కడ మాత్రం అందుకు విరుద్ధంగా ఢిల్లీలో లాబీయింగ్‌ను విడిచిపెట్టి, పదవులకు రాజీనామా చేయాలంటూ తమపై ఒత్తిడి పెంచే కార్యక్రమం చేపట్టడం సరికాదనే ఉద్దేశ్యంతో ఉన్నారట. అధిష్ఠానంతో పరిచయాలు ఎక్కువున్న ఎంపీలు ఢిల్లీలో లాబీయింగ్ చేస్తే రాష్ట్రసాధన సులువవుతుందని అభిప్రాయపడుతున్నారు. అధికార పక్షంలో ఉంటూనే ప్రతిపక్షాలతో నేరుగా మంతనాలు జరపడం, పార్టీ సొంత అజెండాతో తెలంగాణ సాధన కోసం ప్రత్యేక కార్యాచరణను రూపొందించకపోవడం వంటి అంశాలను వారు ప్రశ్నిస్తున్నారట.

Published On October 16, 2011