జగన్ ఇష్యూ: కిరణ్‌పై హైకమాండ్ సీరియస్

వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గానికి చెందిన శాసనసభ్యుల విషయంలో కాంగ్రెసు పార్టీ అధిష్టానం ముఖ్యమంత్రి కిరణ్ కుమార్ రెడ్డిపై సీరియస్ అయినట్లు సమాచారం. వైయస్ జగన్‌కు మద్దతిచ్చే శానససభ్యుల సంఖ్య విషయంలో కిరణ్ కుమార్ రెడ్డికి సరైన అంచనా లేకపోవడమే అందుకు కారణమని అంటున్నారు. పైగా, జగన్ వైపు మరింత మంది శాసనసభ్యులు వెళ్లకుండా కట్టడి చేయడంలో కూడా ఆయన విఫలమవుతున్నట్లు భావిస్తున్నారు.

నిజానికి, వైయస్ జగన్ వెంట కేవలం 18 మంది శానససభ్యులు మాత్రమే ఉంటారని ముఖ్యమంత్రి అంచనా వేశారని అంటున్నారు. ఆ సంఖ్య కూడా తగ్గుతుందని ఆయన చెప్పారట. అయితే, సమస్య ముదిరి జగన్‌పై సిబిఐ దర్యాప్తు సాగుతున్న క్రమంలో ఆ సంఖ్య 29కి చేరుకుంది. వారిలో 26 మంది శాసనసభ్యులు రాజీనామాలు చేశారు. మిగతా ముగ్గురు కూడా జగన్ వెంటే ఉన్నప్పటికీ రాజీనామాలు చేయలేదు. ఈ సంఖ్యను తగ్గించడంలో కిరణ్ కుమార్ రెడ్డి చర్యలు ఫలితాలు ఇవ్వలేదనే అసంతృప్తితో అధిష్టానం ఉన్నట్లు చెబుతున్నారు.

ఆ సమస్య అలా ఉండగానే వైయస్ జగన్ వైపు మరో పది, 13 మంది వెళ్తారనే వార్తలు వచ్చాయి. జగన్ వర్గం ఆ విషయాన్ని ప్రచారంలో పెట్టింది. వివిధ కారణాల వల్ల మరింత మంది కూడా జగన్ వైపు వెళ్లడానికి సుముఖంగా ఉన్నట్లు చెబుతున్నారు. అయితే, జగన్ భవిష్యత్తుపై ఆందోళనతోనే వారు అటు వెళ్లడం లేదు తప్ప అందులో కిరణ్ కుమార్ రెడ్డి ప్రతిభ ఏమీ లేదని అంటున్నారు. వైయస్ జగన్ విమర్శలు తిప్పికొట్టడంలో కూడా కిరణ్ కుమార్ రెడ్డి ప్రదర్శిస్తున్న వైఖరి ప్రోత్సాహకరంగా లేదని అంటున్నారు. ఏమైనా, రోశయ్య నుంచి ముఖ్యమంత్రి పగ్గాలు తీసుకున్న తర్వాత కిరణ్ కుమార్ రెడ్డి పెద్దగా పార్టీనీ, ప్రభుత్వాన్నీ గాడిలో పెట్టిన దాఖలు ఏవీ లేవనే అభిప్రాయం వ్యక్తమవుతోంది.

English summary

It is said that Congress high command is not happy with the working style of M Kiran Kumar Reddy.