గర్ల్ ఆత్మహత్య: కోహ్లీ బాగా ఆడాలని ఆకాంక్ష

భోపాల్: ఆత్మహత్య చేసుకున్న 18 ఏళ్ల అమ్మాయి విచిత్రమైన కోరికను వెల్లడిస్తూ సూసైడ్ నోట్ రాసింది. ఇంజనీరింగ్ మొదటి సంవత్సరం చదువుతున్న ఆ అమ్మాయి సూసైడ్ నోట్‌లోని అంశం అందరినీ ఆశ్చర్యంలో ముంచెత్తింది. విరాట్ కోహ్లీ బాగా ఆడాలని, ఉత్తమ క్రికెట్‌గా పేరు తెచ్చుకోవాలని ఆకాంక్షిస్తూ ఆమె ఆ నోట్ రాసింది.

క్రికెట్ కెరీర్‌లో విరాట్ కోహ్లీ పలు మైలు రాళ్లు దాటుతాడని ఆమె ఆకాంక్షించింది. కోహ్లీ మంచి క్రికెటర్ అని, భవిష్యత్తులో రికార్డులు స్థాపిస్తాడని ఆమె అన్నది. ఆ అమ్మాయి బినాకు చెందిందని, భోపాల్‌లోని ఓ ప్రైవేట్ ఇంజనీరింగ్ కాలేజీలో చదువుతోందని భోపాల్ పోలీసులు చెప్పారు

ఆ అమ్మాయి ఉరేసుకుని మరణించింది. ఆమె కడుపు నొప్పితో బాధపడుతోందని కుటుంబ సభ్యులు చెప్పారు. అయితే, ఆమె ఎందుకు ఆత్మహత్య చేసుకుందనేది అర్థం కావడం లేదని అంటున్నారు. అమ్మాయి విరాట్ కోహ్లీ అభిమాని అని, ఆ విషయాన్ని ఆమె సూసైడ్ నోట్‌లో రాసిందని పోలీసులు చెప్పారు.

తాను విరాట్ కోహ్లీ అభిమానని అని, భవిష్యత్తులో విరాట్ కోహ్లీని కలువలేనని అతనికి చెప్పాలని ఆమె కుటుంబ సభ్యులను కోరింది. ఢిల్లీలోని ఫిరోజ్ షా కోట్లా మైదానంలో భారత జట్టు పాకిస్తాన్ జట్టుపై విజయం సాధించిన నేపథ్యంలో ఆ అమ్మాయి ఆత్మహత్య చేసుకుంది. అంతకు ముందు భారత జట్టు పాకిస్తాన్‌పై రెండు వన్డే మ్యాచులను ఓడిపోయింది.

English summary

An 18-year-old girl allegedly committed suicide in Bhopal on Sunday, Jan 6. The girl, a first year engineering student, shocked all with her suicide note in which she wished cricketer Virat Kohli to play well and prove himself a better cricketer.